 |
| គំនរឈើក្នុងព្រៃឡង់ដែលអ្នកភូមិរកឃើញហើយដុតចោល។ រូបថត សហការី |
Thursday, 08 March 2012 12:15
ម៉ៃ ទិត្យថារ៉ា
The Phnom Penh Post
កំពង់ធំៈសមាជិកបណ្តាញព្រៃឡង់ បានឲ្យដឹងពីម្សិលមិញថា លោកអ៊ុច សំអន អភិបាលរងខេត្តកំពង់ធំ បានគំរាមពួកគាត់ថា អាជ្ញាធរមិនទទួលខុសត្រូវឡើយ ប្រសិនបើអ្នកភូមិត្រូវគេលួចបាញ់ប្រហារពេលចូលរួមការពារតំបន់ ព្រៃឡង់។
លោក គឹម ចេង អាយុ ៥០ ឆ្នាំ ជាសមាជិកម្នាក់ នៃបណ្តាញព្រៃឡង់ បានថ្លែងថា អ្នកភូមិ នឹងមិនធ្វើតាមបង្គាប់ឲ្យនៅឆ្ងាយពីតំបន់ព្រៃឡង់របស់អាជ្ញាធរ ខេត្តទេ ហើយនឹងបន្តដើរល្បាត បង្ក្រាបអ្នកលួចកាប់បំផ្លាញព្រៃឈើខុសច្បាប់បន្តទៀត។ លោកបន្តថា៖ «លោក អ៊ុច សំអន បានគំរាមអ្នកភូមិ និងប្រាប់យើងថា យើងមិនត្រូវបានអនុញ្ញាតឲ្យដើរល្បាតព្រៃទៀតទេ។ ប្រហែលគាត់ឃុបឃិតជាមួយឈ្មួញដែលធ្វើការកាប់បំផ្លាញព្រៃឈើដោយ ខុសច្បាប់ហើយមើលទៅ បានជាគាត់ខ្លាចយើងដើរល្បាត ប៉ះពាល់ដល់ផលប្រយោជន៍គាត់»។
អ្នកភូមិបានអះអាងថា ជនល្មើសកាប់ឈើខុសច្បាប់ បានធ្វើការកាប់ផ្តួលឈើប្រណីតជាប្រចាំនៅក្នុងព្រៃ។
លោក គឹម ចេង បានថ្លែងថា អ្នកភូមិចង់ការពារព្រៃនេះ និងបញ្ឈប់ភាពអនាធិបតេយ្យ ប៉ុន្តែលោកអភិបាលរងខេត្តរូបនេះ បានបដិសេធមិនទទួលខុសត្រូវប្រសិនបើអ្នកភូមិត្រូវគេបាញ់ ប្រហារ ដោយសារតែបុព្វហេតុការពារព្រៃឈើនេះទៅវិញ។
លោកលើកឡើងថា៖«អ្វីដែលអាជ្ញាធរកំពុងធ្វើ វាហាក់បីដូចជាពួកគេបោះបង់ប្រជាជន និងព្រៃឈើ ដើម្បីការពារឈ្មួញ»។
លោក ឈាង វុទ្ធី តំណាងអ្នកភូមិម្នាក់ទៀត បានថ្លែងថា មេឃុំ អភិបាលស្រុក និងអភិបាលខេត្ត បានគំរាមកំហែងចាប់ខ្លួនអ្នកភូមិ ដែលប្រឆាំងនឹងបម្រាមនេះ។ លោកបញ្ជាក់ថា៖ «ពួកគេគិតគូរតែប្រយោជន៍ក្រុមហ៊ុន។ យើងគិតគូរពីព្រៃឈើ ដូច្នេះយើងនៅតែបន្តធ្វើសកម្មភាពរបស់យើងបន្តទៀត»។
កាលពីម្សិលមិញ លោក អ៊ុច សំអន បានបដិសេធ ការចោទប្រកាន់របស់អ្នកភូមិ ប៉ុន្តែបានថ្លែងថា អ្នកភូមិ បានចូលក្នុងព្រៃដើម្បីដុតដើមឈើកាប់ផ្តួលដោយក្រុមហ៊ុន ដែលបានទទួលអាជ្ញាប័ណ្ណ។
លោកថ្លែងថា៖ «ពីរលើកមកហើយ ដែលយើងបានហាមឃាត់ពួកគេ ព្រោះពួកគេ បានទៅដុតទ្រព្យសម្បត្តិរបស់ក្រុមហ៊ុន និងទ្រព្យសម្បត្តិរបស់អ្នកភូមិផ្សេងទៀត។ យើងត្រូវការពារព្រៃឈើក្រុមហ៊ុនដែលមានអាជ្ញាប័ណ្ណធ្វើការក្នុង ព្រៃនោះ និងអ្នកភូមិ»។
លោក ឈុត វុទ្ធី ប្រធានអង្គការការពារធនធានធម្មជាតិបានថ្លែងថា អាជ្ញាធរពុំបានធ្វើការដើម្បីការពារព្រៃឈើនិងប្រយោជន៍របស់ អ្នកភូមិទេ៕
No comments:
Post a Comment