ក្រុម​អ្នក​ភូមិ​បឹងកក់ និង​បុរី​កីឡា បោះ​តង់ ដេក​តវ៉ានៅមុខ​ស្ថានទូត​អាមេរិក​

អ្នកស្រី ទេព វ​ន្នី ក៏បាន​លើកឡើង​បញ្ជាក់​ជាថ្មីទៀតអំពី​គោលបំណង​នៃ​ការតវ៉ា​របស់​អ្នក​ភូមិ​ បឹងកក់ គឺ​ទី​១-​អ្នកភូមិទាមទារ​ឲ្យមាន​ការបោះ​ព្រំដី ទំហំ ១២,៤៤ ហិកតា ដែល​រាជរដ្ឋាភិបាលសម្រេច​កាត់​ចេញ​ពី​គម្រោង​អភិវឌ្ឍ​ន៍​បឹងកក់ ១៣៣ ហិកតា ឲ្យបាន​ច្បាស់លាស់​។ ទី​២-​សុំឲ្យ​មាន​ការផ្តល់​ប្លង់​កម្មសិទ្ធិ ជូន​ដល់​ប្រជាពលរដ្ឋ ៦៤ គ្រួសារ ដែល​មិន​ទាន់​បាន​ប្លង់ ហើយ​ត្រូវបាន​គេ​កាត់​ចេញពី​ដី ១២,៤៤ ហិកតា ដោយ​អយុត្តិធម៌​។ ទី​៣-​សុំឲ្យ​ដក​ឈ្មោះ លោក ឡាវ ម៉េង​ឃិន ( សមាជិក​ព្រឹទ្ធសភា និង​ជា​ម្ចាស់​គម្រោង​អភិវឌ្ឍន៍​បឹងកក់ ) ចេញពី​ដី ១២,៤៤ ហិកតា ដែល​គាត់​មិនមែន​ជា​ប្រជាពលរដ្ឋអ្នករស់នៅ​បឹង​កក់ តែ​គាត់​ជា​ប្រធាន​ក្រុមហ៊ុន ស៊ូ​កា​គូ​អ៊ិន ដូច្នេះ​គាត់​មិន​មាន​សិទ្ធិទទួល​យក​ដី​នោះពី​ប្រជាពលរដ្ឋ​បានទេ​។ 

(ថ្ងៃទី 9 វិច្ឆិកា 2012, ម៉ោង 10:30:AM) | ដោយ: លី សិលhttp://www.cen.com.kh

ភ្នំពេញ: ស្ត្រី​ក្រុម​អ្នក​ភូមិ​បឹងកក់ និង​បុរី​កីឡា បាន​ប្រមូលផ្តុំ​គ្នា បោះ​តង់ដេក​តវ៉ាទាំងយប់ និង​ទាំង​ថ្ងៃ នៅមុខ​ស្ថានទូត​សហរដ្ឋអាមេរិក ជិត​វត្តភ្នំ ក្នុង​រាជធានី​ភ្នំពេញ ដើម្បី​ស្វែងរក​អន្តរាគមន៍​ពី​ប្រមុខ​ដឹកនាំ​ប្រទេស​មហាអំណាច សហរដ្ឋអាមេរិក លោក អូ​បា​ម៉ា ជុំវិញ​បញ្ហា​ជម្លោះ​ដីធ្លី​ដ៏​រ៉ាំរ៉ៃ នៅ​តំបន់​បឹងកក់ និង​តំបន់​បុរី​កីឡា​។​

​ក្រុមអ្នកតវ៉ា ដែល​ជា​ស្ត្រី និង​កុមារ បាន​បោះ​តង់នៅ​លើ​សួនច្បារមុខ​ស្ថានទូត​អាមេរិក ចាប់​តាំងពី​យប់​ថ្ងៃ​ទី​៧ ខែវិច្ឆិកា ឆ្នាំ​២០១២ ខណៈ​ដែល​សហរដ្ឋអាមេរិក ប្រកាស​លទ្ធផល​បោះឆ្នោត ដែល​បង្ហាញ​ថា លោក បា​រ៉ាក់ អូ​បា​ម៉ា បាន​ជាប់ឆ្នោតបន្ត​ធ្វើ​ជា​ប្រធានាធិបតី​សហរដ្ឋអាមេរិក មួយ​អាណត្តិ​ទៀត រយៈពេល ៤ ឆ្នាំ​។​

​អ្នកស្រី ទេព វ​ន្នី តំណាង​សហគមន៍​បឹងកក់ បាន​ប្រាប់​វិទ្យុ​បារាំង អន្តរជាតិ ក្នុង​បទសម្ភាសន៍ ចាក់ផ្សាយកាលពី​យប់​ថ្ងៃ​ទី​៨ ខែវិច្ឆិកា ឆ្នាំ​២០១២ ថា "​និយាយ​រួម​ទៅ ពួក​ខ្ញុំ​អស់ជម្រើស​មែនទែន​ហើយ ហើយ​ពួក​ខ្ញុំ​មាន​ការនឿយហត់​មែនទែន ក្នុង​ការតស៊ូ​មតិទាមទារ​ដំណោះស្រាយ​នៅ​តំបន់​បឹងកក់​ដ៏​រ៉ាំរ៉ៃ​នេះ​។ វា​ធ្វើឲ្យ​ពួក​ខ្ញុំ បាត់បង់​នូវ​អ្វីៗសឹងតែ​ទាំងអស់​។ សូម្បី​តែ​កម្លាំងក៏​ពួក​ខ្ញុំ​គ្មាន​ដែរ​។ រាល់ថ្ងៃនេះ ពួក​ខ្ញុំ​ទៅ​តវ៉ា តស៊ូ​មតិ​ដោយ​អហិង្សា​នេះ គឺ​ដោយសារតែ​មាន​កម្លាំងចិត្ត​តែ​ប៉ុណ្ណោះឯង​។ ដូច្នេះហើយ ពួក​ខ្ញុំ​ក៏​សម្រេចចិត្ត​ថា ពួក​ខ្ញុំ​ត្រូវ​រើស​ទីតាំង​ណាមួយក្នុង​ការតស៊ូ​មតិ​ឲ្យបាន​ច្បាស់លាស់ ដើម្បី​បង្ហាញ​ពី​ផល​លំបាក និង​ការទាមទារឲ្យមាន​ការជួយ​សង្គ្រោះ​ជីវិត​ដល់​ពួក​ខ្ញុំ​ទាំងអស់គ្នានៅ​ តំបន់​បឹងកក់ និង​ទាមទារ​ឲ្យមាន​ដំណោះស្រាយដ​ល់​ពួក​ខ្ញុំ​ឲ្យបាន​ឆាប់ៗនៅ​ពេល​ថ្ងៃ​ ខាងមុខនេះ​។ ដូច្នេះហើយ ពួក​ខ្ញុំ​ក៏​សម្រេចចិត្តបោះ​តង់ ក្រាល​កន្ទេល យក​ខ្នើយ យក​មុង យក​ភួយ និង​មាន​ចាន មាន​ឆ្នាំង យក​ទៅ​ដាំបាយ ហើយ​សម្រាក​នៅ​មុខ​ស្ថានទូត​អាមេរិកទាំងអស់គ្នា រហូត​ដល់​លោក បា​រ៉ាក់ អូ​បា​ម៉ា ចុះ​មក​ប្រទេស​កម្ពុជា នៅ​ពេល​គាត់​ប្រជុំ​អាស៊ាន ជួប​ជាមួយ​ថ្នាក់ដឹកនាំ​កំពូល ជាពិសេស​គាត់​ជួប​ជាមួយ​ប្រមុខ​រដ្ឋាភិបាល ហ៊ុន សែន ហើយ​ខ្ញុំ​នឹង​យក​បញ្ហា​ទាំងអស់នោះផ្ញើ​លិខិត​ទៅ​គាត់ ហើយ​អង្គុយជា​សារ នៅមុខ​ស្ថានទូត​អាមេរិក ដេក​ទាំងយប់ ទាំង​ថ្ងៃ បង្ហាញថាពួក​ខ្ញុំ​កំពុង​ត្រូវការ​អ្នក​ជួយ​សង្គ្រោះ​ជាបន្ទាន់​"​។​

​ អ្នកស្រី ទេព វ​ន្នី ក៏បាន​លើកឡើង​បញ្ជាក់​ជាថ្មីទៀតអំពី​គោលបំណង​នៃ​ការតវ៉ា​របស់​អ្នក​ភូមិ​ បឹងកក់ គឺ​ទី​១-​អ្នកភូមិទាមទារ​ឲ្យមាន​ការបោះ​ព្រំដី ទំហំ ១២,៤៤ ហិកតា ដែល​រាជរដ្ឋាភិបាលសម្រេច​កាត់​ចេញ​ពី​គម្រោង​អភិវឌ្ឍ​ន៍​បឹងកក់ ១៣៣ ហិកតា ឲ្យបាន​ច្បាស់លាស់​។ ទី​២-​សុំឲ្យ​មាន​ការផ្តល់​ប្លង់​កម្មសិទ្ធិ ជូន​ដល់​ប្រជាពលរដ្ឋ ៦៤ គ្រួសារ ដែល​មិន​ទាន់​បាន​ប្លង់ ហើយ​ត្រូវបាន​គេ​កាត់​ចេញពី​ដី ១២,៤៤ ហិកតា ដោយ​អយុត្តិធម៌​។ ទី​៣-​សុំឲ្យ​ដក​ឈ្មោះ លោក ឡាវ ម៉េង​ឃិន ( សមាជិក​ព្រឹទ្ធសភា និង​ជា​ម្ចាស់​គម្រោង​អភិវឌ្ឍន៍​បឹងកក់ ) ចេញពី​ដី ១២,៤៤ ហិកតា ដែល​គាត់​មិនមែន​ជា​ប្រជាពលរដ្ឋអ្នករស់នៅ​បឹង​កក់ តែ​គាត់​ជា​ប្រធាន​ក្រុមហ៊ុន ស៊ូ​កា​គូ​អ៊ិន ដូច្នេះ​គាត់​មិន​មាន​សិទ្ធិទទួល​យក​ដី​នោះពី​ប្រជាពលរដ្ឋ​បានទេ​។

​ អ្នកស្រី ទេព វ​ន្នី ក៏​បាន​គូសបញ្ជាក់ថា "​អ្វី​ដែល​ពួក​ខ្ញុំ​ចង់បាន ឲ្យមាន​ការដោះស្រាយ​ជាបន្ទាន់ នៅ​ពេល​ឆាប់ៗ​នេះ គឺ​សុំ​ឲ្យ​គាត់ ( លោក អូ​បា​ម៉ា ) ជួយ​អន្តរាគមន៍​ទៅ​តុលាការ សុំ​ឲ្យ​ផ្តល់​នូវ​ភាពយុត្តិធម៌​ទៅដល់​អ្នកស្រី យ៉ោម បុប្ផា ( ស្ត្រី​អ្នកភូមិ​បឹងកក់ ) ដែល​គាត់​គ្មាន​កំហុស​ទាល់តែសោះ បែរ​ជា​ចាប់គាត់យកទៅ​ដាក់​មន្ទីរឃុំឃាំង ដោយ​គ្មាន​កំហុស​។ ដូច្នេះ​នេះ​វា​ជា​អយុត្តិធម៌​ណាស់សម្រាប់​សកម្មជន​ដីធ្លី​នៅ​តំបន់​បឹងកក់​ "​។​

​រី​តំណាង​អ្នកភូមិ​បុរី​កីឡា​វិញ ក៏​បាន​ទាមទារ​ឲ្យមាន​ការដោះស្រាយ​បញ្ហា​ដីធ្លី ដែល​ក្រុមហ៊ុន ផាន​អ៊ី​ម៉ិច បាន​បណ្តេញ​អ្នកភូមិ​ជាង ៣០០ គ្រួសារ ចេញពី​លំនៅដ្ឋាន ដោយ​គ្មាន​ផ្តល់​សំណង​ត្រឹមត្រូវ​។ អ្នកភូមិ បានទាមទារ​ឲ្យ​ក្រុមហ៊ុនសាងសង់​អគារ​ផ្ទះល្វែង មួយបន្ថែមទៀត ឲ្យ​គ្រប់ ១០ អគារ តាម​កិច្ចសន្យា ហើយ​ដោះលែង​អ្នកស្រី ទឹម សាក់​មុនី ចេញពី​ពន្ធនាគារ​ព្រៃ​ស​។​

​សូម​រម្លឹកថា អ្នកស្រី ទេព វ​ន្នី សកម្មជន​តវ៉ា​ដីធ្លីនៅក្នុង​តំបន់​បឹងកក់ ក៏​ត្រូវបាន​គេ​អញ្ជើញ​ឲ្យទៅ​ទទួលបាន​ពានរង្វាន់​មួយ ដែល​បង្កើតឡើង​ដោយ​លោកស្រី ហ៊ីល​ឡា​រី គ្លី​ន​តុ​ន រដ្ឋមន្ត្រីការបរទេស​សហរដ្ឋអាមេរិក​។ អ្នកស្រី ទេព វ​ន្នី នឹង​ទៅ​ទទួល​វង្វាន់​នោះ នៅ​អំឡុង​ដើម​ខែ​មេសា ឆ្នាំ​២០១៣ នៅ​សហរដ្ឋអាមេរិក​៕​ S