ចលនាប្រជាធិបតេយ្យដើម្បីសង្រ្គោះជាតិបានធ្វើឲ្យ ហ៊ុន សែន ភ័យខ្លាចរហូតដល់ហាមមន្រ្តីស្និទ្ធមិនឲ្យចាកចេញពីប្រទេស

(លោកប្រធាន​សម រង្ស៊ី​ និង លោក កឹម សុខា ក្នុងជំនួបបង្រួបបង្រួមនៅក្រុងម៉ានីល)

(បុរសខ្លាំងក្លែងក្លាយ ហ៊ុន សែន)

ដោយ ប៉ាងសុខឿន

ថ្ងៃទី១ ខែសីហា ឆ្នាំ២០១២

ជាសុឆន្ទៈដើម្បីស្រោចស្រង់ជាតិមេដឹកនាំបក្សប្រឆាំងធំពីរបានសម្រេចចិត្តរួបរួមគ្នាជាបក្សតែមួយដែលពេលនេះបានដំណើរការក្រោមផ្លាកចលនាប្រជាធិបតេយ្យដើម្បីសង្រ្គោះជាតិដើម្បីផ្តួលរំលំរបបផ្តាច់ការក្រុងភ្នំពេញដឹកនាំដោយលោក ហ៊ុន សែន។ចលនានេះត្រូវបានប្រជាជនខ្មែរទាំងក្នុង និងក្រៅប្រទេសសំដែងការគាំទ្រយ៉ាងផុលផុស។ 

ជាសក្ខីភាពនៃការគាំទ្រនេះយើងឃើញថាប្រជាជននៅក្នុងស្រុកបានមកចូលរួមវេទិការសាធារណៈរបស់បក្សកាន់តែមានចំនួនកើនឡើងរីឯនៅក្រៅប្រទេស នៅពេលដែលប្រជាជនបានដំណឹង ថាលោកប្រធាន សម រង្ស៊ីនិងលោក កឹម សុខានឹងមកចូលរួមកម្មវិធីបុណ្យខ្មែរ​កម្ពុជា ក្រោម នៅកាណាដា គឹបងប្អូនខ្មែរមានចំនួនជាច្រើនបានជូនដំណឹងថា នឹងមកចូលរួមដើម្បីអបអរ ចំពោះ ការរួបរួមគ្នានេះ។ក្រៅពីនេះក៏មានការសំដែងទឹកចិត្តគាំទ្រពីមាត់មួយទៅមាត់ មួយគ្រប់ទីកន្លែង​ទាំងក្នុងប្រទេសនិងក្រៅប្រទេសរហូតដល់មានអង្គការខ្លះចេញសេចក្តីថ្លែងការណ៍កគាំទ្រថែមទៀត។ ជាពិសេសនៅក្នុងបណ្តាញទំនាក់ទំនងសង្គមហ្វេសប៊ុកផងដែរ ដែលនៅទីនោះប្រជាជនខ្មែរ​បានបង្ហាញការគាំទ្រយ៉ាងពេញទំហឹងនិងសកម្មបំផុត។ 

ឆ្លើយតបនឹងបញ្ហានេះ គេបានឃើញមន្រ្តីរដ្ឋាភិបាល បានបញ្ចេញប្រត្តិកម្មជាបន្តបន្ទាប់ រហូត ដល់លោក ហ៊ុន សែន ដោយពួកគេនិយាយដូចគ្នាថាមិនខ្លាចសម្ព័ន្ធភាពនេះទេ។ ជាក់ស្តែង លោក ហ៊ុន សែន បាននិយាយនៅ ថ្ងៃទី១ ខែសីហានេះក្នុងពិធីចែកសញ្ញាប័ត្រដល់និស្សិត សាកលវិទ្យា ល័យច្បាប់ថាបក្សប្រជាជនមិនខ្លាចទេ។ លោកថ្លែងថា៖« អាងអីថា គណបក្សប្រជាជនខ្លាច  ចាំតើ​អាពៅ»។ 

ផ្ទុយទៅវិញគេសង្កេតឃើញថាបក្សប្រជាជនពិតជាមានការព្រួយបារម្មណ៍យ៉ាងខ្លាំងមែនចំពោះចលនាបង្រួបបង្រួមគ្នារបស់បក្សប្រឆាំងនេះដែលស្តែងចេញតាមសកម្មភាពផ្សេងៗដូចជាមានការបង្កើតកម្មវិធីថ្មីពិភាក្សានយោបាយតាមទូរទស្សន៍ដែលគេហៅថាកម្មវិធី "អាចារ្យតែថាំ"​បន្ថែមទៅលើ​កម្មវិធីផ្សេងៗទៀតមានពីមុនមកសម្រាប់វាយប្រហារចលនាបង្រួបបង្រួមគ្នាថ្មីនេះជាចំបង។ក្រៅពី​នេះគេឃើញមានសកម្មភាពមន្រ្តីបក្សប្រជាជនចុះទៅជួបប្រជាជនមានការកើនឡើងយ៉ាងគំហុកក្នុងខែនេះបើតាមរបាយការណ៍របស់អង្គការខុមហ្វ្រែលដែលពីមុនមកមិនដែលមាន។តែអ្វីដែល​ចំឡែកតាមពត៌មានពីមន្រ្តីជាន់ខ្ពស់បក្សប្រជាជនម្នាក់ស្និទ្ធនឹងលោក ហ៊ុន សែន​ សុំមិនឲ្យ​បញ្ចេញ​ឈ្មោះ​បាន​បង្ហើបឲ្យដឹងថា ចាប់តាំងពីមាននយោបាយបង្រួបបង្រួមគ្នារបស់បក្សប្រឆាំងទាំងពីរមក លោក ហ៊ុន សែន ពិតជាមានការព្រួយបារម្មណ៍ជាពន់ពេក ហើយវិធានការចុងក្រោយមួយ​ដែល​មិននឹកស្មានដល់គឺលោក ហ៊ុន សែន បាន ចេញបម្រាមផ្ទៃក្នុងបក្សដោយមិនអនុញ្ញាតិ​ឲ្យមន្រ្តី​ស្និទ្ធនឹងខ្លួន ឬថ្នាក់ដឹកនាំសំខាន់ៗមកលេងក្រៅស្រុក សួរសុខទុក្ខក្រុមគ្រួសារ សាច់ញាតិ​ដូចសព្វដងទេ ដោយខ្លាចពួកគេក្បត់ និងមិនវិលត្រលប់មកវិញ ឬឆ្លៀតជួបជាមួយលោក សម រង្ស៊ី ជាមេដឹកនាំចលនានេះ ដោយវៀរលើកលែងតែពួកគេមានភារកិច្ចផ្លូវការមិនអាចជៀសវាងបាន។  

ជាការពិតចលនានេះពិតជាបាននាំក្តីកង្វល់ដល់លោក ហ៊ុន សែន មែនព្រោះវាបាននាំ សេចក្តី សង្ឃឹមថ្មីដល់ប្រជាជនខ្មែរយ៉ាងពិតៗ។ វាពិតជាកំលាំងមួយ អាចនឹងយកឈ្នះបក្សប្រជាជន បានដោយប្រសិទ្ធិភាពពោលគឺ៖ ១) សំលេងបក្សទាំងពីររួមគ្នានឹងកើនកំលាំងឡើងទ្វេរដង, ២) អ្នកដែលមិនចង់បោះឆ្នោតពីមុននឹងមកបោះគាំទ្រដោយឃើញការបង្រួបបង្រួមគ្នានេះ, ៣) អ្នកដែលដែលស្រឡាញ់បក្សទាំងពីរហើយមិនបោះឆ្នោតឲ្យពីមុនមកដោយពិបាកជ្រើសរើសក៏នឹងបោះឲ្យដែរព្រោះពេលនេះជាបក្សតែមួយ, ៤)សមាជិកបក្សប្រជាជនមួយចំនួនក៏នឹងបោះឲ្យដែរ​ដោយ​យើងគិតថា ពួកគេមួយចំនួនពិតជាស្រឡាញ់ជាតិ និងចង់បានមេដឹកនាំថ្មីមានសមត្ថភាព​ពិតផងដែរហើយពេលនេះគឺពិតជាពេលវេលាមួយដ៏ត្រឹមត្រូវ។ លើសពីនេះទៀតបើសិនជាមាន​ការធ្វើកំណែទំរង់គ.ជ.ប. ទៅជាស្ថាប័នឯករាជ្យពិតមែន បក្សប្រជាជនរបស់លោក ហ៊ុន សែន នឹង​បរាជ័យយ៉ាងពិតប្រាកដ។ 

ជារួមចំណុចទាំងនេះហើយដែល លោក ហ៊ុន កំពុងតែព្រួយបារម្មណ៍ព្រោះលោ ហ៊ុន សែនដឹងថា មន្រ្តីស្និទ្ធជុំវិញខ្លួនទាំងអស់នោះ មិនមែនស្រឡាញ់ការដឹកនាំរបស់ លោកដោយចិត្ត ស្មោះនោះទេ តែពួកគេភាគច្រើនស្រលាញ់បុណ្យស័ក្កិនិងលាភសក្ការៈតែប៉ុណ្ណោះ ដែលពួក គេអាចក្បត់លោក​គ្រប់ពេលវេលាបាន។