Monday, November 12, 2012

មន្ត្រី​សាលាក្រុង ព្រមាន​ថា នឹង​ចាប់ខ្លួន​អ្នក​តវ៉ា​ដីធ្លី ក្នុងអំឡុងពេល​កិច្ចប្រជុំ​កំពូល​អាស៊ាន

ថ្ងៃទី 12 វិច្ឆិកា 2012 | ដោយ: លី សិលា​
Cambodia Express News

ភ្នំពេញ: មន្ត្រី​អ្នកនាំពាក្យ​សាលា​រាជធានី​ភ្នំពេញ បានធ្វើ​ការព្រមាន​ដោយផ្ទាល់​មាត់នៅ​ថ្ងៃ​ចន្ទ ទី​១២ ខែវិច្ឆិកា ឆ្នាំ​២០១២ ថា អាជ្ញាធរ​នឹង​ចាត់វិធានការ ចាប់ខ្លួន​ក្រុមអ្នកតវ៉ា​ដីធ្លី ដូចជា​ក្រុម​អ្នកភូមិ​បឹងកក់ ឬ​អ្នក​បុរី​កីឡា ក្នុងអំឡុងពេល​កិច្ចប្រជុំ​កំពូល​អាស៊ាន ដែល​នឹង​ចាប់ផ្តើមនៅ​ថ្ងៃទី​១៥ ដល់​ថ្ងៃទី​២០ ខែវិច្ឆិកា ឆ្នាំ​២០១២ នៅ​រាជធានី​ភ្នំពេញ​។​

​លោក ឡុង ឌី​ម៉​ង់ អ្នកនាំពាក្យ​សាលា​រាជធានី​ភ្នំពេញ បាន​មានប្រសាសន៍ប្រាប់ CEN នៅ​ព្រឹក​ថ្ងៃ​ចន្ទ ទី​១២ ខែវិច្ឆិកា ឆ្នាំ​២០១២ ថា "​យើង​ឃើញ​មាន​ប្រភេទ​អ្នក​តវ៉ា​មួយចំនួនដែល​មក​តាំង​ទីលំនៅអនាធិបតេយ្យនៅមុខ​ស្ថានទូត​សហរដ្ឋអាមេរិក ជិត​វត្តភ្នំ គឺ​យើង​ចាត់ទុកជា​ប្រភេទ​ជនអនាថា​ហើយ​។ ដូច្នេះ​សាលា​រាជធានី​ភ្នំពេញ នឹងមាន​វិធានការជា​របៀប​សង្គមកិច្ច​ហើយ​"​។​

​សេចក្តី​អត្ថាធិប្បាយ​របស់​មន្ត្រី​សាលា​រាជធានី​ភ្នំពេញ​យ៉ាង​ដូច្នេះ បានធ្វើ​ឡើង ខណៈដែល​ក្រុម​ប្រជាពលរដ្ឋ​មាន​ជម្លោះដីធ្លី ដែល​រួមមាន អ្នក​បឹងកក់ បុរី​កីឡា និង​អ្នករស់នៅ​ជិត​ព្រលានយន្តហោះ នៅ​ព្រឹក​ថ្ងៃទី​១២ ខែវិច្ឆិកា ឆ្នាំ​២០១២ បាន​បន្ត​ប្រមូលផ្ដុំនៅមុខ​ស្ថានទូត​អាមេរិកប្រចាំ​កម្ពុជា នៅ​ជិត​វត្តភ្នំ ដើម្បី​ដាក់​ញត្តិស្វែងរក​អន្តរាគមន៍​ពី​លោក​ប្រធានាធិបតី​សហរដ្ឋអាមេរិក បា​រ៉ាក់ អូ​បា​ម៉ា ឲ្យ​ជួយ​ដោះស្រាយ​បញ្ហាដីធ្លី និង​អន្តរាគមន៍​ទៅ​រដ្ឋាភិបាល​កម្ពុជា ឲ្យ​ដោះលែង​ស្ត្រី​អ្នកភូមិ​បឹងកក់​ម្នាក់ និង​ស្ត្រី​បុរី​កីឡា​ម្នាក់​។​


​លោក​ប្រធានាធិបតី អូ​បា​ម៉ា ត្រូវគេ​រំពឹងថា នឹងធ្វើ​ដំណើរ​មក​ចូលរួម​កិច្ចប្រជុំ​កំពូល​អាស៊ាន​-​អាមេរិក និង​កិច្ចប្រជុំ​កំពូល​អាស៊ី​បូព៌ា ជាមួយនឹង​ប្រ​មុខ​ដឹកនាំ​អាស៊ាន និង​បណ្តា​ប្រទេស​មហាអំណាច​ជាច្រើន​ទៀតនៅ​រាជធានី​ភ្នំពេញ នា​ថ្ងៃទី​១៩ និង​ថ្ងៃទី​២០ ខែវិច្ឆិកា ឆ្នាំ​២០១២​។​

​ក្រុម​ប្រជាពលរដ្ឋ ដែលមាន​ជម្លោះដីធ្លី ពិសេស​អ្នកភូមិ​បឹងកក់ និង​អ្នក​បុរី​កីឡា ក៏បាន​ព្យាយាម​ជួបជុំយូរថ្ងៃ​មកហើយ ដើម្បី​ស្វែងរក​អន្តរាគមន៍​ពី​លោក អូ​បា​ម៉ា​។

​នៅពេល​កិច្ចប្រជុំ​កំពូល​អាស៊ាន និង​កិច្ចប្រជុំ​ពាក់ព័ន្ធ​នៅពេល​ខាងមុខ ក៏មាន​សកម្មជន​អង្គការ​សង្គម​ស៊ីវិល និង​ប្រជាពលរដ្ឋ​មាន​ជម្លោះដីធ្លី គ្រោង​នឹង​ជួបជុំ ហែ​ញត្តិ​ដាក់​ទៅកាន់​ប្រមុខ​ដឹកនាំ​អាស៊ាន និង​ប្រទេស​មហាអំណាច ដូចជា លោក អូ​បា​ម៉ា ជាដើម​៕​

2 comments:

Anonymous said...

That is the vietnamese police unitform, what they are doing in Kampuchea now? Why the Khmers are blid and don't see this? Or you all waiting until Kampuchea like Kampuchea Krom?

Anonymous said...

អ្នកដឹកនាំនិងបរិវារសុទ្ធតែអាកំសាក ពួកងប់ងល់
នឹងបុណ្យសក្ដិលុយកាក់និងអំណាច​ពួកនេះសាហាវ
ជាងពួកសក្ដិភូមិ ជាពួកកុម្មុយនិស្ដឬទេវតាប្រែកាឡា
ធ្វើទៅ បង្រ្កាបទៅ ពួកឯងនឹងបានរស់នៅជាអមតៈ
លើគំនរទឹកភ្នែករាស្រ្តខ្មែរ​ពេលស្លាប់ទៅនឹងទៅហែល
ក្នុងសមុទ្រទឹកភ្នែកខ្មែរដែលហូររាល់ថ្ងៃនេះមិនខាន ។