សាក្សី​បន្ត​លើកឡើង​ពីអតីតភាព​របស់​លោក គាត ឈន់​ នៅសម័យ​ខ្មែរ​ក្រហម​ -Witness continues to raise about Keat Chhon's KR past

លោក គាត ឈន់ ​ឧបនាយក​​រដ្ឋមន្ត្រី​និង​ជា​​រដ្ឋមន្ត្រី​​ក្រសួង​​សេដ្ឋកិច្ច ​​និង​​ហិរញ្ញវត្ថុ​​ (លី​ ម៉េងហួរ) - Comrade Keat Chhon, the current minister of Economy and Finance (Photo: Ly Meng Huor, RFI)

ថ្ងៃ ព្រហស្បតិ៍ 15 ធ្នូ 2011
ដោយ លី ម៉េងហួរ
Radio France Internationale

Before ending his testimony through video on Thursday 15 December, Long Norin, a witness and a former high-ranking KR cadre, raised the issue of Keat Chhon’s past. The witness claimed that Keat Chhon, who is currently the minister of Economy and Finance, worked at the minister of Foreign Affairs under Ieng Sary. However, this morning, Keat Chhon refused to reply to questions asked by reporters.

មុន​ពេល​បញ្ចប់​ការផ្តល់​សក្ខីកម្ម​ពី​ចម្ងាយ​តាមរយៈ​វិដេអូ នៅ​ព្រឹក​ថ្ងៃ​ព្រហស្បតិ៍​ទី១៥​ធ្នូ​នេះ ​សាក្សី​សក្តានុពល ​លោក ឡុង នរិន្ទ ​ដែលជា​អតីត​កម្មាភិបាល​ជាន់ខ្ពស់​ខ្មែរក្រហម ​បានលើក​ឡើង​ពី​អតីតភាព​របស់​លោក គាត ឈ​ន់​។ ​លោក គាត ឈន់ សព្វថ្ងៃ​ជា​ឧបនាយក​រដ្ឋមន្ត្រី និង​ជា​រដ្ឋមន្ត្រី​ក្រសួង​សេដ្ឋកិច្ច​ និង​ហិរញ្ញវត្ថុ​ ត្រូវបាន​សាក្សី​អះអាងថា លោក គាត​ឈន់​បាន​ធ្វើការ​នៅ​ក្រសួង​ការបរទេស​ក្រោម​ការដឹកនាំ​របស់​លោក​អៀង​សារី​។​ ក៏​ប៉ុន្តែ​នៅ​ព្រឹក​មិញ ​លោក គាត ឈន់ ​បាន​បដិសេធ​មិន​ឆ្លើយតប​នឹង​សំណួរ​អ្នកកាសែត​ឡើយ​។

សេចក្តីរាយការណ៍របស់​លី ម៉េងហួរ - Listen to Ly Meng Huor's report

Click here to download the audio program in MP3

នៅ​ពេល​ផ្តើម​សវនាការ​កាត់ទោស​លោក នួន​ជា​ លោក​ខៀវ​សំផន និង​លោក​អៀង​សារី ​នៅ​ព្រឹក​ថ្ងៃ​ព្រហស្បតិ៍ ទី​១៥​ធ្នូ​នេះ ​សហ​មេធាវី​បរទេស​ការពា​រលោក នួន​ជា​ បាន​បន្ត​ឈ្លេច​សួរ​ដេញដោល​​សាក្សី​លោក ឡុង នរិន្ទ ​អំពី​អតីតភាព​របស់លោក គាត ឈន់​ នៅក្នុង​សម័យ​ខ្មែរក្រហម។



ក្នុង​សវនាការ កាលពី​រសៀល​ថ្ងៃ​ទី១៤​ធ្នូ​ឆ្នាំ​២០១១ ​លោក Michiel Pestman ​សហ​មេធាវី​បរទេស​ការពា​រលោក​នួន​ ជា​ បាន​សួរដេញ​ដោល​សាក្សី​ លោក ឡុង នរិន្ទ ​ម្តង​ហើយ​ អំពី​អតីតភាព​របស់លោក គាត ឈន់​។

សាក្សី​លោក​ឡុង ​នរិន្ទ បាន​លើក​ឡើង​ថា​ លោក គាត ឈន់ ​ក្នុងសម័យ​ខ្មែរក្រហម ​បាន​ធ្វើការ​ជាមួយ​លោក ​នៅ​ក្រសួង​ការបរទេស​ក្រោម​ការដឹកនាំ​របស់​លោក​អៀង​សារី។ ​តាម​លោក ឡុង នរិន្ទ នៅ​ពេល​ចេញ​ទៅ​ប្រជុំ​ក្រៅ​ប្រទេស​ ពិសេស​ទៅ​អង្គការ​សហប្រជាជាតិ ​គឺ​លោក ​និង​លោក គាត ឈន់​ រួម​ដំណើរ​ទៅ​ជាមួយគ្នា។

ដូច​ថ្ងៃ​ម្សិលមិញ​ដែរ ​នៅ​ព្រឹក​មិញ ​សាក្សី​លោក​ឡុង​នរិន្ទ បាន​បដិសេធថា​ លោក​មិន​ដឹង​អ្វី​ច្រើន​ពី​ការងារ​របស់​លោក គាត ឈន់ ​ដែល​កាលណោះ ​ស្ថិតនៅ​ក្នុង​ក្រុម​អ្នកនិពន្ធ​អត្ថបទ​នៅ​ក្រសួង​ការបរទេស ​ឬ ​ប១។

បន្ទាប់ពី​បើក​សម្ពោធ​ពិព័រណ៍​ នៅ​កោះ​ពេជ្រ ព្រឹក​មិញ លោក គាត ឈន់ ​ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​សេដ្ឋកិច្ច ​និង​ហិរញ្ញវត្ថុ​ ដែល​សាក្សី​អះអាង​ថា បាន​បម្រើ​ការងារ​នៅ​ក្រសួង​ការបរទេស​ខ្មែរក្រហម ​ជាមួយ​លោក​អៀង​សារី ​បាន​បដិសេធ​មិន​ធ្វើ​អត្ថាធិប្បាយ​អ្វី​ទាំងអស់​ ចំពោះ​ការលើកឡើង​របស់​សាក្សី​ ពាក់ព័ន្ធ​នឹង​អតីតភាព​របស់​លោក​ ក្នុង​ជំនាន់​ខ្មែរក្រហម​។

នៅមុន​ម៉ោង​ឈប់​សម្រាក​ នៅ​ព្រឹក​ថ្ងៃទី១៥​ធ្នូ​នេះ ​អង្គជំនុំ​ជម្រះ​តុលាការ​សាលា​ដំបូង​បាន​បញ្ចប់​ទាំងស្រុង​ លើ​ការសួរដេញ​ដោល​សាក្សី​លោក ឡុង នរិន្ទ។ លោក ឡុង នរិន្ទ មាន​អាយុ ៧៣ ឆ្នាំ មាន​ជំងឺ​ប្រចាំកាយ បាន បង្ហាញ​ការ​ភ្លេចភ្លាំង​ច្រើន។ ប៉ុន្តែ ​ចាប់តាំងពី​សប្តាហ៍​មុន លោក​បាន​ព្យាយាម​ផ្តល់​សក្ខីកម្ម​តាម​វិដេអូ​ពី​ផ្ទះ​របស់​លោក នៅ​ស្រុកម៉ាឡៃ ខេត្ត​បន្ទាយមានជ័យ។

ក្នុង​សវនាការ​ នា​ពេល​រសៀល​ថ្ងៃ​ព្រហស្បតិ៍នេះ លោក នួន ជា ប្រកាស​មិន​ទទួល ស្គាល់​នូវ​ឯកសារ​ភស្តុតាង​​ទស្សនាវដ្តី "ទង់​បដិវត្ត" របស់​ខ្មែរក្រហម ដែល​លើកឡើង​ដោយ​សហ​ព្រះរាជអាជ្ញារង​អន្តរជាតិ ដើម្បី​ដាក់​បន្ទុក​លើ​រូបលោក​។ ​សវនាការ​តុលាការ​ខ្មែរក្រហម ​នឹង​បន្ត​ធ្វើ ​នៅ​ថ្ងៃ​ទី១០​ មករា ​ឆ្នាំ​២០១២៕