 |
| លោក ឈុត វុទ្ធី នាយកអង្គការ ការពារធនធានធម្មជាតិ បើកបរដើម្បីពិនិត្យមើលព្រៃឈើនៅក្នុងខេត្តកោះកុងនាពេលកន្លងមក កាលពីពេលលោកនៅរស់។ រូបថត Will Baxter |
 |
| លោក ឈុត វុទ្ធី កាលពីពេលលោកនៅរស់។ រូបថត ហុង មិនា |
Friday, 27 April 2012 12:03
ម៉ៃ ទិត្យថារ៉ា
The Phnom Penh Post
កោះកុងៈ សកម្មជនបរិស្ថានសកម្មបំផុតម្នាក់លោក ឈុត វុទ្ធី ត្រូវបានគេបាញ់សម្លាប់ និងអ្នកកាសែតពីរនាក់ផ្សេងទៀតត្រូវបានគេឃុំខ្លួននៅចំណុចវាលបី ក្នុងស្រុកមណ្ឌលសីមា ខេត្តកោះកុង ខណៈពួកគេទៅធ្វើការស៊ើបអង្កេតអំពីក្រុមកាប់ឈើខុសច្បាប់ នៅក្នុងតំបន់ព្រៃការពារភ្នំក្រវាញភាគកណ្ដាល។ នេះបើតាមការឲ្យដឹងពីសមត្ថកិច្ច និងសង្គមស៊ីវិល។
លោក ខេង ទីតូ អ្នកនាំពាក្យកងរាជអាវុធហត្ថ បានថ្លែងថា លោក ឈុត វុទ្ធី ប្រធានអង្គការការពារធនធានធម្មជាតិ ត្រូវបានបាញ់សម្លាប់នៅចំណុចវាលបីក្នុងឃុំបាក់ខ្លង ស្រុកមណ្ឌលសីមា ខេត្តកោះកុង នៅវេលាម៉ោង១២:៣០នាទី ហើយមន្រ្តីកងរាជអាវុធហត្ថម្នាក់ឈ្មោះ អ៊ិន រតនា អាយុ៣១ឆ្នាំ ក៏បានស្លាប់ផងដែរ នៅក្នុងឧប្បត្តិហេតុនោះ។ លោក បានបន្តថា៖ «មូលហេតុដែលបណ្តាលឲ្យមានការបាញ់នេះ គឺដោយសារ មន្រ្តីអង្គការនេះបានព្យាយាមថតរូបនៅក្នុងក្រុមហ៊ុនមួយ ដែលមិនអនុញ្ញាតឲ្យគាត់ថតរូប ហើយគាត់នៅតែព្យាយាមធ្វើដូច្នោះ ហើយក្រុមហ៊ុនបានសុំឲ្យកងរាជអាវុធហត្ថក្នុងតំបន់នោះមកធ្វើ អន្តរាគមន៍ ហើយក្រោយមកការបាញ់នេះ ក៏បានកើតមានឡើង»។
លោក និយាយថា លោកមិនដឹងច្បាស់នោះទេថា តើនរណា ជាអ្នកបាញ់មុន ពីព្រោះលោកមិនទាន់ទទួលបានរបាយការណ៍ណាមួយពីមន្រ្តីរបស់លោកនៅ ឡើយទេ ហើយពួកគេនៅកំពុងធ្វើការងារលើករណីនេះ។
លោក ថុង ណារ៉ុង មេបញ្ជាការកងរាជអាវុធហត្ថខេត្តកោះកុង បានថ្លែងថា លោកបានទទួលព័ត៌មានអំពីការបាញ់នេះនៅវេលាម៉ោងប្រហែល១រសៀល ប៉ុន្តែលោកមិនទាន់បានដឹងច្បាស់នៅឡើយទេអំពីមូលហេតុដែលបានកើត ឡើងនេះពីព្រោះមន្រ្តីរបស់លោកកំពុងធ្វើការងារលើករណីនេះ។
លោក អ៊ិន គង់ចិត្ត មន្រ្តីសម្របសម្រួលរបស់អង្គការសិទ្ធិមនុស្សលីកាដូប្រចាំខេត្ត បានថ្លែងថា នគរបាលបច្ចេកទេសបានប្រាប់លោកថា មូលហេតុដែលបណ្តាលឲ្យមានការបាញ់នេះ គឺដោយសារ លោក ឈុត វុទ្ធី ទៅធ្វើការថតរូបនៅក្នុងកន្លែងនោះដែលមានឈើជាច្រើនកំពុង ត្រូវបានគេកាប់ ហើយបន្ទាប់មកមន្រ្តីកងរាជអាវុធហត្ថម្នាក់ បានមកសុំយកមេម៉ូរីពីគាត់ ប៉ុន្តែគាត់មិនព្រមឲ្យ ដូច្នេះមន្រ្តីម្នាក់នេះដែលឈ្មោះ អ៊ិន រតនា បាននិយាយថា ប្រសិនបើមិនព្រមប្រគល់ឲ្យ គាត់នឹងបាញ់ ហើយបន្ទាប់មកនៅពេលលោក ឈុត វុទ្ធី បើកឡានរបស់គាត់ចេញ អ៊ិន រតនា បានយកកាំភ្លើងអាកា មកបាញ់លោក ឈុត វុទ្ធី ក្នុងចម្ងាយប្រហែល២ម៉ែត្រ ខណៈលោក ឈុត វុទ្ធី នៅក្នុងឡាន។ លោក បន្ថែមថា៖ «គ្រាប់កាំភ្លើងដំបូងបាញ់ទៅប៉ះជង្គង់របស់លោក វុទ្ធី ហើយបន្តទៅប៉ះពោះរបស់គាត់ ដូច្នេះបានបណ្តាលឲ្យលោក ឈុត វុទ្ធី ស្លាប់ ហើយគ្រាប់កាំភ្លើងពីរគ្រាប់ទៀតទៅប៉ះនឹងឡានរបស់លោក វុទ្ធី ហើយប្លាតត្រឡប់មកត្រូវ អ៊ិន រតនា វិញ និងបណ្តាលឲ្យស្លាប់»។
លោក ឈើយ ធួន អាយុ៤១ឆ្នាំជាប្អូនប្រុសពៅបង្កើតរបស់លោក ឈុត វុទ្ធី បានថ្លែងថា គ្រួសាររបស់លោកមានបងប្អូនបង្កើតចំនួន៨នាក់ ស្រី៣ ប្រុស៤ ហើយលោក វុទ្ធី ដែលមានអាយុ៤៨ឆ្នាំ គឺជាកូនប្រុសទី៧ នៅក្នុងចំណោមបងប្អូនទាំង៨នាក់ ហើយបន្ទាប់ពីបញ្ចប់ការសិក្សានៅវិទ្យាល័យដូនពេញ គាត់បានទៅសិក្សានៅសាលាទាហាននៅប្រទេសរុស្ស៊ីអស់រយៈពេល៦ ឆ្នាំ ហើយគាត់បានរៀបអាពាហ៍ពិពាហ៍នៅក្នុងឆ្នាំ១៩៩០ និងមានកូន៣នាក់ ហើយពួកគេរស់នៅក្នុងស្រុកកៀនស្វាយ។
លោក បានបន្តថា លោក ឈុត វុទ្ធី កើតនៅក្នុងភូមិស្វាយមាស ឃុំវិហារសួគ៌ ស្រុកខ្សាច់កណ្តាល ខេត្តកណ្តាល។ នៅយប់នេះ សពរបស់លោកនឹងយកទៅធ្វើបុណ្យនៅស្រុកកំណើតដែលស្ថិតនៅក្នុង ភូមិស្វាយមាស ហើយពិធីបុណ្យចាប់ផ្តើមពីយប់នេះ ហើយលោកនឹងនិយាយជាមួយភរិយារបស់គាត់ថាតើនឹងត្រូវធ្វើអ្វី ទៀតនៅថ្ងៃបន្ទាប់។ លោកបន្ថែមថា៖ «ការងារបងប្រុសរបស់ខ្ញុំ គឺធ្វើដោយមិនខ្លាចមន្រ្តីជាន់ខ្ពស់ ឬជនមានអំណាច»។
លោក ស្វាយ ផឿន តំណាងអ្នកភូមិក្នុងខេត្តព្រះវិហារ ដែលធ្វើការងារជាមួយលោក ឈុត វុទ្ធី ក្នុងការបង្ក្រាបក្រុមកាប់ឈើខុសច្បាប់ បានថ្លែងថា វាជាដំណឹងអាក្រក់មួយសម្រាប់អ្នកភូមិនៅក្នុងសហគមន៍ដែលធ្វើការងារជាមួយគាត់ប្រឆាំងនឹងក្រុមកាប់ ឈើខុសច្បាប់នៅព្រៃឡង់។ លោកបន្តថា បើទោះបីជា គាត់ស្លាប់ក៏ដោយ ក៏អ្នកភូមិនៅតែចងចាំគាត់ ហើយនឹងបន្តធ្វើតាមការងាររបស់គាត់ទៀត។ លោកបន្ថែមថា៖ «បេះដូង ឈុត វុទ្ធី មួយ បានទៅបាត់ហើយ ប៉ុន្តែបេះដូង ឈុត វុទ្ធី រាប់ពាន់ទៀត នៅរស់នៅឡើយ យើងមិនខ្លាចជនសម្លាប់លោក ឈុត វុទ្ធី ថា ជាការដាក់សម្ពាធមកលើយើងដើម្បីឲ្យបញ្ឈប់ការប្រឆាំងជាមួយ ពួកកាប់ឈើខុសច្បាប់នោះទេ យើងមិនដែលភ័យខ្លាចទេ»។
លោកបន្ថែមថា រាង្គកាយរបស់លោក ឈុត វុទ្ធី បានទៅបាត់ហើយ ប៉ុន្តែសកម្មភាពរបស់គាត់នៅតែមាន។ អ្នកភូមិទាំងអស់គ្នានឹងមិនធ្វើឲ្យព្រលឹងរបស់គាត់អស់សង្ឃឹម ទេ អ្នកភូមិនឹងធ្វើខ្លាំងៗឡើងជាងមុនទៀត។
លោកបន្តថា៖ «ពួកកាប់ឈើខុសច្បាប់នឹងរីករាយជាមួយដំណឹងនេះ ប៉ុន្តែយើងនឹងធ្វើឲ្យពួកគេដឹងនៅពេលក្រោយថាតើអ្វីនឹងកើតឡើងបន្ទាប់ពីលោក ឈុត វុទ្ធី បានស្លាប់»។
ចំណែកឯអ្នកកាសែតពីរនាក់ដែលត្រូវបានឃុំខ្លួន រួមមាន កញ្ញា ផន បុប្ផា និង Olesia Plokhii បម្រើការងារឲ្យកាសែត ឌឹ ខេមបូឌាដេលី។ លោក Kenvin Doyle និពន្ធនាយកឲ្យស្ថាប័នកាសែតនេះបានអំពាវនាវឲ្យមានការដោះលែងអ្នក កាសែតរបស់លោកទាំងពីរនាក់ដោយសុវត្ថិភាព។
ក្លិបអ្នកកាសែតកម្ពុជា កាលពីម្សិលមិញ បានចេញសេចក្តីថ្លែងការណ៍របស់ខ្លួន ដោយលើកឡើងពីការព្រួយរម្ភចំពោះសេរីភាពសារព័ត៌មាននៅប្រទេសកម្ពុជា និងសុវត្ថិភាពរបស់អ្នកកាសែតអ្នកទាំងពីររូបដែលកំពុងតែបាត់ខ្លួន។ នៅក្នុងសេចក្តីថ្លែងការណ៍នោះ ក៏បានអំពាវនាវឲ្យមានការស៊ើបអង្កេតនិងស្វែងរកចាប់ខ្លួនឃាតករបញ្ជូនទៅតុលាការដើម្បីផ្តន្ទាទោសទៅតាមច្បាប់៕
1 comment:
ពួកអាឆ្កែកញ្ជះដាច់ថ្លៃរបស់យួនហាណូយសាហាវព្រៃផ្សៃ
ឃោរឃៅយង់ឃ្នងខាង បាញ់បោក,វ៉ៃទាត់ធាក់, កាប់សម្លាប់ ,
ឆក់ប្លន់, រំលោភ,ដុតផ្ទះ មកលើប្រជារាស្រ្តស្លូតត្រង់ដោយគ្មាន
ត្រាប្រណីឡើយ។
ពួកអាឆ្កែកញ្ជះដាច់ថ្លៃរបស់យួនហាណូយប៉ិនប្រសប់ខាងលប់
បំបាត់ភស្ដុតាងហើយចោទឬទំលាក់កំហុសលើខ្លួនដ៏ទៃ
ឱ្យងាប់ជំនួសវិញ។
អានេះគឺជាល្បិចប្ដូរសំបករបស់ពួកអាក្រុមពាលស៊ីពាលនៃ
រដ្ឋាភិបាលអាយ៉ងយួនហាណូយដែលមានមេដឹកនាំ
ដោយអាខ្វាក់ហ៊ុន សែន។
Post a Comment