Rong Chhun speaking at Tai Yang factory (PPP)ដោយ. ឆាំ ឆានី ០៤ កក្កដា ២០១២
កូដកម្មបិទផ្លូវជាតិលេខបួនជាង៥ម៉ោងនៅថ្ងៃទី៤ ខែកក្កដា ឆ្នាំ២០១២ របស់កម្មកររោងចក្រកាត់ដេរ តៃយៀន ប្រមាណ ៤.០០០ នាក់ ត្រូវបានរំសាយបន្ទាប់ពីមានការសន្យាពីមន្ត្រីក្រសួងការងារ លោកអនុរដ្ឋលេខាធិការ សាត សាមុត ។
លោក រ៉ុង ឈុន ប្រធានសហព័ន្ធសហជីពកម្ពុជា បានឲ្យដឹងតាមទូរសព្ទ័មកថា កម្មករបានដកថយមកធ្វើកូដកម្មនៅមុខរោងចក្រវិញ បន្ទាប់ពីមានការសន្យានេះ ព្រោះកម្មករក៏មិនចង់ទៅធ្វើកូដកម្មបិទផ្លូវជាតិនោះទេ តែនេះបណ្តាលមកពីភាគីរោងចក្របានចាក់លំឡេងរំពងរំខានដល់ការជួបជុំរបស់កម្មករ ។
លោកមានប្រសាសន៍ថា សហជីពនិងកម្មកររង់ចាំមើលដំណោះស្រាយ តែបើមិនមានដំណោះស្រាយជាផ្លូវការ លោកនឹងដឹកនាំកម្មករដើរហែរក្បួនចូលរាជធានីភ្នំពេញនៅថ្ងៃស្អែក។
ឆ្លើយតបនិងសំនួរស្តីពីការប៉ុនប៉ងចាប់ខ្លួនលោក ពីសំណាក់អាជ្ញាធរប៉ូលីសស្រុកអង្គស្នួល និងប៉ូលីសខេត្តកណ្តាល លោក រ៉ុង ឈុន បានបញ្ជាក់ថា ការចាប់ខ្លួនលោកមិនសំខាន់ទេ រឿងដែលសំខាន់គឺភាគីរោងចក្រនិងក្រសួងពាក់ពន្ធ័ត្រូវដោះស្រាយជូនកម្មករតាមលក្ឋន្ឋ័ការងារ ។
លោក បន្ថែមថា នៅថ្ងៃទី៥ ខែកក្កដា ឆ្នាំ២០១២ លោកនឹងដឹកនាំកម្មករដើរហែក្បួន ចេញពីរោងចក្រកាត់ដេរ តៃយៀន ទៅកាន់ ការិយាល័យ ផ្ទះសម្តេចនាយករដ្ឋមន្ត្រី ហ៊ុន សែន ស្ថានទូតអាមេរិក និងសហគមន៍អឺរ៉ុប ដើម្បីស្វែងរកអន្តរាគមន៍៕
No comments:
Post a Comment