ជំនន់ទឹកភ្លៀងបំផ្លាញស្រូវកសិករនៅខេត្តកំពង់ចាម

ឆ្ងល់ ទឹកជំនន់នៅឯព្រះវិហារ និងកំពង់ចាម នោះទេ ចុះហេតុអីយក៏រដ្ឋាភិបាលយក​រថពាស​ដែក មក​ការពារទឹកជំនន់ នៅភ្នំពេញឯណេះវិញ ? ឬក៏ជាជំនាញកុហកប្រកបដោយ​វិជ្ជាជីវៈរបស់រដ្ឋាភុបាល ? 

ដោយ៖ ញ៉ែត ស្រីពៅ និងដួង សុខា | ថ្ងៃព្រហស្បតិ៍ ទី15 ខែសីហា ឆ្នាំ2013 | 1 ម៉ោង មុន VOD
ស្រូវកសិករប្រមាណជាង ១០០ហិកតា ស្ថិតក្នុងភូមិស្វាយព្រៃ និងភូមិសាំងជ្រៃ ឃុំសណ្តែក ស្រុកបាធាយ ខេត្តកំពង់ចាម រងការខូចខាតទាំងស្រុង ដោយសារជំនន់ទឹកភ្លៀង តាំងពីក្រោយការបោះឆ្នោតមក។
មេភូមិស្វាយព្រៃ លោក លឹម លឿង ប្រាប់VOD នៅថ្ងៃព្រហស្បតិ៍ ទី១៥ ខែសីហានេះថា ភ្លៀងធ្លាក់ជាច្រើនថ្ងៃមកនេះ បានបំផ្លាញពូជស្រូវរបស់ពលរដ្ឋ និងផ្លូវលំក្រាលគ្រួសក្រហម ចំនួនពីរខ្សែរងការខូចខាតទាំងស្រុង ៖ "ពិបាកហ្នឹង អត់ស្រូវពូជធ្វើទៀត ពូជវាសាបព្រួសអស់ទៅ ហើយដល់ពេលទឹកលិចទៅអស់ប្រដោយ ពិបាកណាស់ ពិបាកអារឿងធ្វើដំណើរហ្នឹង ក៏ពិបាក ផ្លូវចាក់គ្រួសហ្នឹងវាខូចខាតទាំងស្រុងហ្មង"។

ពលរដ្ឋម្នាក់នៅភូមិស្វាយព្រៃ លោក ហ៊ុន ហាង មានប្រសាសន៍ថា ពលរដ្ឋនាំគ្នាត្អូញត្អែរអត់ស្រូវពូជ ដោយសារភ្លៀងធ្លាក់ជាបន្តបន្ទាប់តាំងពីថ្ងៃបោះឆ្នោត។ ទឹកជំនន់បំផ្លាញសំណាប និងស្រូវទើបព្រួស បណ្តាលឲ្យពលរដ្ឋមួយចំនួនចាកចេញពីស្រុក ដើម្បីទៅស៊ីឈ្នួលគេ ៖ "ទឹកទន្លេមកលិចទៅ ហើយធ្វើឆ្នាំទៅនេះធ្វើបានតិច ដល់ឆ្នាំនេះ ហើយអញ្ចឹងទៅដើររកពួកប្រជាពលរដ្ឋនៅកន្លែងខ្ញុំហ្នឹង ដើររកជួលគេ ខ្លះទៅប្រទេសថៃ ខ្លះដើរទៅស្រុកគេទៅ បន្ទាប់មកទិញស្រូវពូជហ្នឹងព្រួស ដល់ព្រួសទៅលិចអស់ទៀតទៅ ឥឡូវនាំគ្នាដើរស៊ីឈ្នួលគេទៀតទៅ លិចដែរ កន្លះខែហើយ ដែលភ្លៀងជាប់សារមុននឹង ភ្លៀងលិចគ្រាប់ស្រូវហ្មងនៀក លិចទាំងគ្រាន់ស្រូវហ្មង ព្រួសរួចភ្លៀងជំនន់មកលិច"។

នាយកខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី មានប្រសាសន៍ថា តំបន់នោះទទួលរងផលប៉ះពាល់ច្រើនជាងគេទាំងគ្រោះរាំងស្ងួត និងទឹកជំនន់។ លោកអះអាងថា អាជ្ញាធរបានត្រៀមបម្រុងស្រូវពូជរួចហើយ សម្រាប់ជួយប្រជាពលរដ្ឋ ៖ "ស្រុកបាធាយហ្នឹង វាអាចខូចខាតជាងគេ រាំងស្ងួតក៏វាពាក់ព័ន្ធនឹងស្រុកបាធាយ អាទឹកឡើងមកក៏វាកល់នៅស្រុកបាធាយដែរ ខាងអាជ្ញាធរហ្នឹងគាត់ដឹងហើយ ថាត្រូវទាក់ទងទៅមន្ទីរកសិកម្ម ដើម្បីយកស្រូវពូជស្រូវអី បន្ថែមថ្មីអីយ៉ាងម៉េចៗហ្នឹង គឺថាយើងបានត្រៀមបម្រុងហើយតាំងពីថ្នាក់ជាតិរហូតដល់ថ្នាក់ក្រោមជាតិ"។

កាលពីថ្ងៃពុធម្សិលមិញ ក្រសួងធនធានទឹក និងឧតុនិយម ប្រកាសថា ចាប់ពីថ្ងៃទី១៤ ដល់ថ្ងៃទី២០ ខែសីហានេះ ប្រទេសកម្ពុជាទទួលឥទ្ធិពលពីព្យុះទី១១ ឈ្មោះ UTOR ដែលកំពុងស្ថិតនៅក្នុងសមុទ្រចិនខាងត្បូង។ ក្រសួងក៏អំពាវនាវឲ្យអាជ្ញាធរដែនដី និងប្រជាកសិករ សហការជាមួយមន្ទីរធនធានទឹក និងឧតុនិយមរាជធានី-ខេត្ត ដើម្បីមានវិធានការរក្សាទឹកទុក សម្រាប់បម្រើឲ្យការងារបង្កបង្កើនផល៕

សូមសរសេរមកកាន់ កញ្ញា ញ៉ែត ស្រីពៅ តាមរយៈ sreypov.nhet@gmail.com