Wednesday, 28 December 2011 12:02
ម៉ៃ ទិត្យថារ៉ា
The Phnom Penh Post
ព្រះសីហនុៈ អ្នកភូមិរងគ្រោះ បានអះអាងកាលពីថ្ងៃអង្គារថា ជនរងគ្រោះ ២២គ្រួសារ ដោយសារតែលោក Alexader Trofimov អតីតប្រធានក្រុមហ៊ុនវិនិយោគកោះពស់ ក្នុងរឿងរំលោភកុមារនៅកម្ពុជា បានបារម្ភអំពីសុវត្ថិភាពកូនៗពួកគេ បន្ទាប់ពីលោក Alexader ត្រូវដោះលែងពីពន្ធនាគារនាសប្តាហ៍មុន។
ម៉ៅ រិន វ័យ ១៧ ឆ្នាំ ជាឈ្មោះជនរងគ្រោះដែលសន្មតដាក់ឲ្យដែលត្រូវលោក Alexader Trofimov រំលោភនាង កាលនៅវ័យ៨-៩ឆ្នាំ បានឲ្យ ដឹងថា នាងបារម្ភ អំពីសុវត្ថិភាព បន្ទាប់ពីឮអំពីការដោះលែងបុរសម្នាក់នេះពីពន្ធនាគារ។ នាងនិយាយថា ៖ «នៅពេលដែលខ្ញុំទទួលដំណឹងនោះ ខ្ញុំនឹកឃើញអ្វីៗគ្រប់យ៉ាងដែលគាត់បានធ្វើមកលើរូបខ្ញុំ កាលពីខ្ញុំនៅវ័យក្មេង»។
នាងអះអាងថា នាងចង់ឲ្យអាជ្ញាធរឃុំខ្លួន លោក Alexander ក្នុងពន្ធនាគារមួយជីវិត ឬបណ្តេញគាត់ចេញពីប្រទេសកម្ពុជា ព្រោះនាងខ្លាចថា គាត់នឹងសងសឹកជាមួយមនុស្សដែលប្តឹងគាត់។ នាងថា ៖ «ខ្ញុំ មិនដឹងថា ត្រូវធ្វើយ៉ាងម៉េចទេ បើគាត់មកគំរាមកំហែងអាយុជីវិតគ្រួសារខ្ញុំ»។ នាងបន្តថា៖ «ខ្ញុំមិនអាចរកពាក្យអ្វីមកនិយាយបានទេ ជុំវិញរឿងគួរឲ្យរន្ធត់របស់ខ្ញុំ។ ជានិច្ចកាល ខ្ញុំតែងសុបិនឃើញរឿងរ៉ាវខ្ញុំកាលនៅពីក្មេង។ ខ្ញុំ ខ្លាចថា វានឹងកើតឡើងចំពោះខ្ញុំម្តងទៀត»។
នាងបន្ថែមថា ថ្មីៗនេះ នាងបានស្នើទៅអង្គការក្រៅរដ្ឋាភិបាលដែលធ្លាប់ជួយនាងឲ្យតាមឃ្លាំមើលក្រុមគ្រួសារនាងផង ចៀសវាងមានរឿងកើតឡើង។
រស់ សាសនា វ័យ ៤៧ ឆ្នាំ ជារហ្សសនាមដែលដាក់ឲ្យជាម្តាយជនរងគ្រោះ នៅខេត្តព្រះសីហនុបានថ្លែងថា អ្នកស្រីបារម្ភអំពីសុវត្ថិភាពកូន នៅពេលដែលទទួលដំណឹងថា ជនរុស្ស៊ីនេះត្រូវគេដោះលែងពីពន្ធនាគារ។ អ្នកស្រីថា ៖ «ខ្ញុំបារម្ភថាគាត់មិនបញ្ឈប់មារយាទអាក្រក់របស់គាត់ ហើយដើររុករានក្នុងខេត្ត ទៅលួងលោមឲ្យក្មេងៗ រួមភេទជាមួយគាត់ជាថ្មីទៀត»។ អ្នកស្រីបញ្ជាក់ថា គាត់បានប្រាប់កូនៗទាំងអស់ ត្រូវតែត្រឡប់មកផ្ទះភ្លាមបន្ទាប់ពីចេញពីសាលារៀន និងពីកន្លែងធ្វើការ។ អ្នកស្រីថា ៖ «ខ្ញុំ នៅចាំគាត់ នៅក្នុងខួរក្បាលរបស់ខ្ញុំ»។
អ្នកស្រីរំឭកថា នៅពេលដែលអ្នកស្រីប្តឹងទៅតុលាការ អំពីរឿងគាត់រួមភេទជាមួយកូនស្រី វ័យ៩ឆ្នាំ អ្នកស្រីមិនចាំថា គេកាត់ឲ្យគាត់ជាប់គុកប៉ុន្មានឆ្នាំទេ ប៉ុន្តែ នៅចាំថា កាលនោះគាត់ទទួលបានសំណង ៥ លានរៀល។
សែន សុខ វ័យ ៤០ឆ្នាំជាឈ្មោះ ដែលសន្មតដាក់ឲ្យជាម្តាយជនរងគ្រោះម្នាក់ដែរ អះអាងថា អ្នកស្រីបារម្ភអំពីសុវត្ថិភាពគ្រួសារ ពីព្រោះផ្ទះគាត់នៅតែកន្លែងដដែល ហើយថា ជនរុស្ស៊ីម្នាក់នេះស្គាល់ផ្ទះគាត់ច្បាស់ណាស់ ប៉ុន្តែ សំណាងត្រង់ថា កូនស្រីកំពុងសិក្សានៅភ្នំពេញជាមួយអង្គការក្រៅរដ្ឋាភិបាល។
លោក សំលៀង សិលា នាយក អង្គការសកម្មភាពដើម្បីកុមារ ប្រចាំប្រទេសកម្ពុជា បានថ្លែងថា បន្ទាប់ពីលោក Alexader Trofimov ត្រូវដោះលែងពីពន្ធនាគារ គ្រួសារជនរងគ្រោះ ៧នាក់ នៅខេត្តព្រះសីហនុ បារម្ភអំពីសុវត្ថិភាពពួកគេ ហើយបានស្នើឲ្យអង្គការក្រៅរដ្ឋាភិបាលជួយគាំពារពួកគេផង។
លោក តាក វណ្ណថា ស្នងការ នគរបាលខេត្តព្រះសីហនុ បាន ថ្លែងថា លោកឲ្យមន្ត្រីប៉ូលិសឃ្លាំមើលសកម្មភាព Alexader Trofimov តាំងពីគាត់ត្រូវបានដោះលែងកាលពីថ្ងៃទី២០ ខែធ្នូ ថ្មីៗនេះគាត់នៅតែក្នុងខេត្តព្រះសីហនុ ទីដែលលោកធ្លាប់នៅក្នុងសង្កាត់លេខ២ ហើយគាត់ បានប្រើរថយន្តឡិចស៊ីស ប៉ុន្តែ គាត់មិនមានទំនាក់ទំនងជាមួយក្រុមហ៊ុនវិនិយោគកោះពស់ទេ គាត់គ្រាន់តែបើកឡានជុំវិញក្រុងនេះ។ លោកថា៖ «យើងតាមដានសកម្មភាពគាត់ ថាតើគាត់ធ្វើដូចមុនឬយ៉ាងណា? ហើយថា គាត់នឹងធ្វើអ្វីទៀតទេ?»។
ជនបរទេសរំលោភកុមារបីនាក់ត្រូវបានគេដោះលែងពីពន្ធនាគារបន្ទាប់ពីទទួលបានការលើកលែងទោសពីព្រះមហាក្សត្រ៕ NR
Subscribe to:
Post Comments (Atom)
1 comment:
ហ៊ុនសែន ភ័យខ្លាំងខ្លាចចៅហ្វាយយួនផង ដែលមាន
ប្រទេសរុស្ស៊ីនៅពីក្រោយខ្នង ក៏បង្ខំចិត្តដោះលេងជន
ជាតិរស្ស៊ីត្រូវជាប់គុក១៧ឆ្នាំ ដោយបង្ខំព្រះមហាក្សត្រ
ចុះហត្ថលេខា ដើម្បីលើកលែងទោសឱ្យជនដ័ថោក
ទាបជាតិរុស្ស៊ីនោះ។
Post a Comment