(ថ្ងៃទី 10 មិថុនា 2012, ម៉ោង 09:20:AM) | ដោយ: លីនណា
ភ្នំពេញ: តើអ្នកដឹងទេថា មួយសប្តាហ៍កន្លងទៅនេះមានរឿងប្លែកៗ និងរន្ឋត់មួយចំនួន ដែលខ្លះគួរអោយហួសចិត្ត ខ្លះគួរអោយចង់សើច និងខ្លះទៀតគួរអោយរន្ធត់។ ខាងក្រោមនេះជារឿងប្លែកៗ ឬគួរអោយរន្ធត់នាសប្តាហ៍កន្លងមក។
១. ជិះកង់មកប្លន់អ្នកលក់មាសទាំងថ្ងៃ ៖
ពិតជាគួរអោយហួសចិត្តមែន! ចោរប្រដាប់អាវុធមានគ្នាពីរនាក់ បានជិះកង់ពីរគ្រឿងមកប្លន់ស្ត្រីលក់មាស និងម៉ូតូឌុបមួយគ្រឿងទាំងថ្ងៃ ដោយប្រមូលយកមាស និងគ្រឿងប្លាទីនមួយកាបូប ប្រមាណ ៦០តម្លឹង និងម៉ូតូឌុបមួយគ្រឿង ខណៈដែលស្ត្រីនោះចេញពីលក់មាសនៅផ្សារលើធំថ្មី ខេត្តសៀមរាប ហើយជិះម៉ូតូឌុបចូលទៅផ្ទះ។ ហេតុការណ៍នេះ បានកើតឡើងនៅរសៀលថ្ងៃទី៤ ខែមិថុនា ឆ្នាំ២០១២ នៅមុខផ្សារលើធំថ្មី ក្នុងភូមិចុងកៅស៊ូ សង្កាត់ស្លក្រាម ក្រុង-ខេត្តសៀមរាប។ ករណីនេះ សមត្ថកិច្ចនៅមិនទាន់ចាប់បានចោរទាំងពីរនាក់នោះនៅឡើយទេ។
២. ក្រឡាប់រថយន្ដបណ្តាលអោយរបួស ២៣នាក់ ៖
មនុស្ស ប្រុសស្រី ៩នាក់ បានរងរបួសធ្ងន់ និង ១៤នាក់ទៀតរបួសស្រាល ដោយសាររថយន្ដក្រឡាប់បន្ទាប់ពីបែកកង់ក្រោយខាងឆ្វេង ពេលកំពុងបើកបរក្នុងល្បឿនយ៉ាងលឿន កាលពីវេលាម៉ោង ៩ និង ២០នាទី ព្រឹកថ្ងៃទី៤ ខែមិថុនា ឆ្នាំ២០១២ ស្ថិតនៅលើផ្លូវជាតិលេខ៣ ក្នុងភូមិយាយឡ ឃុំ-ស្រុកត្រាំកក់ ខេត្ដតាកែវ។ អ្នករងរបួសទាំងអស់ជាកម្មកររោងចក្រ ដោយពួកគេវិលត្រឡប់មកភ្នំពេញវិញ ក្រោយពីបានទៅបោះឆ្នោតនៅស្រុកកំណើត។
៣. កំពុងឈររួមរ័ក្ស ត្រូវចោរប្លន់ចាក់សម្លាប់ ៖
ពួកអ្នកចូលចិត្តរួមរ័ក្សនៅតាមវាល ចូរប្រយ័ត្នផង។ យុវជនម្នាក់ បានរងរបួសយ៉ាងធ្ងន់ធ្ងរ និងបានស្លាប់ក្រោយពីបញ្ជូនទៅដល់មន្ទីរពេទ្យ បន្ទាប់ពីយុវជនម្នាក់នេះនាំសង្សារទៅឈររួមរ័ក្សនៅកន្លែងស្ងាត់ ហើយត្រូវជនសង្ស័យមានគ្នាពីរនាក់មកចាក់ប្លន់យកម៉ូតូមួយគ្រឿង តែមិនបានសម្រេច កាលពីវេលាម៉ោង ១០ និង ៣០នាទី យប់ថ្ងៃទី៤ ខែមិថុនា ឆ្នាំ២០១២ នៅចំណុចព្រៃរបោះក្រោយកាស៊ីណូ ៥ជាន់ ស្ថិតក្នុងភូមិត្រពាំងផ្លុងទី១ ឃុំត្រពាំងផ្លុង ស្រុកពញាក្រែក ខេត្តកំពង់ចាម។
៤. បណ្ដាំសង្សារ ធ្វើអោយនារីក្រមុំម្នាក់ស្លាប់ ៖
យុវតី ម្នាក់អាយុ ១៨ឆ្នាំ រស់នៅភូមិបាយសី ឃុំស្ទឹងត្រង់ ស្រុកសាលាក្រៅ ខេត្តប៉ៃលិន បានស្លាប់ ដោយសារតែផឹកថ្នាំពុល បន្ទាប់ពីបានទទួបណ្តាំសង្សារ ដែលចង់ទៅធ្វើការនៅថៃ។ យុវតីនេះបានផឹកថ្នាំបាញ់ស្មៅអស់ជិតមួយលីត្រ ដើម្បីសម្លាប់ខ្លួនដែរ ព្រោះតែសង្សារបានសុំលាចេញទៅរកការងារធ្វើនៅប្រទេសថៃ ហើយផ្ដាំផ្ញើថា "ចាំបានក៏ចាំ ឬបើមានគេចង់បាន យកថ្មីទៅ"។ បណ្ដាំនេះបានធ្វើឲ្យយុវតីខាងលើសម្រេចចិត្តធ្វើអត្តឃាត បានសម្រេច។
៥. ពុលបន្លែ ៩៤នាក់ នៅស្រុកកំពង់រោទ៍ ខេត្តស្វាយរៀង ៖
ប្រជាពលរដ្ឋ នៅស្រុកកំពង់រោទ៍ចំនួន ៩៤នាក់ បានពុលបន្លែនៅក្នុងពេលដែលពួកគេទាំងនោះនាំគ្នាចូលរួមក្នុងពិធី ឡើងផ្ទះប្រជាពលរដ្ឋនៅក្នុងភូមិជាមួយគ្នា នៅភូមិព្រៃម្នាស់ ឃុំសំឡី ស្រុកកំពង់រោទ៍ ខេត្តស្វាយរៀង កាលពីល្ងាចថ្ងៃទី៥ ខែមិថុនា ឆ្នាំ២០១២។ បន្លែទាំងនោះ ពួកគាត់បានទិញពីផ្សារក្រមួន និងផ្សារតាមតំបន់ជនបទ ដែលនាំចូលពីប្រទេសវៀតណាម។ បន្លែនោះ គឺបានបាញ់ថ្នាំដើម្បីកុំឲ្យសត្វល្អិតបំផ្លាញ ប៉ុន្តែថ្នាំដែលបានបាញ់លើបន្លែដែលពលរដ្ឋហូបនោះ គឺមិនទាន់ដល់ពេលដែលប្រមូលផល ទើបបណ្តាលឲ្យមានពលរដ្ឋហូបហើយពុលតែម្តង។ ជាមួយករណីនេះ មិនមាននរណាម្នាក់មានគ្រោះថ្នាក់ដល់ស្លាប់ទេ។
៦. ត្រីបាឡែនមួយត្រូវបានរកឃើញស្លាប់នៅសមុទ្រខេត្តកំពត ៖
សាកសពត្រីបាឡែន ដ៏ធំមួយត្រូវបានប្រជាពលរដ្ឋប្រទះឃើញ កាលពីថ្ងៃទី៦ ខែមិថុនា ឆ្នាំ២០១២ នៅខេត្តកំពត។ គេមិនដឹង ពីមូលហេតុច្បាស់ អំពីការស្លាប់របស់ត្រីបាឡែននោះទេ។ ប៉ុន្តែវាពិតជាធ្វើអោយមានការភ្ញាក់ផ្អើលជាខ្លាំង។ ឥឡូវគេកំពុតែយកសំណាក ត្រីបាឡែននោះ ទៅពិនិត្យ នៅបរទេស៕
No comments:
Post a Comment