ផៃ ស៊ីផានៈ លិខិតរបស់ សមាជិកសភា ទាំងពីរ របស់អាមេរិក ចោទប្រកាន់កម្ពុជា គ្មានមូលដ្ឋាន ច្បាស់លាស់ និងបែបលំអៀង (sic! sic! sic!)

Monday, 12 November 2012
 ដោយៈ ដើមអម្ពិល (DAP)

ភ្នំពេញៈ រដ្ឋលេខាធិការ និងជាអ្នកនាំពាក្យ នៃទីស្តីការគណៈរដ្ឋមន្រ្តី លោក ផៃ ស៊ីផាន បានមានប្រសាសន៍ថា លិខិតរបស់សមាជិកព្រឹទ្ធសភា និងរដ្ឋសភាអាមេរិក ដែលផ្ញើជូន លោកប្រធានាធិបតី បារ៉ាក អូបាម៉ា ឲ្យដាក់ គំនាបដល់រដ្ឋាភិបាលកម្ពុជា ទាក់ទង់នឹងសិទ្ធិមនុស្សនោះ គឺគ្មានមូលហេតុច្បាស់លាស់ មិនគ្រប់ជ្រុងជ្រោយ ហើយធ្វើឡើងបែបលំអៀងកាន់ជើងគណបក្សប្រឆាំងសុទ្ធសាធ។

ការថ្លែងយ៉ាងដូច្នេះ បានធ្វើឡើងតាមទូរស័ព្ទប្រាប់ដល់មជ្ឈមណ្ឌលព័ត៌មានដើមអម្ពិល នាព្រឹកថ្ងៃទី១២ ខែវិច្ឆិកា ឆ្នាំ២០១២នេះ បន្ទាប់ពីសមាជិករដ្ឋសភាចំនួន ៧នាក់ និងសមាជិកព្រឹទ្ធសភាចំនួន ៥របស់អាមេរិក កាលពី កន្លងទៅបានចុះហត្ថលេខា ហើយជូនដល់ប្រធានាធិបតី ដែលទើបតែជាប់ឆ្នោតជាលើកទីពីររបស់អាមេរិក លោក អូបាម៉ា ឲ្យស្តីបន្ទោសដល់រាជរដ្ឋាភិបាលកម្ពុជា ទាក់ទងនឹងបញ្ហាជាច្រើននៅកម្ពុជា ដូចជាការរំលោភ សិទ្ធិមនុស្ស ការកាប់បំផ្លាញព្រៃឈើជាដើម ខណៈដែលលោក អូបាម៉ា នឹងមកបំពេញទស្សនកិច្ចនៅកម្ពុជា ដើម្បីចូលរួម នៃកិច្ចប្រជុំកំពូលអាស៊ានលើកទី២១ ដែលនឹងប្រព្រឹត្តឡើងចំនួន៥ថ្ងៃ គឺចាប់ពីថ្ងៃទី១៥ ដល់២០ ខែវិច្ឆិកា ឆ្នាំ២០១២ខាងមុខនេះ។

លោក ផៃ ស៊ីផាន បានមានប្រសាសន៍ថា «(លិខិតនោះ) យើងមិនជឿជាក់លើសារៈសំខាន់ណានោះទេ ក៏ប៉ុន្តែ ប្រសិនជាមានការលើកឡើង (ក្នុងកិច្ចជំនួបទ្វេភាគីរវាងសម្តេចតេជោ និងលោកអូបាម៉ា) វាជាឱកាសមួយ សម្រាប់បញ្ជាក់ប្រាប់ឯកឧត្តមប្រធានាធិបតី សហរដ្ឋអាមេរិក ហើយយើងនឹងទទូលបានព័ត៌មានពិតមកវិញ។ បន្ទាប់ពីបានប្រាប់ព័ត៌មានពិតពីសម្តេចតេជោ ហ៊ុន សែន ផ្ទុយទៅវិញយើងនឹងសង្ឃឹមថា កិច្ចសហប្រតិបត្តិការ នឹងទំនាក់ទំនងល្អទៅវិញទេ»។

លិខិតដែល ក្រុមសភាទាំងពីររបស់អាមេរិក ចោទប្រកាន់មកលើកម្ពុជានោះ បានសរសេរទាក់ទងនឹងការស្លាប់ របស់លោក ឈុត វុទ្ធី ដែលគេល្បីថា ជាសកម្មជនការពារព្រៃឈើនៅកម្ពុជា ការស្លាប់របស់កុមារីអាយុ១៤ឆ្នាំ ដែលត្រូវបានអាជ្ញាធរបាញ់ស្លាប់ ខណៈដែលបញ្ចេញប្រតិបត្តិការមួយ បង្រ្កាប់អ្នកភូមិក្នុងភូមិប្រមា ស្រុកឆ្លូង ខេត្ត ក្រចេះ ដោយចោទប្រកាន់ពួកគេថា ជាអ្នកធ្វើអប្បគមន៍ប្រឆាំងនឹងរដ្ឋាភិបាល រឿងលោក ម៉ម សុដង់ដូ ហើយ និងរឿងលោក សម រង្ស៊ី ដែលជាមេបក្សប្រឆាំងដ៏ធំនៅកម្ពុជា។ លិខិតបានបន្តថា បញ្ហាខាងលើនេះ គឺបានរៀប ចំឡើង ដោយរាជរដ្ឋាភិបាលតែប៉ុណ្ណោះ ពោលទាក់ទង និងនយោបាយ។

ដោយឡែក ទាំងគណបក្សប្រឆាំង និងអង្គការសង្គមស៊ីវិល ក៏គ្រោងនឹងដាក់ញ្ញត្តិនិងបានអំពាវនាវដល់ប្រធានា ធិបតី ដែលទើបតែជាប់ឆ្នោតថ្មីរបស់អាមេរិក លោក បារ៉ាក់ អូបាម៉ា ជំរុញដល់រាជរដ្ឋាភិបាលកម្ពុជាឲ្យគោរពសិទ្ធិ មនុស្ស និងលទ្ធិប្រជាធិបតេយ្យ ក្នុងការបោះឆ្នោតដោយសេរី ហើយជាពិសេសនោះគឺបើកផ្លូវឲ្យលោក សម រង្ស៊ី ដែលបច្ចុប្បន្នកំពុងនិរទេសខ្លួន នៅក្រៅប្រទេសនោះចូលស្រុកវិញ។ ប៉ុន្តែទោះបីជាយ៉ាងណាក៏ដោយ ការដាក់ ឬក៏ការស្នើសុំរបស់មន្រ្តីគណបក្សប្រឆាំង ក៏ដូចជាអង្គការសង្គមស៊ីវិលនេះធ្វើឡើង គឺជាសិទ្ធិរបស់ពួកគេ ហើយវា មិនអាចធ្វើឲ្យប៉ះពាល់កិច្ចសហប្រតិបត្តិការរវាងប្រទេសទាំងពីរឡើយ ផ្ទុយទៅវិញទំនាក់ទំនងនឹងកាន់តែជិត ស្និទ្ធ និងស៊ីជម្រៅបន្ថែមលើគ្រប់វិស័យ នេះបើយោងតាមប្រសាសន៍លោក ផៃ ស៊ីផាន។

លោកប្រធានាធិបតី បារ៉ាក់ អូបាម៉ា និងអ្នកស្រី ហ៊ីលឡារី គ្លីនតុន រដ្ឋមន្រ្តីក្រសួងការបរទេស របស់អាមេរិក នឹង មកបំពេញទស្សនកិច្ចនៅកម្ពុជា នៅថ្ងៃទី១៩ ដល់ថ្ងៃទី២០ ដើម្បីចូលរួម នៃកិច្ចប្រជុំកំពូលអាស៊ាន និងកិច្ចប្រជុំ កំពូលអាស៊ាន-បូព៌ា។ ក្នុងដំណើរទស្សនកិច្ចដ៏ប្រវត្តិសាស្រ្តមកកម្ពុជានេះ គេរំពឹងថា ទំនាក់ទំនងរវាងកម្ពុជា-អាមេរិក កាន់តែល្អឥតងាករ៉េឡើយ៕