ដោយ រដ្ឋា វីសាល
Radio Free Asia
មន្ត្រីពន្ធនាគារខេត្តមណ្ឌលគិរី មួយរូប ដែលបានឈរឈ្មោះជាបេក្ខជនបោះឆ្នោតតំណាងគណបក្ស សម រង្ស៊ី ចោទប្រធានអង្គភាពរបស់ខ្លួនថា បង្កបញ្ហារើសអើងគណបក្សនយោបាយ និងរំលោភច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំ/សង្កាត់។
បុគ្គលិកពន្ធនាគារខេត្តមណ្ឌលគិរី លោក សេង លី និងជាបេក្ខជនឈរឈ្មោះបោះឆ្នោតក្រុមប្រឹក្សាសង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី នៃគណបក្ស សម រង្ស៊ី មានប្រសាសន៍បញ្ជាក់ថា ប្រធានពន្ធនាគារខេត្ត គឺលោក អាន គឹមឡេង មិនព្រមចុះហត្ថលេខាលើលិខិតសុំច្បាប់ពិសេសសំរាប់លោកបានចូលរួមឃោសនាបោះឆ្នោតជ្រើសរើសក្រុមប្រឹក្សាឃុំ/សង្កាត់ អាណត្តិទី៣ ដែលនឹងប្រព្រឹត្តទៅចាប់ពីថ្ងៃទី១៨ ខែឧសភា ឆ្នាំ២០១២ នេះទេ។
លោកបន្តថា កាលពីថ្ងៃអង្គារ ទី១ ខែឧសភា និងនៅថ្ងៃពុធ ទី២ ខែឧសភា លោកបានដាក់ពាក្យស្នើសុំនេះពីរលើក ប៉ុន្តែប្រធាននៅតែមិនព្រមចុះហត្ថលេខា ដោយលើកហេតុផលថា ឯកសារសុំច្បាប់នោះមិនត្រឹមត្រូវ៖ «ម្សិលមិញហ្នឹងគាត់ថា ខុស ខ្ញុំទៅពិគ្រោះយោបល់ជាមួយ គ.ជ.ប. ហ្នឹង គ.ជ.ប. គេថា អត់ខុសទេ។ ដល់ពេលឲ្យទៅព្រឹកមិញទៀត គាត់ថា ខុសទៀតហើយ ខ្ញុំអត់យល់ខុស គ.ជ.ប. ក៏អត់យល់ខុសដែរ ហ្នឹងកន្លែងដែលខុសហ្នឹងណា!»។
ច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់មាត្រា៩៦ ចែងថា មន្ត្រីរាជការមានបំណងឈរឈ្មោះជាបេក្ខជនបោះឆ្នោត ត្រូវសុំច្បាប់ឈប់ពិសេសយ៉ាងតិច ៧ថ្ងៃ មុនបើកយុទ្ធនាការឃោសនាបោះឆ្នោត រហូតដល់ថ្ងៃប្រកាសលទ្ធផលនៃការបោះឆ្នោតជាផ្លូវការ។
ឆ្លើយតបសេចក្ដីចោទប្រកាន់នេះ ប្រធានពន្ធនាគារខេត្តមណ្ឌលគិរី លោក អាន គឹមឡុង មានប្រសាសន៍បញ្ជាក់ថា លោក សេង លី បានសុំច្បាប់ឈប់សំរាប់ឈរឈ្មោះជាបេក្ខជនបោះឆ្នោតក្រុមប្រឹក្សាឃុំ/សង្កាត់មែន ក៏ប៉ុន្តែលោកមិនបានភ្ជាប់ឯកសារដើមនៃបញ្ជីឈ្មោះបេក្ខជនទទួលស្គាល់ផ្លូវការពីគណៈកម្មាធិការជាតិរៀបចំការបោះឆ្នោត (គ.ជ.ប.)។
លោកបន្តថា នេះគឺជាបញ្ហារដ្ឋបាលដែលតម្រូវឲ្យបុគ្គលិកបង្ហាញឯកសារពាក់ព័ន្ធក្នុងហេតុផលសុំច្បាប់ឈប់ពិសេសនេះ៖ «គាត់ចង់ធ្វើអីឲ្យដូចចិត្តរបស់គាត់ ហើយគាត់ធ្វើស្អីគាត់អត់មានធ្វើខុសទេ គាត់ធ្វើត្រូវទាំងអស់។ បញ្ជីរាយនាមរបស់គណបក្សហ្នឹង វាត្រូវតែមានច្បាប់ដើមយកមកបង្ហាញឲ្យខ្ញុំ ដើម្បីខ្ញុំមានមូលដ្ឋាន ហើយខ្ញុំមានដកហូតច្បាប់ដើមរបស់គាត់ឯណា។ ឲ្យគាត់យកច្បាប់ដើមមកបង្ហាញខ្ញុំ ខ្ញុំយកកូពី (ថតចម្លង) ទុកឯកសាររបស់ខ្ញុំហើយ ដល់ពេលអ៊ីចឹងគាត់រាយការណ៍ថា ខ្ញុំហ្នឹងមិនអនុញ្ញាតច្បាប់ឲ្យគាត់»។
ប្រធានគណៈកម្មការរៀបចំការបោះឆ្នោតខេត្តមណ្ឌលគិរី គឺលោក ទី ឈឿន។ លោកបានបញ្ជាក់ថា បាតុភាពដែលកើតមាននេះ ទំនងដោយសារទំនាស់ពាក្យសំដីរវាងប្រធានអង្គភាព និងមន្ត្រីក្រោមឱវាទមិនស៊ីសង្វាក់គ្នា។ លោកបន្តថា លោកបានសម្របសម្រួលឲ្យមន្ត្រីរៀបចំការបោះឆ្នោតសង្កាត់ស្ពានមានជ័យ ធ្វើលិខិតជូនទៅប្រធានអង្គភាពពន្ធនាគារ ដើម្បីបញ្ជាក់ថា លោក សេង លី ពិតជាមានឈ្មោះក្នុងបញ្ជីបេក្ខជនផ្លូវការ ទទួលស្គាល់ដោយគណៈកម្មាធិការជាតិរៀបចំការបោះឆ្នោតមែន។
លោក ទី ឈឿន៖ «បេក្ខជនឈរឈ្មោះហ្នឹងនៅខ្ញុំក៏មានតែហ្វូតូទេ អត់មានអាច្បាប់ដើមទេ។ច្បាប់ដើមនៅ គ.ជ.ប. ហើយនិងនៅគណបក្ស។ ព្រឹកមិញបានប្រជុំការងារហ្នឹងហើយ ឲ្យធ្វើការងារហ្នឹងគឺត្រូវតែអនុញ្ញាតឲ្យគេតាមច្បាប់បោះឆ្នោត ហើយប្រសិនគាត់មិនឲ្យទៀត អាហ្នឹងតាមនីតិវិធីនៃច្បាប់»។
យ៉ាងនេះក្តី បេសកជនតំណាងគណបក្ស សម រង្ស៊ី ប្រចាំខេត្តមណ្ឌលគិរី លោក មាស ខេង មានប្រសាសន៍ចាត់ទុកសកម្មភាពរបស់ប្រធានពន្ធនាគារខេត្ត គឺមានចេតនាបំបាក់ស្មារតីសកម្មជនគាំទ្រគណបក្ស សម រង្ស៊ី នៅមូលដ្ឋាន។ លោកអំពាវនាវឲ្យ គ.ជ.ប. ត្រួតពិនិត្យ និងចាត់វិធានការកុំឲ្យកើតមានបញ្ហាដូចនេះតទៅទៀត៕
No comments:
Post a Comment