បាតុកម្ម ​ក្លាយជា​មធ្យោបាយ ​ដើម្បី​ទូងស្គរ​រក​ប្រជាប្រិយភាព​ មុន​បោះឆ្នោត​

ថ្ងៃទី 20 ឧសភា 2013,

ដោយ: វិនិច្ឆ័យ

Cambodia Express News​

ភ្នំពេញ: ​គណបក្សសង្គ្រោះ​ជាតិ​ បានធ្វើ​បាតុកម្ម​ជា​លើក​ទី​ពីរ នៅ​ព្រឹកថ្ងៃទី​ ២០ ​ខែឧសភា ដើម្បី​ដាក់ឲ្យ​មានការ​កែប្រែសមាសភាពគណៈកម្មាធិការ​ជាតិរៀបចំ​ការបោះឆ្នោត​ គ.ជ.ប. និង​ការពិនិត្យ​បញ្ជី​អ្នក​ចុះឈ្មោះ​បោះឆ្នោត​ឡើងវិញ​។​
​ការធ្វើ​បាតុកម្ម​ ត្រូវបាន​ធ្វើឡើង​ពីរដង​នៅក្នុង​រយ​:​ពេល​ជាង​មួយខែ ​ហើយ​ការរៀបចំ​សេណា​រី​យ៉ូ​ជាច្រើន​ ត្រូវបាន​បង្កើតឡើង​ ដើម្បី​ធ្វើឲ្យល្បីរន្ទឺ​អំពី​គម្រោង​បាតុកម្ម​តាម​រយ​:​សារព័ត៌មាន​។​
​បន្ទាប់ពី​ការ​ស្ងប់ស្ងាត់​អស់​រយ​:​ពេល​ជាច្រើន​ឆ្នាំ​ ការ​ងើប​រើ​ឡើងវិញ​អំពី​ការធ្វើ​បាតុកម្ម​របស់​គ​ណ​បក្សប្រឆាំង ក៏​ទាក់ទាញ​ឲ្យមាន​ចាប់​អា​ម្មណ៍ពី​សារព័ត៌មាន ដែល​ស្រេក​ឃ្លាន​ខ្លាំង​នូវ​ព័ត៌មាន ​ដែល​ថ្មី ​និង​ប្លែក​។​

​គេ​នៅ​ចាំបាន​ថា ​គណបក្ស​សម រង្ស៊ី ដែល​បាន​បង្កើតឡើង​កាលពី​ឆ្នាំ​១៩៩៥ បាន​ល្បីឈ្មោះ​ ក៏​ព្រោះតែគណបក្ស​នោះ បាន​ដឹកនាំ​បាតុកម្ម​ជាច្រើន ​ដោយមាន​រូប​លោក សម រង្ស៊ី​ជា​អ្នកដឹកនាំ​។​
​គណបក្ស​សង្គ្រោះ​ជាតិ​ នៅពេលនេះ ​កំពុងតែ​សម្លឹងមើល​សកម្មភាព​ចាស់​ សម្រាប់​គណបក្ស​ថ្មី​ នៅក្នុង​ការប្រមែប្រមូលការគាំទ្រ នៅ​មុនពេល​បោះឆ្នោត​។​
​សម្រាប់​អ្នកនយោបាយ​ប្រឆាំង គោលដៅ​ធំ​នៅក្នុង​បេសកកម្ម ​គឺ​ការតាក់តែង​ និង​ធ្វើ​សកម្មភាព​នយោបាយ

ដើម្បី​ធ្វើយ៉ាងណាឲ្យមហាជនមាន​ការមើលឃើញ​ថា របប​គ្រប់ គ្រង​បច្ចុប្បន្ន មាន​កំហុស​ជាច្រើន​នៅក្នុង​ការដឹកនាំ​ប្រទេស​។
​បាតុកម្ម​មាន​ហេតុផល​ផលប្រយោជន៍​ជាច្រើន ​សម្រាប់​គណបក្សប្រឆាំង​។

ទីមួយ​គណបក្សប្រឆាំងកំពុងតែ​បង្ហាញ​ភាព​សកម្ម​របស់ខ្លួននៅ​មុនពេល​ការបោះឆ្នោត បន្ទាប់ពី​មាន​ភាពស្ងប់ស្ងាត់​យ៉ាងយូរ​មក​។

ទី​ពីរ​ ការធ្វើ​បាត​កម្ម​អាចជា​ការលើក​ទឹកចិត្ត ដល់​ក្រុម​អ្នកនយោបាយ​ប្រឆាំង​ថ្នាក់មូលដ្ឋានឲ្យមាន​កម្លាំងចិត្ត​នៅក្នុង​ការធ្វើ​ការតស៊ូ​នយោបាយ​ថ្នាក់មូលដ្ឋាន នៅពេលដែល​អ្នកនយោបាយ​ថ្នាក់ជាតិ​កំពុងតែ​សកម្ម​។

ទី​បី ការធ្វើ​បាតុកម្ម​ជិត​បោះឆ្នោត​អាចធ្វើឲ្យ​រដ្ឋាភិបាល និង​គណបក្សកាន់អំណាច ក្រពុលមុខ ។

ទី​បួន ពួកគេ​អាច​បង្វែ​រការចាប់អារម្មណ៍​អំពី​ការរីកចម្រើន​សេដ្ឋកិច្ច មករក​បញ្ហាសង្គម​វិញ​។

និងហេតុផល​ទី​ប្រាំ​គឺ​ពួកគេ​អាច​ទាក់ទាញ​ការចាប់អារម្មណ៍​របស់បណ្តា សារព័ត៌មាន ​ដើម្បីឲ្យ​មានការ​ផ្សព្វផ្សាយ​ទូលំទូលាយអំពីសកម្មភាព របស់គណបក្សនេះ​។​

​ការធ្វើ​បាតុកម្ម​បានផ្តល់​ផលចំណេញ​ជាច្រើន​ដល់​គណបក្សប្រឆាំង​ ខណ​:​ដែល​រដ្ឋាភិបាល និង​គណបក្សកាន់អំណាច ស្ថិតនៅក្នុង​តួនាទី​មួយ ត្រឹម​ការពារ​ខ្លួន​តែ​ប៉ុណ្ណោះ​៕