Friday, October 04, 2013
ការបញ្ចុះសពម្តាយកូនស្រីដែលប្តីសម្លាប់ដ៏សង្វេគ
Posted Date : 2013-10-03
កំពង់ចាមៈ សាច់ញាតិដែលមានក្ដីសោកសង្រេងអនេកចំពោះការស្លាប់យុវនិស្សិត វ័យក្មេងដែលសង្ឃឹមពីអនាគតត្រចះត្រចង់ បន្ទាប់ពីបញ្ចប់ការសិក្សានិងម្តាយនាង ដែលត្រូវសម្លាប់យ៉ាងសាហាវព្រៃផ្សៃដោយកាំបិតខ្វែវនៅភូមិ មួយក្នុងខេត្តកំពង់ចាម កាលពីព្រឹកថ្ងៃអង្គារ បានប្រារព្ធពិធីបញ្ចុះសពហើយកាលពីម្សិលមិញ។
យុវតី មួន ចិន្តា អាយុ ២០ ឆ្នាំជានិស្សិតផ្នែករដ្ឋបាលធុរកិច្ចនៅសាកលវិទ្យាល័យបៀលប្រាយ រាជធានីភ្នំពេញ ត្រូវឪពុកចុងនាងឈ្មោះ ឡាំង ពិសេស កាប់ស្លាប់ បន្ទាប់ពីនាងបានមកលេងផ្ទះក្នុងឱកាសបុណ្យភ្ជុំបិណ្ឌបានបីថ្ងៃ នៅក្នុងភូមិត្រពាំងបឹង ឃុំថ្មពូន ស្រុកព្រៃឈរ ខេត្តកំពង់ចាម។
ជីតារបស់ ចិន្តា អាយុ ៨៤ ឆ្នាំ ឈ្មោះ សេក កាក់ ដែលជាសាច់ញាតិរបស់មេភូមិដែរនោះ បាននិយាយអំពីទុក្ខសោកចំពោះការបាត់បង់គ្រួសារនេះថា៖ «ខ្ញុំមានអារម្មណ៍ឈឺចាប់ខ្លាំងណាស់ ចំពោះនាងពីព្រោះនាងជាកូនកំព្រាតាំងពីអាយុបួនឆ្នាំ។ ឡាំង ពិសេស ប្រចណ្ឌនៅពេលដែលនាងទៅសិក្សានៅភ្នំពេញ ហើយនៅពេលនាងមកលេងផ្ទះជាមួយមិត្តភក្តិនិងសាច់ញាតិ»។
លោកបន្តថា ៖ «កាលពីមុនពួកគេបានឈ្លោះគ្នាច្រើន ពីព្រោះ ចិន្តា មានមិត្តភក្តិប្រុសមកពីសាកលវិទ្យាល័យ។ គាត់គិតថា នាងមានសង្សារច្រើន»។
សេក ធូ ជាម្តាយរបស់ ចិន្តា បានត្រឡប់មកពីវត្តវិញនៅម៉ោងប្រហែល ១១ ព្រឹកថ្ងៃអង្គារ ហើយបានឃើញកូនស្រីនិងប្តីកំពុងតែឈ្លោះគ្នា។ នេះបើតាមសាច់ញាតិបានអះអាង។ ជម្លោះលើកនេះជាជម្លោះយ៉ាងចាស់ដៃ។
បងប្អូនស្រីរបស់ សេក ធូ គឺអ្នកស្រី សេក ថាន អាយុ ៤៧ គឺកំពុងស្ថិតនៅក្នុងផ្ទះជិតនោះ គាត់ថា បានឮសំឡេងបងស្រីរបស់គាត់យំ។
អ្នកស្រីថ្លែងបន្ត ថា៖ «នៅពេលខ្ញុំឮបងស្រីរបស់ខ្ញុំស្រែក ខ្ញុំស្ទុះទៅផ្ទះនោះ ហើយបានឃើញមុខរបស់បងប្អូនស្រីសុទ្ធតែឈាម។ ខ្ញុំបានអង្វរឲ្យ ពិសេស ឈប់ ប៉ុន្តែគាត់មិនឆ្លើយតបទេ»។ គាត់ថា គាត់ក៏បានស្រែកឲ្យគេជួយនិងបានទាក់ទងហៅនគរបាល។
ប៉ុន្តែ សាច់ញាតិនិងគ្រួសារជនរងគ្រោះនិយាយថា មិនដែលមានប្រវត្តិកើតហិង្សាក្នុងគ្រួសារទេ ពិសេសរវាងប្រពន្ធ និងកូនចុងទេ ប៉ុន្តែ ពួកគេធ្លាប់ឈ្លោះញឹកញាប់ដែរ។
ជីតារបស់ ចិន្តា និយាយថា៖ «កាលពីមុនមិនមានអំពើហិង្សាក្នុងគ្រួសារទេ ប៉ុន្តែពួកគេពិតជាឈ្លោះគ្នាច្រើន នៅពេលណាក៏ដោយដែល ចិន្តា ត្រឡប់មកពីសាកលវិទ្យាល័យវិញ»។
ឡាំង ពិសេស បានប្រើកាំបិតខ្វែវដោះស្រាយកំហឹងគាត់ ដោយបានកាប់ករបស់ស្រ្តីទាំងពីរនាក់នៅពេលពួកគេព្យាយាម ស្រែកឲ្យគេជួយ។ នេះបើតាមសាច់ញាតិអះអាង។ រយៈពេលពីរម៉ោងបន្ទាប់ កំហឹងនោះបានផ្ទុះឡើងកាន់តែខ្លាំង រវាង ឡាំង ពិសេស និងនគរបាល ហើយនិងហ្វូងប្រជាជនយ៉ាងហោចជិត ៥០០នាក់ ដែលព័ទ្ធជុំវិញផ្ទះ។
ខណៈដែលនគរបាលបានព្យាយាម និយាយទៅកាន់គាត់ឲ្យដាក់អាវុធចុះ ពិសេស នៅតែនិយាយទាំងកម្រោល និងបានកាត់ដៃប្រពន្ធបង្ហាញទៅហ្វូងប្រជាជន។
លោក គាត វុទ្ធី មេប៉ុស្តិ៍នគរបាលឃុំថ្មពូន បាននិយាយថា ៖ «យើងបានព្យាយាមចរចានិងផ្តល់ឲ្យគាត់នូវការបន្ធូរបន្ថយ ទោស ប្រសិនបើគាត់សារភាព។ ប៉ុន្តែ គាត់បានបិទទ្វារ»។
បន្ទាប់ នគរបាលបានបដិសេធមិនធ្វើតាមសំណើរបស់ប្រជាជនដែលសុំឲ្យប្រើ កម្លាំងបាយដើម្បីបញ្ចប់បញ្ហានោះ នៅទីបំផុតហ្វូងប្រជាជនបានប្រើដុំថ្មគប់ចូលទៅក្នុងផ្ទះនោះ និងបានត្រូវ ឡាំង ពិសេស សន្លប់ ហើយបន្ទាប់មក ពិសេស ត្រូវបានវាយរហូតដល់ស្លាប់ដោយហ្វូងប្រជាជន។
នគរបាលបានច្រានចោលអំពីពាក្យចចាមអារ៉ាមដែលថា ពិសេស បានរំលោភ ចិន្តា នៅមុនការវាយប្រហារបន្ទាប់ពីកោសល្យវិច័យសព កាលពីល្ងាចថ្ងៃអង្គារ។ គ្រួសារបានយល់ស្របថា ពួកគេមិនជឿថា វាជាការវាយប្រហារលើផ្លូវភេទទេ។
នៅ ព្រឹកថ្ងៃវាយប្រហារ នៅម៉ោង ៨ ព្រឹកគ្រូពេទ្យក្នុងឃុំអ្នកស្រី ស្រេង សុភា ត្រូវបានប្រពន្ធហៅឲ្យមកពិនិត្យជំងឺ ពិសេស ដែលគាត់គិតថា ប្តីមានបញ្ហាសុខភាព។ សុភា បានពិនិត្យឃើញថា គាត់មានសម្ពាធឈាមខ្ពស់និងចេញវេជ្ជបញ្ជាឲ្យទិញថ្នាំ។
លោក ឡាំង ពិសា ដែលជាប្អូនប្រុសរបស់ ពិសេស បានប្រាប់នគរបាលកាលពីម្សិលមិញថា ធ្លាប់មានប្រវត្តិជំងឺសរសៃប្រសាទ នៅពេលគាត់បានមកយកសពត្រឡប់ទៅខេត្តតាកែវ។ ប៉ុន្តែគាត់ថា ជំងឺនោះមិនមានបញ្ហាធ្ងន់ធ្ងរទេចាប់ពីឆ្នាំ ២០០៦ នៅពេលដែលគ្រួសារនៅខេត្តតាកែវបានយកគាត់ទៅឲ្យគ្រូខ្មែរព្យាបាល។
សមាជិក ក្រុមគ្រួសាររងគ្រោះ បានគ្រោងនឹងបរិច្ចាគទ្រព្យសម្បត្តិទាំងអស់របស់អ្នកស្លាប់ ដើម្បីដាក់ប្រគេនព្រះសង្ឃនៅវត្ត។ ជីតារបស់ ចិន្តា គាត់មានសង្ឃឹមថា៖ «កូនចៅគាត់នឹងបានទៅសោយសុខក្នុងសុគតិភពមិនខាន»។ គាត់បន្តថា៖ «យើងមានការឈឺចាប់ខ្លាំងណាស់ចំពោះការស្លាប់របស់ពួកគេ ប៉ុន្តែយើងនឹងយកព្រះធម៌មករំលត់ទុក្ខសោករបស់យើង»៕
Subscribe to:
Post Comments (Atom)
No comments:
Post a Comment