ខៀវ កាញារីទ្ធ (នាយ វីស្គី) ៖ បើគណបក្សសង្រ្គោះជាតិលោក សម រង្ស៊ី មិនចូលរួមការបោះឆ្នោត នឹងខាត

ថ្ងៃទី 2 ធ្នូ 2012  | ដោយ: រតនា 

Cambodia Express News

ភ្នំពេញ: ​មន្ត្រីជាន់ខ្ពស់​គណបក្ស​ប្រជាជន​កម្ពុជា ​បានបញ្ជាក់​ម្តង​ហើយ​ម្តង​ទៀតថា​ បញ្ហា​លោក​សម រង្ស៊ី​ ប្រធាន​គណបក្ស​សង្គ្រោះ​ជាតិ ​ដែល​កំពុង​និរទេស​ខ្លួន​នៅក្រៅ​ប្រទេស​នោះ​ថា​ ជា​បញ្ហា​ដែល​លោក​សម រង្ស៊ី​ ត្រូវតែមាន​ការដោះស្រាយ​តាមផ្លូវ​តុលាការ​ដែលជា​ស្ថាប័ន​ឯករាជ្យ មិនមែន មក ចរចា​ជាមួយ​ថ្នាក់ដឹកនាំ​គណបក្ស​ប្រជាជន​កម្ពុជា​ហើយ​សង្ឃឹមថា ​អាច​ឲ្យ​លោក​សម រង្ស៊ី​ ចូលមក​ដោយ​មិន​អនុវត្តតាម​សាលក្រម​របស់​តុលាការ​បាន​នោះទេ​។​
​លោក​យឹម​ សុវណ្ណ អ្នកនាំពាក្យ​ នៃ​គណបក្ស​សង្គ្រោះ​ជាតិ ​បាន​មាន​ប្រសា​ស​ន៍កាលពី​ថ្ងៃទី​១ ខែធ្នូ ​ឆ្នាំ​២០១២ ​ដោយ​បញ្ជាក់ថា​ ​ឥឡូវនេះ​គណបក្ស​កំពុងតែ​តស៊ូ​មតិ​ឲ្យ​មានការ​កែទម្រង់​សមាសភាព​ក្បាលម៉ាស៊ីន​ដឹកនាំ ​នៃ​គណៈកម្មាធិការ​ជាតិ​រៀបចំ​ការបោះឆ្នោត​ និង​តស៊ូ​មតិ​ឲ្យ​មានការ​អនុញ្ញាត​ឲ្យ​លោក​សម រង្ស៊ី​ បាន​វិល​ចូលមក​ធ្វើការ​ប្រកួត​ប្រចែង​នៅក្នុង​ការបោះឆ្នោត​ជ្រើសតាំង​សមាជិកសភា​ នៅ​អាណត្តិ​ទី​៥​ដែល​នឹង​ប្រព្រឹត្តទៅ​នៅ​ខែកក្កដា ​ឆ្នាំ​២០១៣ ​ឲ្យ​បាន​សិន​រួមទាំង​ការតស៊ូ​មតិ​ឲ្យ​មានការ​កែទម្រង់​ស្ថាប័ន​តុលាការ ​និង​បញ្ហាសំខាន់ៗ​ឯទៀត​។​
​លោក​​យឹម ​សុវណ្ណ ​បាន​មាន​ប្រសា​ស​ន៍​បញ្ជាក់ថា ​នេះ​ថា "​អ្វីៗ​ក៏​អាចមាន​ការប្រែប្រួល​ដែរ​នៅពេល​អនាគត ស្ថានភាព​នយោបាយ​អាច​នឹង​ប្រែប្រួល​ក្នុង​រយៈពេល​ មុន​ការបោះឆ្នោត​ឆ្នាំ​២០១៣​មកដល់​។ ​យើង​កុំ​មើល​ឃើញតែ​ខ្មៅ​ងងឹត​ពេក​គឺ​អ្វីៗ​អាច​ប្រែប្រួល​ពេលអនាគត​"​។​
​ជាមួយ​នោះដែរ​លោក​យឹម​ សុវណ្ណ​ បាន​មាន​ប្រសា​ស​ន៍​បញ្ជាក់​បន្ថែ​ម​ថា​ ​យើង​កំពុងតែ​ពិចារណា​អំពីថាតើ យើងនឹងចូលរួម​ឬ​មិន​ចូលរួម​ក្នុងការ​បោះឆ្នោត​ឆ្នាំ​២០១៣ ​បើសិន​ការទាមទារ​របស់​គណ​បក្ស​​សង្គ្រោះ​ជាតិ​ទាំង​ប៉ុន្មាន​មិនបាន​សម្រេច ហើយ​លោក​សម រង្ស៊ី ​នៅតែ​ពុំ​អាច​វិល​ចូលមក​ធ្វើការប្រកួតប្រជែង​ដោយពេញលេញ ក្នុង​បាន​បោះឆ្នោត​បាន​។​

​ចំពោះ​ការទាមទារ​របស់​គណ​បក្សប្រឆាំង​ឲ្យ​មានការ​កែទម្រង់​គណៈកម្មាធិកា​រ​ជាតិ​រៀបចំ​ការបោះឆ្នោត គ​.​ជ​.​ប និង​កែ​ប្រព័ន្ធ​បោះឆ្នោត និង​ឲ្យ សម រង្ស៊ី បាន​ចូល​ប្រទេស​វិញ ហើយបើបាន​ចូល​ប្រទេស​វិញ នឹងធ្វើ​ពហិការ​មិន​ចូលរួម​ការបោះឆ្នោត​ឆ្នាំ​២០១៣​នោះ​ត្រូវបាន លោក ខៀវ កាញារីទ្ធ បាន​មានប្រសាសន៍ថា​ បើ​គណបក្ស​សង្គ្រោះ​ជាតិ​លោក សម រង្ស៊ី មិន​ចូលរួម​ការបោះឆ្នោត គាត់​ខាត ព្រោះ​ឥឡូវនេះ យើង​ឃើញ​មាន​គណបក្ស​៥-៦​ហើយ គេ​បាន​ត្រៀម​ចូលរួម​ការបោះឆ្នោត​នាពេល​ខាងមុខនេះ ដូច្នេះ​បើ​គាត់​(​គណបក្ស សង្គ្រោះ​ជាតិ ​និងលោកសម រង្ស៊ី) មិន​ចូល​មួយ​ គឺ​គាត់​ខាត​ហើយ​។​
​ចំពោះ​ការព្យាយាម​រក​ការចរចា ជាមួយ​គណបក្ស​ប្រជាជន​កម្ពុជា ដើម្បី​ឲ្យ​លោក សម រង្ស៊ី ចូលមក​ប្រទេស​វិញ​នោះ លោក ខៀវ កា​ញ៉ា​រី​ទ្ធ បាន​អះអាងថា "​ឥឡូវនេះ រឿង​ហ្នឹង​វា​នៅក្នុង​តុលាការ បើ​គាត់​ចង់រក​យ៉ាងម៉េច ត្រូវ​រក​ឲ្យ​បាន​មុន បើ​តុលា​ការសំរេច​ហើយ​ធ្វើ​យ៉ាងម៉េច​ក៏​មិនបាន​ដែរ​រឿង​ហ្នឹង​"​។​
​សូមបញ្ជាក់ថា​ ​លោក​សម រង្ស៊ី​ ជាប់ទោស​បទ​ព្រហ្មទណ្ឌ​ដែល​បាន​ដក​បំផ្លាញ​តម្រុយ​បង្គោល​ព្រំដែន​គោក​នៅ​ស្រុក​ចន្ទ្រា ​ខេត្តស្វាយរៀង ​កាលពី​ចុងឆ្នាំ​២០០៩​ និង​បទ​ញុះ​ញ​ង់​ឲ្យ​មានការ​រើសអើង​ជាតិ​សាស​ន៍ដែល​ត្រូវបាន​តុលាការ​កំពូល​ សម្រេច​ផ្តន្ទាទោស​កំបាំងមុខ​ឲ្យ​ជាប់ពន្ធនាគារ​ចំនួន​២​ឆ្នាំ ​ហើយ​តុលាការ​កំពូល​បានសម្រេច​តម្កល់​សាលក្រម​របស់​សាលាដំបូង​ខេត្តស្វាយរៀង ​ទុកជាបានការ​និង​បិទផ្លូវ​តវ៉ា​ជាមួយគ្នា​នោះដែរ​សម្តេច​អគ្គ​មហា​ពញា​ចក្រី​ហេង​ សំរិន​ ប្រធានរដ្ឋសភាជាតិ​ក៏បាន​សម្រេច​តាម​សាលដីកា​ស្ថាពរ​របស់​តុលាការ​ជាន់ខ្ពស់​នេះ​លុបឈ្មោះ​លោក​សម រង្ស៊ី​ចេញពី​បញ្ជី​សមាជិកសភា​មណ្ឌល​កំពង់ចាម​អាណត្តិ​ទី​៥​ផងដែរ ចំណែក​ក្រុមប្រឹក្សាធម្មនុញ្ញ​ កាលពី​ថ្ងៃ​ទី​១៩ ​ខែវិច្ឆិកា ​ឆ្នាំ​២០១២ ​បាន​បើកសវនាការ​សម្រេច ត​ម្ក​ល់​ការ​លុបឈ្មោះ​លោក​សម រង្ស៊ី​ ចេញពី​បញ្ជី​ឈ្មោះ​បោះឆ្នោត​ឆ្នាំ​២០១៣ ​ដោយ​តម្កល់​តាម​សេចក្តីសម្រេច​របស់​គណៈ​ក​ម្មា​ធិ​ការ​ជាតិ​រៀបចំ​ការបោះឆ្នោត ​ដែល​បាន​បើក​សវ​នាករ​កាលពី​ថ្ងៃ​ទី​៦ ​ខែវិច្ឆិកា ​ឆ្នាំ​២០១២​ ទុកជាបានការ​និង​បិទផ្លូវ​តវ៉ា​៕