ម្សិលវ៉ៃគ្នា ថ្ងៃនេះហូបជុំគ្នា ស្អែកស៊ីសាច់ហុតឈាមគ្នា

លោក សៅ រ៉ានី ហូបបាយជុំគ្នា ជាមួយ លោក អានន្ទ ដាយ៉ាត បង្ហាញពីទំនាក់ ទំនងដ៏ ល្អ

Tuesday, 14 August 2012
ដោយ ៖ ស៊ន សុភក្ដ្រ
DAP-News

ភ្នំពេញ ៖ ក្រោយពីបញ្ចប់ ជម្លោះនយោ បាយផ្ទៃក្នុង របស់គណបក្ស នរោត្ដមរណឫទ្ធិ រវាងសម្ដេចក្រុមព្រះ នរោត្ដមរណឫទ្ធិ និង អ្នកគាំទ្ររបស់ ព្រះអង្គ ជាមួយលោក សៅ រ៉ានី បច្ចុប្បន្នជាប្រធានស្ដីទី គណបក្សរាជា និយមមួយនេះ រួចមក មន្ដ្រីជាន់ខ្ពស់នៃគូ ជម្លោះទាំងពីរនេះ បានហូបបាយ ថ្ងៃត្រង់ជុំ គ្នា ដើម្បីបង្ហាញនិង បង្កើតទំនាក់ទំនងដ៏ល្អ ឡើងវិញ ក្នុងគោលបំណងបញ្ចប់រាល់បញ្ហា ដែលកើតមានឡើងនាពេលកន្លងទៅ។

ពិធីហូបបាយថ្ងៃត្រង់រវាងលោកសៅ រ៉ានី អតីតអគ្គលេខាធិការនិងទើបក្លាយជា ប្រធានស្ដីទីគណបក្ស នរោត្ដមរណឫទ្ធិ និង ជំនួយការផ្ទាល់ របស់សម្ដេចក្រុមព្រះ គឺលោក អានន្ទ ដាយ៉ាត បានធ្វើឡើងនៅភោជនីយ ដ្ឋានទន្លេបាសាក់ ក្នុងទឹកដីខណ្ឌចំការមន នារសៀលថ្ងៃត្រង់ ទី១៤ ខែសីហា ឆ្នាំ២០១២នេះក្នុងនោះអម ដោយ វត្ដមាន របស់លោកសយ សុភាព អគ្គនាយកមជ្ឈ មណ្ឌលព័ត៌មានដើមអម្ពិល ដែលជាអ្នកបានដើរ តួនាទី ក្នុងការ សម្របសម្រួល ឈានទៅរកការបញ្ចប់ជម្លោះផ្ទៃក្នុងនៃគណបក្សរាជានិយមមួយនេះ ។


មន្ដ្រីជាន់ខ្ពស់រួមទាំងលោកសយ សុភាពបានថតរូបទុកជាអនុស្សាវរីយ៍ក្រោយពីបញ្ចប់ នៃការហូបបាយថ្ងៃត្រង់ រួមគ្នា។

គួររំលឹកបន្ដិចថា ជម្លោះហែកហួរផ្ទៃក្នុង របស់គណបក្សនរោត្ដមរណឫទ្ធិ ដែលឈាន ទៅដល់ការដាក់ពាក្យ បណ្ដឹងទៅសាលាដំបូង រាជធានីភ្នំពេញ បានបញ្ចប់ទៅហើយ ក្រោយពីសម្ដេចក្រុមព្រះនរោត្ដមរណឫទ្ធិ បាន ប្រកាសឈប់ធ្វើនយោបាយតទៅទៀត កាលពីថ្ងៃទី១០ ខែសីហា ឆ្នាំ២០១២ កន្លងទៅនេះ បន្ទាប់មក ជាការ បើកផ្លូវមួយឱ្យលោកសៅ រ៉ានី បានទៅដកពាក្យបណ្ដឹងនៅតុលាការ កាលពីរសៀលថ្ងៃទី១៣ ខែសីហា ដើម្បី បញ្ចប់ ជម្លោះផ្ទៃក្នុងបក្សមួយនេះ ជាស្ថាពរ ៕