 |
| ឈ្មោះ សុខ ចក់ (រូបពាក់អាវគគី) និង បឿន សុខ (រូបពាក់អាវយឺតឆ្នូតពណ៌បៃតងចាស់)ដែលតាំងខ្លួនជាអាជ្ញាធរយកដីព្រៃរបស់ រដ្ឋ ទៅចែកឱ្យប្រជាជនកាន់កាប់នៅភូមិជប់រំដេង ឃុំកន្ទួត តែអាជ្ញាធរមិនបានចោទប្រកាន់នោះទេ ទុកឱ្យពួកគេកែខ្លួនចាប់ពីពេលនេះតទៅ |
 |
| Land title distributed to the villagers |
ថ្ងៃទី 19 មិថុនា 2012
ដោយ: បាយ័ន
Cambodia Express News
Synopsis: Two men in Siem Reap have decided to establish an independent committee to distribute state forest land to villagers. The pair decided to distributed plots measuring 150 by 300-meter to each villager in exchange for a minimal sum of 1,500 riels ($0.38) to cover for their gas fee to travel from one place to another. The pair issued land title to the villagers, but the title prohibits the villagers from re-selling their properties. With Cambodia currently plagued by government forced evictions, the pair could be seen as modern day’s Robin Hood: taking away from the robbers (Hun Xen’s government) and giving them to the poor. The authority does not agree with their actions, but it does not take any action against the pair either.
សៀមរាប: គណៈកម្មាការមួយ បានត្រូវបានគេរកឃើញថា បានតាំងខ្លួនឯងជាអាជ្ញាធរដែនដី ហើយវាស់ដីព្រៃរបស់រដ្ឋ ចែកជូនប្រជាពលរដ្ឋគ្រប់គ្រង ហើយថែមទាំងបានចេញលិខិតបញ្ជាក់ ទទួលស្គាល់ថា ដីនោះ ជាកម្មសិទ្ធិ ដែលគណៈកម្មាការមួយនេះ ថែមទៀតផង។
ការរកឃើញនេះ គឺបញ្ជាក់ឱ្យដឹង នៅព្រឹកថ្ងៃទី១៩ ខែមិថុនា ឆ្នាំ២០១២នេះ ស្ថិតនៅតំបន់ភូមិជប់រំដេង ឃុំកន្ទួត ស្រុកស្វាយលើ ខេត្ដសៀមរាប ខណៈពេល ដែលលោក ស៊ូ ភិរិន្ទ និងលោក សៀង ណាំ ចុះទៅឃ្វាលដីពីក្រុមហ៊ុន អ៊ិចសែល ខាស់ថើ ផ្លេនថេសសិន ជូនប្រជាពលរដ្ឋចំនួន ២ភូមិ ដែលរស់នៅក្នុងឃុំកន្ទួតខាងលើ។
យោងតាមប័ណ្ណសំគាល់សិទ្ធិដីកម្មសិទ្ធិ ដែលចេញដោយគណៈកម្មការខាងលើ បានបញ្ជាក់ថា គណៈកម្មាការមួយនេះ មានឈ្មោះថា "តំបន់អភិវឌ្ឍន៍ដីរលំរុនថ្មី ជប់រំដេញ" ( តាមពិតជប់រំដេង) ដែលមានទីតាំងស្ថិតនៅឃុំស្រែណូយ ប៉ុន្ដែតំបន់ខាងលើ ស្ថិតនៅឃុំកន្ទួត ស្រុកស្វាយលើ ឯណោះវិញទេ។
យោងតាមប័ណ្ណសំគាល់កាន់កាប់សិទ្ធិដីធ្លី បញ្ជាក់ទៀតថា គឺមានឈ្មោះ សុខ ចក់ ជាប្រធានក្រុម ទទួលខុសត្រូវ វាស់វែងដីឡូត៍តំបន់អភិវឌ្ឍន៍ដីរលំរុនថ្មី ជប់រំដេង និងមានឈ្មោះ បឿន សុខ ជាប្រធានគណៈកម្មការរៀបចំតំបន់អភិវឌ្ឍន៍ដីរលំរុនថ្មី ជប់រំដេង។
តាមការបញ្ជាក់ឱ្យដឹងពីឈ្មោះ សុខ ចក់ ជាប្រធានក្រុមទទួលខុសត្រូវវាស់វែងដីឡូត៍តំបន់អភិវឌ្ឍន៍ខាងលើ បានឱ្យដឹងថា រូបគាត់ បានធ្វើតាមបញ្ជាពីប្រធាន ឈ្មោះ បឿន សុខ និងមនុស្ស នៅពីក្រោយមួយចំនួនទៀត។ ប្លង់កម្មសិទ្ធិ ដែលលោកវាស់វែងចេញឱ្យប្រជាពលរដ្ឋកាន់កាប់ដីធ្លី គឺមានចំនួន ១០០ ប្លង់ដី រួចមកហើយ។ ដោយមួយប្លង់ៗមាន ក្បាលដី ៤០ ម៉ែត្រ គុណ ១៥០ ម៉ែត្រ ដែលជាដីភូមិ។
ដោយឡែកប្លង់កម្មសិទ្ធិដីស្រែ គឺមានទំហំធំជាងនេះ ប៉ុន្ដែក្នុងប្លង់ និមួយៗមិនបានបញ្ជាក់ពីទំហំដីពិតប្រាកដឡើយ ដោយគ្រាន់តែយករូបថតប្រជាជន ដែលជាម្ចាស់ដីមកបិទ ហើយចុះហត្ថលេខាបញ្ជាក់ពីឈ្មោះ សុខ ចក់ និងឈ្មោះ បឿន សុខ ជាការស្រេច។
អ្វីដែលក្នុងលិខិតនោះ បានបញ្ជាក់ថា ការបញ្ជាក់ផ្ដល់ដីកម្មសិទ្ធិ ជូនប្រជាពលរដ្ឋ ពីគណៈកម្មាការខាងលើ មានន័យថា ស្របច្បាប់ ប៉ុន្ដែលិខិតក៏បានបញ្ជាក់ថា ប្រជាជនមិនអាចធ្វើការលក់ដូរបានឡើយ ហើយការលក់ដូរជាការខុសច្បាប់ទៅវិញ។
ឈ្មោះទាំងពីរ នាពេលកន្លងមក ត្រូវបាននគរបាលស្រុកស្វាយលើ បានរៀបចំកសាងសំណុំរឿងប្រទាក់ក្រឡាខ្លះៗ រួចមកហើយ ប៉ុន្ដែមិនបានចាត់ការនោះឡើយ ព្រោះថា ជនទាំងពីរ គឺជាមនុស្សដែលតាំងខ្លួន ជាអាជ្ញាធរស្វ័យមួយ ឬជារដ្ឋមួយ ព្រោះថាគេមានសិទ្ធិយកដីរដ្ឋ ទៅចែកឱ្យប្រជាជនកាន់កាប់ធ្វើជាកម្មសិទ្ធិ។
អាជ្ញាធរស្រុកស្វាយលើ បានបញ្ជាក់ថា ឈ្មោះ បឿន សុខ ដែលជាប្រធាន គឺជាមនុស្សកន្លងមកធ្លាប់រស់នៅ ឯស្រុកគាស់ក្រឡ ខេត្ដបាត់ដំបងឯណោះ។ ប៉ុន្ដែនៅពេលកន្លងមក ឈ្មោះនេះ បានលួចគោយន្ដអ្នកស្រុកទៅកប់ដី ហើយអាជ្ញាធរធ្វើការតាមចាប់ខ្លួនក៏គេចខ្លួនមករស់នៅតំបន់ខាងលើ ហើយជននេះ មកតាំងខ្លួនជាអាជ្ញាធរឯករាជ្យមួយ ហើយក៏ផ្ដើមវាស់វែងដីរបស់រដ្ឋ ចែកជូនប្រជាជន នៅខេត្ដសៀមរាបទៅវិញ។
ឈ្មោះ សុខ ចក់ ខាងលើក៏បានបញ្ជាក់ដែរថា រូបគាត់ការវាស់វែងដីរដ្ឋ ចែកឱ្យប្រជាជនគឺមិនបានទទួលប្រាក់កំរៃ ធំដុំអ្វីនោះទេ គឺដីមួយប្លង់ៗពេលដែលចេញប័ណ្ណជូនប្រជាពលរដ្ឋ ហើយពួកគាត់ឱ្យប្រាក់យ៉ាងច្រើន ៥.០០០ រៀល ដើម្បីជិះម៉ូតូដើរធ្វើការ គ្មានអ្វីលើសពីនោះឡើយ។
អ្នកស្រុកបាននិយាយថា កន្លងមកឈ្មោះ បឿន សុខ ពេលដែលមេភូមិ ប្រគល់ដីប្រវែង ១៥០ ម៉ែត្រ គុណនឹង ៣០០ ម៉ែត្រ ធ្វើការកសាងសាលារៀនមួយខ្នង ហើយសាលាបានឱ្យសិស្សចូលរៀនរួចហើយ ស្រាប់តែឈ្មោះ បឿន សុខ រូបនោះ រុះសាលាចោល ហើយក៏យកដីនោះ លក់ទៅឱ្យប្រជាជនចំនួន ៥ គ្រួសារ រហូតមកដល់បច្ចុប្បន្ន។ ក្រោយពីអត់សាលារៀន ប្រជាជនបានកសាងសាលារៀនមួយខ្នងថ្មីទៀត ហើយឱ្យសិស្សចូលរៀននាពេលបច្ចុប្បន្ននេះ។
ប្រជាជននិយាយថា ការលក់សាលារៀន មិនដឹងបានចំនួនប៉ុន្មានឡើយ តែគាត់សំណូមពរឱ្យអាជ្ញាធរ ដកហូតដីសាលារៀន ប្រគល់ជូនសម្បត្ដិរួមវិញ។
ចំពោះករណីនេះដែរ លោកឧកញ៉ា សៀង ណាំ អ្នកតំណាងរាស្ដ្រមណ្ឌលសៀមរាប បានយកលិខិត ដែលចេញដោយមនុស្សពីរនាក់ខាងលើ មកប្រាប់ប្រជាជនរបស់លោកថា អ្នកដែលតាំងខ្លួនជាអាជ្ញាធរ ហើយយកដីរដ្ឋ ទៅចែកឱ្យប្រជាជន គឺជាអំពើខុសច្បាប់។
លោកឧកញ៉ា សៀង ណាំ បានបន្ដទៀតថា ដោយឡែកប្រជាជនខ្លួនឯង ក៏មិនត្រូវទទួលយកលិខិតកាន់កាប់ដី ដែលចេញដោយមនុស្សពីរនាក់នោះ មកប្រើឡើយ ព្រោះថា លិខិតកាន់កាប់ដី មិនអាចយកមកប្រើប្រាស់បានឡើយ ព្រោះថា ឈ្មោះទាំងពីរនាក់ខាងលើ មិនមែនជាជំនាញ ឬអាជ្ញាធរខេត្ដ ដែលជាអ្នកចេញប័ណ្ណកម្មសិទ្ធិស្របច្បាប់ ជូនប្រជាជននោះឡើយ។
លោកឧកញ៉ា បានបន្ថែមថា ការដែលមានសិទ្ធិផ្ដល់ប័ណ្ណកម្មសិទ្ធិនៅក្នុងខេត្ដសៀមរាប គឺមានតែអាជ្ញាធរខេត្ដតែមួយប៉ុណ្ណោះ។
ដោយឡែកលោក ស៊ូ ភិរិន្ទ អភិបាលខេត្ដសៀមរាប ក៏បានថ្លែងបញ្ជាក់ថា លោកពីរនាក់ខាងលើ កុំចង់តាំងខ្លួនជា រដ្ឋមួយ ព្រោះវាប្រឈមមុខទៅនឹងផ្លូវច្បាប់រួចទៅហើយ។ តែលោកក៏បានប្រាប់ទៅឈ្មោះទាំងពីរនាក់ខាងលើថា អាជ្ញាធរ ខេត្ដមិនយកទោសពៃអ្វីឡើយ គឺសុំឱ្យអ្នកទាំងពីរនាក់ កែខ្លួនចាប់ពីពេលនេះតទៅ។
លោក ស៊ូ ភិរិន្ទ បានបន្ដទៀតថា ក្នុងករណីអ្នកទាំងពីរ នៅតែប្រព្រឹត្ដផ្ទុយទៅនិងច្បាប់ គឺអាជ្ញាធរមានសមត្ថកិច្ច មានសិទ្ធិអនុវត្ដទៅតាមផ្លូវច្បាប់ ហើយពួកគេអាចប្រឈមទៅនឹងផ្លូវច្បាប់ជាធរមានថែមទៀតផង៕
No comments:
Post a Comment