បក្សប្រជាជន បើកមហា សន្និបាត វិសាមញ្ញ តំណាង ទូទាំងប្រទេស

Saturday, 16 March 2013 
ដោយ៖ ដើមអម្ពិល : (DAP)

ភ្នំពេញ ៖ គណបក្សប្រជាជនកម្ពុជា នៅ ព្រឹកថ្ងៃទី១៦ ខែមីនា ឆ្នាំ២០១៣នេះ បាន បើកមហាសន្និបាត វិសាមញ្ញកំពូល តំណាង ទូទាំងប្រទេស រយៈពេល២ថ្ងៃ គឺថ្ងៃទី១៦ -១៧ ខែមីនា ឆ្នាំ២០១៣ ដែលស្ថិតក្រោម អធិបតីភាពដ៏ខ្ពង់ខ្ពស់ របស់សម្ដេចអគ្គមហា ធម្មពោធិសាល ជា ស៊ីម ប្រធានគណបក្ស ប្រជាជន សម្ដេចតេជោ ហ៊ុន សែន អនុប្រធាន គណបក្សប្រជាជន និង សម្ដេចអគ្គមហាពញាចក្រី ហេង សំរិន ប្រធានកិត្ដិយសគណបក្សប្រជាជន ព្រមទាំងមានការចូលរួមពីថ្នាក់ដឹកនាំជាន់ខ្ពស់ សមាជិកសមាជិកាសំខាន់ៗរបស់គណបក្សប្រជាជនជាច្រើនរយនាក់ នៅមជ្ឈមណ្ឌលកោះពេជ្រ ។

នៅក្នុងពិធីបើកមហាសន្និបាតវិសាមញ្ញ តំណាងទូទាំងប្រទេស របស់គណបក្សប្រជាជនខាងលើនេះ សម្ដេចធម្មពោធិសាល ជា ស៊ីម បានអង្គុយ អានសុន្ទករថា ដោយលើកឡើងពីសមិទ្ធផល ធំៗរបស់គណបក្សប្រជាជន ក្នុងការកសាងនិងអភិវឌ្ឍន៍ប្រទេសជាតិ រហូតមកដល់ពេលបច្ចុប្បន្ននេះ ។

ជាមួយគ្នានេះ សម្ដេចជា ស៊ីម បានលើក ឡើងពីយុទ្ធសាស្ដ្រក៏ដូចជាការដាក់ទិសដៅ ផ្សេងៗរបស់គណបក្សប្រជាជន ដើម្បីចូលរួមប្រកួតប្រជែងការបោះឆ្នោត សកល នាថ្ងៃទី២៨ ខែកក្កដា ឆ្នាំ២០១៣ខាងមុខនេះ ។

ជាថ្មីម្ដងទៀត តាមរយៈសុន្ទករថា របស់សម្ដេចជា ស៊ីម មហាសន្និបាតទាំងមូល បានគាំទ្រ សម្ដេចតេជោ ហ៊ុន សែន ជានាយករដ្ឋមន្ដ្រី សម្រាប់អាណត្ដិបន្ដទៀត។