ដោយ រដ្ឋា វីសាល
2012-04-22
នៅឯខេត្តស្ទឹងត្រែងមានប្រជាពលរដ្ឋមួយគ្រួសារប៉ុនប៉ងយក សាំងដុតកម្ទេចគ្រឿងចក្រ ដែលអាជ្ញាធរប្រើប្រាស់ឈូសឆាយដីរបស់គ្រួសារគាត់ ធ្លាប់បានរស់នៅ និងគ្រប់គ្រងជាង ២០ ឆ្នាំកន្លងមកហើយ។
ប្រជាពលរដ្ឋអ្នកតវ៉ា បានចោទមន្ត្រីមូលដ្ឋានថា បានរំលោភបំពានយកដីនោះធ្វើជាស្នាក់ការគណបក្សប្រជាជន។
អ្នកឃ្លាំមើលសិទ្ធិមនុស្សខេត្តស្ទឹងត្រែង ឲ្យដឹងនៅថ្ងៃអាទិត្យទី ២២ ខែមេសា ឆ្នាំ ២០១២ ថា ក្រុមប៉ូលិសមូលដ្ឋានប្រមាណ ១០ នាក់ បានព្យាយាមដណ្ដើមដបសាំងពីស្ត្រីម្នាក់ ដែលប៉ុនប៉ងយកសាំងនោះដុតគ្រឿងចក្រឈូសឆាយដីរបស់ក្រុមអាជ្ញាធរ ក្រុង។ ស្ត្រីនោះបានបញ្ចេញសកម្មភាព ដើម្បីការពារដីមួយកន្លែង ដែលគាត់បានកាន់កាប់ តាំងពីឆ្នាំ ១៩៨៥ រហូតមក។
បុគ្គលិកផ្នែកអង្កេតសមាគម អាដហុក (ADHOC) ខេត្តស្ទឺងត្រែង លោក ហូ សំអុល មានប្រសាសន៍បញ្ជាក់ថា ប៉ូលីសបានបញ្ឈប់សកម្មភាពប៉ុនប៉ងប្រើអំពើហិង្សានេះ បានទាន់ពេលវេលា ដោយរឹបអូសបានដបសាំងចំណុះ ៥០ សង្ទីរលីត្រចំនួន ៨ ដបពីស្ត្រីឈ្មោះ ម៉ន សម្បូរ អ្នកតវ៉ាប្រឆាំងទៅនឹងសកម្មភាពយកគ្រឿងចក្រឈួសឆាយយកដីគ្រួសារ គាត់។
លោកបន្តថា អាជ្ញាធរមូលដ្ឋាន បានយកគ្រឿងចក្រប្រភេទកាយដី និងរថយន្តដឹកជញ្ជូនដីប្រមាណ ១០ គ្រឿង មកកាយនៅលើដីទួលផ្នែកខាងក្រោយដីរបស់ស្ត្រីអ្នកតវ៉ា ហើយដឹកជញ្ជូនដីចេញ និងធ្វើដីទីនោះឲ្យរាបស្មើ ដើម្បីធ្វើទីស្នាក់ការគណបក្សប្រជាជនឃុំព្រះបាទ។
លោក ហូ សំអុល៖ «ឃើញប៉ូលីសគេរត់ប្រសេចប្រសាចចាប់យកសាំងពី គាត់អ៊ីចឹង ៨ ដបកន្លះៗ លីត្រ។ អាដបទឹកសុទ្ធយើងអាតូចៗ។ យើងបានហាមគាត់អ៊ីចឹង កុំឲ្យប្រើអំពើហិង្សា»។
ដីដែលមានទំនាស់មានទំហំទទឹង ២២០ ម៉ែត្រ និងបណ្ដោយ ៦៥០ ម៉ែត្រ ឋិតក្នុងភូមិបាចុង សង្កាត់ព្រះបាទ ក្រុងស្ទឹងត្រែង ខេត្តស្ទឹងត្រែង។ ចំពោះអ្នកស្រី ម៉ន សម្បូរ អះអាងថា ដីនេះបន្សល់ពីឪពុករបស់គាត់សំរាប់ចែកកូនចៅ ៩ នាក់។ អ្នកស្រីចោទមន្ត្រីអាជ្ញាធរប្រើអំណាចរំលោភយកដីនោះ
ដោយបំពានច្បាប់។
អ្នកស្រី ម៉ន សម្បូរ៖ «ហ៊ឹៗ ខ្ញុំឈឺចាប់ណាស់!ដែលគេមកយកដីឃុំខ្ញុំគ្មានដីនៅទេនៅសល់ដីតែ បន្តិចហ្នឹងហើយបងប្អូនបួនដប់នាក់គ្មានដីនៅទេ។ ខ្ញុំពិបាកចិត្តណាស់»។
យោងឯកសារដែលវិទ្យុអាស៊ីសេរីទទួលបានពីសមាគម អាដហុក ខេត្តស្ទឹងត្រែង ឲ្យដឹងថា កាលពីឆ្នាំ ១៩៩៧ លោក ម៉ែន សាម៉ន ជាឪពុករបស់ស្ត្រីឈ្មោះ ម៉ន សម្បូរ បានធ្វើលិខិតសុំកាន់កាប់ដីខាងលើ ដែលគាត់បានរស់នៅលើដីនោះ តាំងពីឆ្នាំ ១៩៨៦ មក។ ចំណែកអាជ្ញាធរភូមិ និងឃុំបានចុះហត្ថលេខាបញ្ជូនលិខិតស្នើសុំនេះ មកអាជ្ញាធរស្រុកជាអ្នកសំរេច ក៏ប៉ុន្តែក្នុងលិខិតស្នើសុំនោះមិនមានអាជ្ញាធរស្រុកសំរេចថាយ៉ាង ណាទេ។
ទាក់ទិនករណីនេះ ចៅសង្កាត់ព្រះបាទ គឺលោក សិត គឹម តេង និងជាអតីតមេឃុំព្រះបាទ កាលពីឆ្នាំ ១៩៩៧។ លោកបានទទួលស្គាល់ថា ក្រុមគ្រួសារស្ត្រី ឈ្មោះ ម៉ន សម្បូរ ពិតជាបានរស់នៅលើដីទំនាស់ច្រើនឆ្នាំមែន និងបានស្នើសុំសិទ្ធិកាន់កាប់ដីនោះ ក៏ប៉ុន្តែ អាជ្ញាធរក្រុងមិនបានចុះហត្ថលេខាប្រគល់ដីនោះតាមសំណើឡើយ។
លោកបន្តថា ដីកំពុងមានទំនាស់ជាដីទីទួលសុវត្ថិភាពរបស់អ្នកភូមិ បាចុង ហើយអាជ្ញាធរក្រុងគ្រោងសាងសង់ទីស្នាក់ការគណបក្សប្រជាជនឃុំព្រះបាទ នៅទីនោះ ដូច្នេះស្ត្រីអ្នកតវ៉ាអាចជួបពិភាក្សាជាមួយអាជ្ញាធរក្រុង ដើម្បីដោះស្រាយបញ្ហា។
លោក សិត គឹម តេង៖ «កន្លែងពួកខ្ញុំទៅធ្វើហ្នឹងយកធ្វើ ទីស្នាក់ការ ព្រោះអាហ្នឹងមិនមែនដីគាត់ទេ។ដីគាត់លក់ឲ្យតាទ្រីអស់ហើយ។ លោភលន់ពេក»។
វិទ្យុអាស៊ីសេរីនៅថ្ងៃអាទិត្យទី ២២ ខែមេសា ឆ្នាំ ២០១២ មិនអាចទាក់ទងអភិបាលក្រុងស្ទឹងត្រែង គឺលោក ផឹក សុបិន្ត ដើម្បីសុំបញ្ជាក់ពីករណីនេះបានទេ។ យ៉ាងនេះក្តីបុគ្គលិកផ្នែកអង្កេតសមាគម អាដហុក លោក ហូ សំអុល ផ្ដល់យោបល់ថា អាជ្ញាធរក្រុងគួរដោះស្រាយបញ្ហាជាមួយប្រជាពលរដ្ឋអ្នករស់នៅលើដី នេះឲ្យបានរួចរាល់សិន មុននឹងធ្វើការឈូសឆាយ ចៀសវាងការផ្ទុះឡើងនូវអំពើហិង្សា។
1 comment:
The people gonna has a blams but the the governmemt da reason!What a men use a law the shit,dumb,Just on person that feeble.Indeed,I want go to shoot all the governmemt and chiness,veitnam,thai......such send them to hell.Why people can't say enything and win those animal??Realy injust in world!LOVER KHMS
Post a Comment