អ្នកស្រី កុយពិជិតសី៖ ធ្វើសវនកម្មតាមការកំណត់ខ្សែព្រំដែនឆ្នាំ១៩៨៥ ... ដែលយួនចាត់ចែងឲ្យ

​លោកស្រី កុយ ពិជិត......សី អនុប្រធាន​លេខាធិការដ្ឋាន​អចិន្ត្រៃយ៍ នៃ​អាជ្ញាធរ​ជាតិ​ទទួលបន្ទុក​កិច្ចការ​ព្រំដែន

ការ​គូស​ចម្លង​ផែនទី​កម្ពុជា​-​វៀតណាម យោងតាម​សន្ធិសញ្ញា​បំពេញបន្ថែម​ឆ្នាំ​២០០៥ (sic! សិច!)

ថ្ងៃទី 10 កក្កដា 2012
ដោយ: លីនណា
Cambodia Express News


ភ្នំពេញ: មន្ត្រី​ជំនាញ​ព្រំដែន​បាន​ឲ្យ​ដឹងថា ការផ្ទៀងផ្ទាត់​គូស​ចម្លង​ផែនទី​កម្ពុជា​-​វៀតណាម ចាប់ផ្តើម​ប្រជុំ​ជជែក​ពិភាក្សាគ្នា ដើម្បី​យកទៅអនុវត្ត​នៅ​លើដី​ជាក់ស្តែង និង​ធ្វើការ​បោះបង្គោល​ខណ្ឌសីមា ចាប់ពី​ថ្ងៃទី​១០ ដល់​ថ្ងៃទី​១៣ ខែកក្កដា ឆ្នាំ​២០១២ នៅ​វិមាន​មិត្តភាព នៃ​ទីស្តីការគណៈរដ្ឋមន្ត្រី​។ កិច្ចប្រជុំ​នេះ ជា​កម្រិត​បច្ចេកទេស​ថ្នាក់ជាតិ និង​យោងតាម​សន្ធិសញ្ញា​បំពេញបន្ថែម​ឆ្នាំ​២០០៥ ដើម្បី​អនុញ្ញាត​ឲ្យ​ភាគី​ទាំងពីរ​ធ្វើការ​គូស​ចម្លង​ខ្សែ​ព្រំដែន​ឡើងវិញ​។​

​លោកស្រី កុយ ពិជិតសី អនុប្រធាន​លេខាធិការដ្ឋាន​អចិន្ត្រៃយ៍ នៃ​អាជ្ញាធរ​ជាតិ​ទទួលបន្ទុក​កិច្ចការ​ព្រំដែន បាន​និយាយថា នៅ​ព្រឹក​ថ្ងៃទី​១០ ខែកក្កដា ឆ្នាំ​២០១២ មាន​កិច្ចប្រជុំ​ក្រុម​ជំនាញ​គូស​ចម្លង​ផែនទី​។ ផែនទី​នេះ យោងតាម​សន្ធិសញ្ញា​បំពេញបន្ថែម​ឆ្នាំ​២០០៥ អនុញ្ញាត​ឲ្យ​ភាគី​ទាំងពីរ ( កម្ពុជា​-​វៀតណាម ) ធ្វើការ​គូស​ចម្លង​ខ្សែ​ព្រំដែន​ឡើងវិញ​។

​លោកស្រីកុយ ពិជិតសី បាន​បញ្ជាក់ថា “​យើង​ពិនិត្យ​ធ្វើ​សវនកម្មតាមការកំណត់​ខ្សែ​ព្រំដែន​ឆ្នាំ​១៩៨៥ ដែលបានចុះហត្ថលេខាសន្ធិសញ្ញា​បំពេញបន្ថែម​ឆ្នាំ​២០០៥ អនុញ្ញាត​ឲ្យ​ភាគី​ទាំងពីរ ធ្វើការ​គូស​ចម្លង​ពី​ផែនទី​ខ្នាត ១/១​រយ​ពាន់ បោះ​ពុ​ម្ភ​ដោយ​ក្រុម​ភូមិសាស្ត្រ​ឥណ្ឌូចិន មកលើ​ផែនទី UTM ១/៥០​ពាន់ ដើម្បី​យកទៅអនុវត្ត​នៅ​លើដី​ជាក់ស្តែង​(​ធ្វើការ​បោះបង្គោល​ខណ្ឌសីមា​នៅលើ​ដី​)”​។​


​លោកស្រី កុយ ពិជិតសី បាន​បន្តថា ការប្រជុំ​ក្រុម​ការិយាល័យ​ផ្ទៀងផ្ទាត់​គូស​ចម្លង​ផែនទី​នេះ ជា​កម្រិត​បច្ចេកទេស​ថ្នាក់ជាតិ​ដោយ​ចាប់ផ្តើម​ប្រជុំ​ពីថ្ងៃ​ទី​១០ ដល់​ថ្ងៃទី​១៣ ខែកក្កដា ឆ្នាំ​២០១២​។

​លោកស្រី​បានបញ្ជាក់​ឲ្យ​ដឹងថា “​ការប្រជុំ​ក្រុម​ជំនាញ​ប​ច្ចេស​នេះ វា​ជា​ចំណុច​សំខាន់​ណាស់ កិច្ចការ​ហ្នឹង បើសិនជា​យើង​ឥត​ឯកភាពគ្នា លើ​ការ​គូស​ចម្លង​ផែនទី​ហ្នឹង​ទេ មន្ត្រី​ជំនាញ​យើង​មិនអាច​ទៅ​បោះបង្គោល និង​ខណ្ឌសីមា​លើដី​ជាក់ស្តែង​ទេ មានន័យថា យើង​ឯកភាពគ្នា​លើ​ផែនទី​ហើយ បាន​យើង​យកទៅអនុវត្ត​នៅលើ​ដី​ជាក់ស្តែង កិច្ចការ​ហ្នឹង​យើង​ធ្វើ​ទន្ទឹមគ្នា ទាំង​ការបោះបង្គោល​នៅ​លើដី​ជាក់ស្តែង និង​ការ​គូស​ចម្លង​ផែនទី​”​។​

​លោកស្រី ក៏បាន​ឲ្យ​ដឹង​ទៀតថា ចំពោះ​ការបោះបង្គោល​ព្រំដែន​នៅលើ​ដី​ជាក់​រវាង​កម្ពុជា​-​វៀតណាម គិត​មកដល់​ត្រឹម​ដំណាច់​ខែឧសភា ឆ្នាំ​២០១២ បោះ​បាន ២៨៧​បង្គោល ស្មើនឹង ៧៦%​នៃ​ផែនការ និង​ខណ្ឌសីមា​បាន​ជាង ៥០%​ទូទាំង​ខ្សែ​ព្រំដែន​ទាំងមូល​ដែលមាន​ជាង ១០០០​គីឡូម៉ែត្រ​។ បង្គោល​ព្រំដែន​គោក​កម្ពុជា​-​វៀតណាម មាន ៣១៤​ទីតាំង វា​ត្រូវជា ៣៧៥ បង្គោល ដោយសារ​តែមាន​បង្គោល​ត្រី និង​បង្គោល​ភ្លោះ នៅ​លើដី​ជាក់ស្តែង​៕​