ផ្តាច់សរសៃឈាមពីហាន់ណូយគាំងបេះដូងនៅភ្នំពេញ​

ភ្លើង​ដាច់​នៅ​វៀតណាម រាលដាល​ដល់​ភ្នំពេញ​

ថ្ងៃទី 22 ឧសភា 2013

ដោយ: ខេមា

Cambodia Express News

ភ្នំពេញ: ភ្លើងអគ្គិសនី ដាច់​ស្ទើរ​ទូទាំង​រាជធានី​ភ្នំពេញ នៅ​រសៀល​ថ្ងៃទី​២២ ខែឧសភា​នេះ ដោយសារ​ភ្លើង ដែល​ផ្គត់ផ្គង់ មកពី​ប្រទេស​វៀតណាម បាន​ដាច់​។ ប្រទេស​វៀតណាម  បាន​ផ្គត់ផ្គង់​ភ្លើង​ដល់​អគ្គិសនី​កម្ពុជា ចំនួន ១៧០ មេ​ហ្គា​វ៉ា​ត់ គឺ​ស្មើ​ប្រមាណ​ជា ៤០​ភាគរយ នៃ​ភ្លើង ដែល​អគ្គិសនី​កម្ពុជា មាន​សរុប​ចំនួន ៤០០ មេ​ហ្គា​វ៉ា​ត់​។​
  ​លោក ជា ស៊ីន​ហ៊ែ​ល នាយក​អាជីវកម្ម និង​ជា​នាយក​បណ្តាញ​អគ្គិសនី​កម្ពុជា និយាយ​ឲ្យ​ដឹង​នៅ​ថ្ងៃទី​២២ ខែឧសភា ឆ្នាំ​២០១៣​ថា ភ្លើង​ដាច់​ស្ទើរ​នៅ​ទូទាំង​រាជធានី​ភ្នំពេញ នៅ​ម៉ោង​ប្រមាណ​ជា​ពីរ​រសៀល​ថ្ងៃនេះ​( ២២​ឧសភា ) បណ្តាលមកពី​ដាច់​ច​រន្ធ​ផ្គត់ផ្គង់​មកពី​ប្រទេស​វៀតណាម ទើប​ធ្វើ​ឲ្យ​ភ្លើង​ដាច់​ច្រើនបែប​ប​នេះ​។ ពេលនេះ ក្រុមមន្ត្រី​ជំនាញ​កំពុងតែ​ប្រឹងប្រែង​ស្តារ​ស្ថានភាព​ភ្លើង​ដាច់​នេះ​ឡើងវិញ តែ​មិនបាន​មួយរយ​ភាគរយ​ទេ​។​

​    ​
​លោក ជា ស៊ីន​ហ៊ែ​ល បាន​បញ្ជាក់ថា ភ្លើង​ផ្គត់ផ្គង់​មកពី​ប្រទេស​វៀតណាម នាពេល​កន្លងមក មាន​ចំនួន ១៧០ មេ​ហ្គា​វ៉ា​ត់ គឺ​ស្មើ​ប្រមាណ​ជា ៤០ ភាគរយ នៃ​ភ្លើង​មាន​នៅលើ​បណ្តាញ​ជាតិ ចំនួន​ប្រមាណ​ជា ៤០០ មេ​ហ្គា​វ៉ា​ត់​។ ពេលនេះ អគ្គិសនី​កម្ពុជា មាន​ភ្លើង​ឡើងវិញ បាន​ប្រមាណ​ជា ៣០ ភាគរយ អាច​ផ្គត់ផ្គង់​​បានតែ​នៅក្នុង​ទីក្រុង ដែលជា​កន្លែង​សំខាន់ ចាំបាច់​ប៉ុណ្ណោះ​។
​លោក​បន្តថា ភ្លើង​ដាច់​នេះ មិនដឹងថា នៅ​ខាង​ប្រទេស​វៀតណាម អាចនឹង​បញ្ជូន​បានមក​វិញ នៅពេលណា​ទេ​។ នៅក្នុងពេល​ភ្លើង​ដាច់ ទឹកស្អាត​របស់​រដ្ឋាក​រ​ទឹក ក៏​លែងចេញ មួយរយៈដែរ​៕