កម្លាំង​ប៉ូលិស​​ប្រមាណ​២ពាន់នាក់ ហ្វឹក​ហាត់​​យុទ្ធ​សាស្ត្រ​​ទប់​​ស្កាត់​​បាតុកម្ម​​

ដោយ៖ ពេជ្រ សុធារី | ថ្ងៃអាទិត្យ ទី1 ខែកញ្ញា ឆ្នាំ2013, ម៉ោង 09:06 AM VOD
កម្លាំងនគរបាលរាជធានីភ្នំពេញ ប្រមាណ២ពាន់នាក់ នៅថ្ងៃអាទិត្យទី០១កញ្ញានេះ បានហ្វឹកហាត់យុទ្ធសាស្ត្រការពារសន្តិសុខ និងសណ្តាប់ធ្នាប់សាធារណៈ នៅមជ្ឈមណ្ឌលសន្និបាទ និងព័ត៌មានកោះពេជ្រ ខណៈបក្សប្រឆាំងប្រកាសពីគម្រោងធ្វើមហាបាតុកម្ម ប្រឆាំងលទ្ធផលបោះឆ្នោត។
កញ្ញា សេង ម៉ូលីនី អ្នកយកព័ត៌មានរបស់សំឡេងប្រជាធិបតេយ្យ ដែលបានចុះយកព័ត៌មាននេះ រាយការណ៍មកថា ក្នុងពិធីហ្វឹកហាត់នោះ កងកម្លាំងនគរបាលបានឈរជាជួៗទៅតាមក្រុមនិមួយៗដែលមកពីខណ្ឌទាំង៩ក្នុងរាជធានីភ្នំពេញ ដោយក្នុងដៃមានកាន់ខែល និងដំបង ព្រមទាំងពាក់មួកសុវត្ថិភាពការពារផងដែរ។ ក្រៅពីការហ្វឹកហាត់កងកម្លាំងការពារ សមត្ថកិច្ចក៏បានយករថយន្តពន្លត់អគ្គីភ័យជាច្រើនគ្រឿង មកធ្វើការហាត់សមផងដែរ។

បើតាមមន្ត្រីនគរបាលរាជធានីភ្នំពេញ ការហ្វឹកហាត់របស់កម្លាំងនគរបាលនេះ ធ្វើឡើងក្នុងបំណងធ្វើការហ្វឹកហាក់ បំប៉ន នូវមុខជំនាញបន្ថែមទៀត ដល់មន្ត្រីទាំងនោះ ពីការងាររក្សាការពារសន្តិសុខ សុវត្ថិភាព និងសណ្តាប់ធ្នាប់សាធារណៈសម្រាប់រាជធានីភ្នំពេញ ។

កាលពីដើមខែសីហានេះ ពហុកីឡាដ្ឋានជាតិអូឡាំពិច ក៏ត្រូវបានគេយកធ្វើជាកន្លែងហ្វឹកហាត់ កងរាជអាវុធហត្ថ ប្រដាប់ដោយខែល ដំបង និងអាវុធផងដែរ ពីជំនាញទប់ស្កាត់ និងការពារសន្តិសុខ ពេលផ្ទុះបាតុកម្ម។

យ៉ាងណាក៏ដោយ ការហ្វឹកហាត់នេះ ធ្វើឡើងស្របពេលដែលគណបក្សសង្គ្រោះជាតិ នឹងធ្វើពិធីហាត់សមពីរបៀបធ្វើមហាបាតុកម្មនៅថ្ងៃទី១និងថ្ងៃទី៤ខែកញ្ញា នេះ នៅទីលានប្រជាធិបតេយ្យ មុនធ្វើមហាបាតុកម្មនៅទូទាំងប្រទេសនាថ្ងៃទី៧កញ្ញា៕