អាជ្ញាធរបក្សកុម្មុយនិស្តវៀតណាម ដាក់ខ្នោះជើង លោក ចៅ ហេន នៅក្នុងមន្ទីរពេទ្យយួនក្នុងខេត្តមាត់ជ្រូក

ការដេញដោលអំពីសិទ្ធិមនុស្សវៀតណាមនិងអាមេរិក នៅសហរដ្ឋអាមេរិក


Wednesday, November 09, 2011

ដោយ ថាច់ ប្រីជា គឿន/សារព័ត៌មាន ព្រៃនគរ

កិច្ចដេញដោលគ្នាលើកទី ១៦ ស្ដីអំពីស្ថានភាពសិទ្ធិមនុស្សនៅប្រទេសវៀតណាមជា មួយសហរដ្ឋ អាមេរិក ឆ្នាំនេះ ប្រព្រឹត្តទៅនៅការិយាល័យក្រសួងការបរទេសសហរដ្ឋ អាមេរិករយៈពេលពីរថ្ងៃ គឺនៅថ្ងៃទី ០៩ និង ទី ១០ ខែវិច្ឆិកា នេះ ។

លោក Michael Posner ជំនួយការរដ្ឋមន្ត្រីក្រសួងការបរទេសសហរដ្ឋអាមរិក ទទួលបន្ទុកលទ្ធិប្រជាធិបតេយ្យនិងសិទ្ធិមនុស្ស ។ រូបថត៖AP

នេះជាកិច្ចពិភាក្សាប្រចាំឆ្នាំផ្អែកលើគោលការណ៍សមភាព និងគោរពគ្នាទៅវិញទៅមក ដែលមានការ ចូលរួមពីអ្នកជំនាញនៃប្រទេសទាំងពីរ ។

តំណាងឲ្យភាគីសហរដ្ឋអាមេរិក គឺជំនួយការរដ្ឋមន្ត្រីក្រសួងការបរទេសទទួលបន្ទុកលទ្ធិ ប្រជាធិបតេយ្យ និងសិទ្ធិមនុស្ស គឺលោក Michael Posner និងភាគីវៀតណាមតំណាង ដោយ លោក វ៉ាង ជី ត្រុង (Hoàng Chí Trung) អគ្គរដ្ឋទូតវៀតណាម ។

យោងតាមសេចក្ដីថ្លែងការណ៍របស់ក្រសួងការបរទេសសរដ្ឋអាមេរិក ការដេញដោលនេះ ជាឱកាសដើម្បីជម្រុញឲ្យមានការពិភាក្សាកាន់តែស៊ីជម្រៅដែលអាចនាំមកលទ្ធផលជាក់ ស្ដែង ជុំវិញបញ្ហាសិទ្ធិ មនុស្សដែលនៅមិនទាន់ចុះចម្រុងគ្នារវាងប្រទេសទាំងពីរ ។

រួមជាមួយសហគមន៍អន្តរជាតិ អង្គការការពារសិទ្ធិមនុស្សនៅក្នុងពិភពលោក ក្រ សួងការបរទេស សហរដ្ឋអាមរិក ជារឿយៗ តែងតែអំពាវនាវឲ្យវៀតណាមគោរព សិទ្ធិរបស់ប្រជាពលរដ្ឋ ។ ក្រៅពីនេះ ក៏បានថ្កោលទោសអំពីការដែលរដ្ឋការក្រុង ហាណូយតែងតែធ្វើទុក្ខបុកម្នេញ ឃុំឃាំងក្រុមជនជាតិ ដើមខ្មែរក្រោមនៅដែនដី កម្ពុជាក្រោម អ្នកមានយោបល់ខ្វែងគំនិត អ្នកចលនាប្រជាធិបតេយ្យ និងអ្នក បញ្ចេញយោបល់ដោយសន្តិវិធីរិះគន់រដ្ឋាភិបាល ។

អ្នកដែលត្រូវបានអាជ្ញាធរវៀតណាមធ្វើទុក្ខបុកម្នេញទាំងនោះ រួមមានលោក ចៅ ហេន ប្រជាជាតិ ខ្មែរក្រោមអ្នកតវ៉ាទាមទារដីធ្លីរបស់ខ្លួនដែលត្រូវបានអាជ្ញាធរវៀតណាមរឹប យកចែកឲ្យជនជាតិយួននៅស្រុកស្វាយទង ខេត្តមាត់ជ្រូក និងក្រុមជនជាតិយួនប្រជា ធិបតេយ្យ រួមមានលោក កូវ ហ្វី ហា វៅ (Cù Huy Hà Vũ) កញ្ញា ឡេ ធី កុង ញ៉ឹង (Lê Thị Công Nhân ) លោក ឡេ វ៉ាំង ដាយ (Nguyễn Văn Đài ) និង លោក ឡេ កុង ដិន (Lê Công Định ) ។

អាជ្ញាធរបក្សកុម្មុយនិស្តវៀតណាម ដាក់ខ្នោះជើង លោក ចៅ ហេន នៅក្នុងមន្ទីរពេទ្យយួនក្នុងខេត្តមាត់ជ្រូក ពេលលោកកំពុងព្យាបាលជំងឺ ដោយសុខភាពទ្រុឌទ្រោមនៅក្នុងគុក ។

វៀតណាមជាប្រទេសប្រកាន់យករបបនយោបាយបក្សទោល ដែលការដឹកនាំរដ្ឋរបស់ គេមិនអនុញ្ញាតិ ឲ្យមានការរិះគន់ពីប្រជាពលរដ្ឋឡើយ ។ ក្រោយពីបក្សកុម្មុយនិស្តវៀត ណាមបានចូលត្រួតត្រាប្រជា ជាតិខ្មែរក្រោមនៅដែនដីកម្ពុជាក្រោមទាំងស្រុងកាលពី ថ្ងៃទី ៣០ ខែមេសា ឆ្នាំ ១៩៧៥ មក អង្គការ ការពារសិទ្ធិមនុស្សខ្មែរក្រោមនៅក្រៅប្រ ទេស ក្នុងនោះ មានសហព័ន្ធខ្មែរកម្ពុជាក្រោមជាដើម ជា រឿយៗបានរាយការណ៍ថា ពលរដ្ឋខ្មែរក្រោមនៅភាគខាងត្បូងវៀតណាមរងការរើសអើងពូជសាសន៍ និងរំលោភ សិទ្ធិមនុស្សយ៉ាងធ្ងន់ធ្ងរពីសំណាក់អាជ្ញាធរវៀតណាម ៕