Monday, 25 February 2013
ម៉ៃ ទិត្យថារ៉ា ភ្នំពេញប៉ុស្តិ៍
ភ្នំពេញៈ អង្គការក្រៅរដ្ឋាភិបាល
ដែលធ្វើការលើវិស័យព្រៃឈើ
បានចាត់ទុកចំណាត់ការរបស់លោកនាយករដ្ឋមន្ត្រី ហ៊ុន សែន
ដែលបានចុះហត្ថលេខា លើសារាចរទប់ស្កាត់ការកាប់ឈើគ្រញូងថា ហួសពេល
ខណៈឈើគ្រញូង ត្រូវបានគេកាប់អស់គ្មានសល់ សូម្បីតែគល់គ្រញូង
ក៏ត្រូវគេកាប់គាស់ យកទៅថ្លឹងគីឡូលក់គ្មានសល់ផងដែរនោះ។
លោក ឈឹម
សាវុធមន្ត្រីសម្របសម្រួលគម្រោងរបស់មជ្ឈមណ្ឌលសិទ្ធិមនុស្ស កម្ពុជា
បានមានប្រសាសន៍ថា
លោកស្វាគមន៍ចំពោះវិធានការថ្មីរបស់លោកនាយករដ្ឋមន្ត្រី ហ៊ុន សែន
តែសារាចរថ្មីនេះជាវិធានការយឺតពេល។ លោកបានថ្លែងថា៖
«បើសិនរាជរដ្ឋាភិបាល មានបំណងពិតប្រាកដ
ក្នុងការលុបបំបាត់បទល្មើសព្រៃឈើនេះ គួរណាស់តែចេញសារាចរនេះ
តាំងពី ៦-៧ ឆ្នាំមុន
ទើបបានមានសេសសល់ឈើគ្រញូងខ្លះនៅក្នុងព្រៃ។ ប៉ុន្តែឥឡូវនេះ
កុំថាឡើយដើមគ្រញូង សូម្បីតែគល់គ្រញូង
ក៏គេគាស់យកទៅថ្លឹងគីឡូលក់អស់ទៅហើយដែរ
តើមានគ្រញូងមកពីណាទៀត»។
លោកឈឹម សាវុធ ក៏បានលើកឡើងផងដែរថា
ប្រសិនបើរដ្ឋាភិបាលចេញសារាចរនេះ តាំងពី ៦ ឬ ៧ ឆ្នាំមុន
ម្ល៉េះរហូតមកដល់ពេលនេះ
ពុំមានពលរដ្ឋខ្មែរណាម្នាក់ត្រូវបានទាហានថៃបាញ់សម្លាប់
ដោយសារតែលួចចូលទៅកាប់ ឬជញ្ជូនឈើគ្រញូង ក្នុងទឹកដីថៃ
ដូចសព្វថ្ងៃនេះទេ។ ដូច្នេះវិធានការនេះគឺ
គ្រាន់តែធ្វើឲ្យល្អមើលប៉ុណ្ណោះ ពុំអាចការពារព្រៃឈើបាននោះទេ។
លោកបានគូសបញ្ញាក់ថា៖ «បើយកល្អ រដ្ឋាភិបាល គួរតែចេញសារាចរ
ទប់ស្កាត់ការកាប់បំផ្លាញព្រៃឈើទូទៅ ដែលនៅសេសសល់ខ្លះៗ
ក្នុងតំបន់ជួរភ្នំក្រវាញភាគកណ្តាល ភ្នំឱរ៉ាល់
ឬក៏ព្រៃឡង់វិញវាល្អជាង ទើបអាចការពារព្រៃឈើខ្លះៗបាន
ទាន់ពេលវេលា»។ លោកសាវុធ បានធ្វើការកត់សម្គាល់ថា
ជាច្រើនឆ្នាំមកហើយ រដ្ឋាភិបាលតែងតែធ្វើយឺតជាងសភាពការណ៍
ដែលបានកើតឡើង ដូចជាករណីការហាមកាប់ឈើគ្រញូងនេះ
គឺបានដើរក្រោយសភាពការណ៍រួចទៅហើយ។
លោកបានថ្លែងបញ្ជាក់ថា៖ «រដ្ឋាភិបាលគ្មានឆន្ទៈពិតប្រាកដ
ក្នុងការការពារព្រៃឈើនោះទេ
គឺគ្រាន់តែធ្វើឲ្យល្អមើលតែប៉ុណ្ណោះ»។ ឈើគ្រញូងភាគច្រើន
ត្រូវបានគេនាំយកទៅលក់នៅប្រទេសវៀតណាម និងនាំយកទៅ
លក់បន្តនៅប្រទេសចិន។ ឈើទាំងនោះ
ត្រូវគេកាប់ពីក្នុងព្រៃជួរភ្នំក្រវាញ ព្រៃឡង់
ព្រៃក្នុងខេត្តមណ្ឌលគិរី រតនគិរី និងស្ទឹង ត្រែង ជាដើម។
បើតាមលោកសាវុធ ឈើទាំងនោះ ត្រូវបានគេប្រើរថយន្តទំនើបៗ
រួមទាំងរថយន្តកាកបាទក្រហម រថយន្តសង្គ្រោះបន្ទាន់ និងជាពិសេស
រថយន្តដែលពាក់ស្លាកលេខខេមរភូមិន្ទ ធ្វើការដឹកជញ្ជូន។
ចំណែក លោក ចាន់ សុវ៉េត មន្ត្រីស៊ើបអង្កេតជាន់ខ្ពស់
សមាគមការពារសិទ្ធិមនុស្សអាហុក បានឲ្យដឹងថា
បើតាមការអង្កេតសព្វថ្ងៃនេះ
ពុំមានឈើគ្រញូងនៅសល់ក្នុងព្រៃស្រុកខ្មែរទៀតនោះទេ
ប្រសិនបើមាននោះ ម្ល៉េះពលរដ្ឋកម្ពុជា
មិនចាំបាច់ត្រូវឆ្លងដែនទៅប្រទេសជិតខាង
ដើម្បីកាប់ឈើប្រណីតៗនោះឡើយ។ លោកសុវ៉េត រំឭកថា
ដើម្បីទប់ស្កាត់បទល្មើសព្រៃឈើ កាលពីឆ្នាំ ១៩៩៣ ព្រះមហាក្សត្រ
បានចេញរាជក្រឹត្យ ដើម្បីកំណត់តំបន់ព្រៃការពារ
ហើយក្រោយមករដ្ឋាភិបាលក៏បានចេញបទបញ្ជាហាមកាប់បំផ្លាញព្រៃឈើ
ប៉ុន្តែជាក់ស្តែង បទល្មើសព្រៃឈើ
នៅតែបន្តកើតមានជាហូរហែរហូតមកដល់សព្វថ្ងៃនេះ។
លោក ចាន់ សុវ៉េត បានបញ្ជាក់ថា៖ «ខ្ញុំសោកស្តាយបំផុត
ដែលរដ្ឋាភិបាលបរាជ័យ ក្នុងការទប់ស្កាត់បទល្មើសព្រៃឈើ
ហើយបច្ចុប្បន្ននេះ បើទោះបីជារដ្ឋាភិបាល
ចេញសារាចរការពារឈើគ្រញូង ឬក៏មិនចេញក៏ដោយ ក៏វាគ្មានឈើគ្រញូង
ត្រូវការពារទៀតដែរ ពីព្រោះឈើគ្រញូងវាអស់ពីស្រុកខ្មែរហើយ»។
លោកផៃ ស៊ីផាន អ្នកនាំពាក្យទីស្តីការគណរដ្ឋមន្ត្រី ថ្លែងថា លោកពុំទាន់ឃើញសារាចរហាមកាប់ឈើគ្រញូងនៅឡើយទេ។
លោក នាយករដ្ឋមន្ត្រី ហ៊ុន សែន បានឲ្យដឹងកាលពីចុងសប្តាហ៍មុនថា
លោកបានចុះហត្ថលេខារួចហើយ កាលពីថ្ងៃទី ២១ ខែកុម្ភៈ ឆ្នាំ
២០១៣ ទាក់ទងទៅនឹងបញ្ហាការកាប់ឈើខុសច្បាប់ ជាពិសេស
បញ្ហាឈើគ្រញូង ត្រូវបញ្ចប់ទាំងការប្រើប្រាស់ក្នុងស្រុក
និងបញ្ចប់ការនាំចេញ។ លោកនឹងទាក់ទងទៅប្រទេសដែលទិញឈើគ្រញូង
សុំឲ្យឈប់ទទួលទិញគ្រញូងពីស្រុកខ្មែរតែម្តង។ លោកបានថ្លែងថា៖
«វាទាល់តែមានវិធីនេះ បើមិនអ៊ីចឹងទេ វានៅតែមកទៀត
អាការកែច្នៃគ្រញូងស្អីៗនេះ គួរតែបញ្ចប់»។
លោកបានមានប្រសាសន៍ទៀតថា កាពិតនៅក្នុងស្រុកខ្មែរ
អត់មានការប្រើប្រាស់គ្រញូងទេ។
លោកបានថ្លែងទៀតថា៖«នៅក្នុងប្រទេសដទៃ គេកាប់នៅហ្នឹងហើយស្រេច
តែគេយកចេញពីប្រទេសគេមិនរួច
យើងវាទៅជាកន្លែងសម្រាប់ឆ្លងកាត់ឈើគ្រញូងហ្នឹង។
ខ្ញុំបានចុះហត្ថលេខាលើសារាចរ យើងត្រូវផ្សព្វផ្សាយឲ្យបានទូលំទូលាយ
និងអនុវត្តទាំង អស់គ្នា បើមិនអ៊ីចឹងទេ
វានៅតែមានអ្នកប្រើប្រាស់ វានៅតែមានអ្នកផ្គត់ផ្គង់
ហើយផ្គត់ផ្គង់ទៅកាប់ពីណា ទៅកាប់ពីក្នុងប្រទេសរបស់យើងផង
ទៅកាប់ពីប្រទេសដទៃផង អ៊ីចឹងទេ រឿងវាមិនចប់ទេ»។
សូមរំឭកថា កាលពីខែមករា ឆ្នាំ ២០១០ លោកនាយករដ្ឋមន្ត្រីហ៊ុន សែន
បានដាក់បទបញ្ជាយ៉ាងតឹងរ៉ឹង ដោយបានធ្វើការព្រមានខ្លាំងៗ
ទៅលើមន្ត្រីយោធា និងមន្ត្រីសមត្ថកិច្ចពាក់ព័ន្ធទាំងអស់
ឲ្យបញ្ឈប់សកម្មភាពពាក់ព័ន្ធជាមួយនឹងការកាប់ព្រៃឈើ
និងបញ្ឈប់សកម្មភាពទន្ទ្រានកាន់កាប់ដី
ឬគាំទ្រអ្នករកស៊ីឈើខុសច្បាប់។ ប៉ុន្តែយ៉ាងណាក្តី
តាមសេចក្តីរាយការណ៍ ពីអ្នកឃ្លាំមើល
និងមន្ត្រីសហគមន៍ការពារព្រៃឈើជាច្រើន បានអះអាងថា
បទល្មើសព្រៃឈើនៅតែបន្តកើតឡើងយ៉ាងពេញបន្ទុកនៅឡើយ
រហូតមកដល់ពេលនេះ៕
No comments:
Post a Comment