កម្មករ​រោងចក្រ​អែស.អិល​ប៉ះ​ទង្គិច​ជាមួយ​ប៉េអឹម​ក្នុង​ពេល​ដង្ហែ​ក្បួន​បាតុកម្ម

១២-វិច្ឆិកា-២០១៣៖ រថយន្ត​របស់​ប៉ូលិស​មួយ​គ្រឿង​ត្រូវ​ក្រុម​កម្មករ​រោងចក្រ អែស.អិល ដុត​កម្ទេច​នៅ​ខាង​មុខ​វត្ត​ស្ទឹងមានជ័យ។ RFA/Uon Chhin

កម្មករ​រោងចក្រ អែស.អិល (SL) ប្រមាណ ២​ពាន់​នាក់ ប៉ះ​ទង្គិច​ជាមួយ​ប៉េអឹម​ក្នុង​ពេល​ដង្ហែ​ក្បួន​បាតុកម្ម​ពី​រោងចក្រ​ស្ថិត​ក្នុង​សង្កាត់​ស្ទឹងមានជ័យ សំដៅ​ទៅ​មុខ​ផ្ទះ​នាយករដ្ឋមន្ត្រី ហ៊ុន សែន នៅ​ព្រឹក​ថ្ងៃ​ទី​១២ ខែ​វិច្ឆិកា ឆ្នាំ​២០១៣ ដើម្បី​ទាមទារ​ឲ្យ​រោងចក្រ​អនុវត្ត​កិច្ច​សន្យា​ដែល​បាន​ព្រមព្រៀង​គ្នា​កន្លង​មក។

ដោយ ទេព សុរ៉ាវី RFA 2013-11-12

សហជីព​សេរី​កម្មករ​ប្រចាំ​រោងចក្រ អែស.អិល លោក អួន នឿន ប្រាប់​វិទ្យុ​អាស៊ីសេរី​ថា ក្បួន​ដង្ហែ​នោះ​ត្រូវ​បាន​កម្លាំង​ប៉េអឹម​ប្រមាណ ៣០០​នាក់ ដាក់​កម្លាំង​រារាំង​ដំណើរ​ក្បួន​ដង្ហែ​នោះ ដោយ​មាន​ឡាន​ទឹក​ត្រៀម​បង្ក្រាប​ក្រុម​បាតុករ​​ប្រមាណ ២០​​គ្រឿង នៅ​ខាង​មុខ​វត្ត​ស្ទឹងមានជ័យ។

ក្រុម​កម្មករ​បាន​ដុត​រថយន្ត​ប៉ូលិស​មួយ​គ្រឿង​ និង​ម៉ូតូ ២​គ្រឿង នៅ​ខាង​មុខ​វត្ត​ស្ទឹងមានជ័យ ដោយសារ​ពួកគេ​ខឹងសម្បារ​នឹង​សមត្ថកិច្ច​ដែល​បាន​យក​ឡាន​ទឹក​មក​បាញ់​បង្ក្រាប​ក្រុម​កម្មករ។

កន្លង​មក​ភាគី​ពាក់ព័ន្ធ រួម​មាន​ក្រសួង​ការងារ តំណាង​កម្មករ និង​សហជីព បាន​ប្រជុំ​សម្រេច ៥​ចំណុច តាម​ការ​ស្នើ​សុំ​របស់​កម្មករ​រួច​ហើយ គឺ​ទី​១ តាម​ការ​សម្រេច​របស់​រដ្ឋាភិបាល គឺ​បញ្ជា​ឲ្យ​ថៅកែ​រោងចក្រ​ដក​លោក មាស សុត្ថា ប្រធាន​រដ្ឋបាល​ចេញ​ពី​តួនាទី​ចាត់ចែង​កិច្ចការ​រដ្ឋបាល​នៅ​រោងចក្រ។ ទី​២ ដក​មន្ត្រី​សមត្ថកិច្ច និង​មន្ត្រី​កងរាជអាវុធហត្ថ​ចេញ​ពី​បរិវេណ​រោងចក្រ។ ទី​៣ រោងចក្រ​មិន​ត្រូវ​ផ្លាស់ប្ដូរ​វេន​ធ្វើ​ការ គឺ​មាន​ន័យ​ថា ត្រូវ​រក្សា​ការងារ ៣​វេន​ដដែល។ ទី​៤ ក្រុមហ៊ុន​ត្រូវ​ដក​រាល់​បណ្ដឹង​ទាំង​អស់​ទៅ​លើ​កម្មករ និង​បញ្ឈប់​ធ្វើ​ទុក្ខបុកម្នេញ​ទៅ​លើ​កម្មករ​ទៀត និង​ទី​៥ ​កម្មករ​ស្នើ​សុំ​ឲ្យ​រោងចក្រ​ផ្ដល់​ប្រាក់ ៥០​ភាគរយ​ដល់​ពួកគេ​នៅ​ពេល​ធ្វើ​បាតុកម្ម។ ប៉ុន្តែ​ការ​សម្រេច​នោះ​នៅ​មិន​ទាន់​ត្រូវ​បាន​អនុវត្ត​ក្នុង​រោងចក្រ​នៅ​ឡើយ ពិសេស​លោក មាស សុត្ថា ដែល​កម្មករ​ស្នើ​សុំ​ឲ្យ​ឈប់​ពី​តួនាទី​ក្នុង​រោងចក្រ នៅ​តែ​មាន​វត្តមាន​នៅ​ឡើយ​រហូត​ដល់​សព្វ​ថ្ងៃ​នេះ។

សូម​រង់ចាំ​អាន​និង​ស្ដាប់​ព័ត៌មាន​ពិស្ដារ...