ចម្លើយទន់ភ្លន់ រមែងបន្ថយកំហឹង,
រីឯសំដីគំរោះគំរើយ តែងតែធ្វើអោយច្រឡោតខឹង។
សំដីរបស់អ្នកមានប្រាជ្ញា រមែងធ្វើអោយអ្នកដទៃចង់ចេះដឹង,
រីឯមាត់របស់មនុស្សខ្លៅ សាបព្រោះតែសេចក្ដីល្ងីល្ងើ។
ព្រះអម្ចាស់ទតឃើញសព្វអន្លើ,
ព្រះអង្គសង្កេតមើលទាំងមនុស្សល្អ ទាំងមនុស្សអាក្រក់។
ពាក្យលើកទឹកចិត្ត ប្រៀបដូចជាដើមឈើផ្ដល់ជីវិត,
រីឯសំដីទ្រគោះបោះបោក នាំអោយធ្លាក់ទឹកចិត្ត។
មនុស្សល្ងីល្ងើ តែងតែមើលងាយការប្រៀនប្រដៅរបស់ឪពុក,
រីឯអ្នកដែលស្ដាប់តាមពាក្យស្ដីប្រដៅ ជាមនុស្សឆ្លាត។
ផ្ទះរបស់មនុស្សសុចរិត តែងសម្បូណ៌សប្បាយ,
រីឯទ្រព្យដែលរកបាន ដោយអំពើអាក្រក់ រមែងនាំអោយកើតទុក្ខ។
សំដីរបស់អ្នកមានប្រាជ្ញា រមែងបណ្ដុះបណ្ដាលចំណេះ,
រីឯមនុស្សខ្លៅវិញ មិនអាចបណ្ដុះបណ្ដាលបានទេ។
ព្រះអម្ចាស់មិនសព្វព្រះហឫទ័យនឹងយញ្ញបូជារបស់មនុស្សអាក្រក់ឡើយ,
តែព្រះអង្គទទួលពាក្យទូលអង្វររបស់មនុស្សទៀងត្រង់។
ព្រះអម្ចាស់មិនសព្វព្រះហឫទ័យនឹងផ្លូវរបស់មនុស្សអាក្រក់ទេ,
តែព្រះអង្គស្រឡាញ់អ្នកដែលស្វែងរកសេចក្ដីសុចរិត។
អ្នកដែលងាកចេញពីមាគ៌ាល្អ រមែងទទួលទោសជាទម្ងន់,
រីឯអ្នកដែលស្អប់ការស្ដីប្រដៅតែងតែស្លាប់។
ព្រះអម្ចាស់ជ្រាបអ្វីៗ នៅស្ថានមច្ចុរាជ និងនៅនរកអវិចី,
ចំណែកឯចិត្តមនុស្សវិញ ព្រះអង្គរឹតតែជ្រាបយ៉ាងច្បាស់ទៅទៀត។
មនុស្សវាយឫកខ្ពស់ មិនចូលចិត្តអោយនរណាស្ដីប្រដៅទេ,
ហើយក៏មិនទៅសួរយោបល់ពីអ្នកមានប្រាជ្ញាដែរ។
ចិត្តសប្បាយ ធ្វើអោយទឹកមុខរីករាយ,
រីឯចិត្តព្រួយ ធ្វើអោយទឹកមុខស្រងូតស្រងាត់។
អ្នកចេះពិចារណា តែងតែស្វែងរកចំណេះ,
រីឯមនុស្សខ្លៅ ចូលចិត្តភាពល្ងីល្ងើ។
ចំពោះមនុស្សកំសត់ទុគ៌ត ថ្ងៃណាក៏ជាថ្ងៃអាក្រក់ដែរ,
រីឯមនុស្សសប្បាយចិត្ត ថ្ងៃណាក៏ជាថ្ងៃបុណ្យដែរ។
ក្រទ្រព្យ តែគោរពកោតខ្លាចព្រះអម្ចាស់
ប្រសើរជាងមានទ្រព្យច្រើន ហើយកើតទុក្ខកង្វល់។
កន្លែងណាមានតែបន្លែបរិភោគ ហើយមានសេចក្ដីស្រឡាញ់,
នោះប្រសើរជាងកន្លែងមានសាច់បរិភោគយ៉ាងឆ្ងាញ់ តែមានការស្អប់គ្នា។
មនុស្សខឹងច្រើន តែងតែបង្កជំលោះ,
រីឯមនុស្សដែលចេះអត់ធ្មត់ តែងតែសំរុះសំរួលកុំអោយមានការទាស់ទែងគ្នា។
ផ្លូវរបស់មនុស្សខ្ជិល មានសុទ្ធតែបន្លា,
រីឯផ្លូវរបស់មនុស្សទៀងត្រង់ រាបស្មើល្អ។
កូនមានប្រាជ្ញា ធ្វើអោយឪពុកសប្បាយចិត្ត,
រីឯកូនល្ងីល្ងើ តែងតែមើលងាយម្ដាយ។
មនុស្សមិនដឹងខុសត្រូវ តែងតែសប្បាយចិត្តនឹងភាពល្ងីល្ងើ,
រីឯមនុស្សចេះគិតពិចារណា រមែងដើរតាមផ្លូវទៀងត្រង់។
ខ្វះការពិគ្រោះគ្នា គំរោងការតែងតែបរាជ័យ,
មានទីប្រឹក្សាច្រើន គំរោងការតែងតែសំរេច។
ពោលពាក្យត្រឹមត្រូវ ស្របនឹងកាលៈទេសៈ
រមែងនាំអោយមានអំណរសប្បាយ។
មនុស្សចេះគិតគូរ រមែងដើរតាមផ្លូវដែលឡើងទៅរកជីវិត,
ហើយ ចៀសវាងផ្លូវដែលចុះទៅរកសេចក្ដីស្លាប់។
ព្រះអម្ចាស់ រំលំផ្ទះរបស់មនុស្សអំនួត,
តែព្រះអង្គការពារដីធ្លីរបស់ស្ត្រីមេម៉ាយ។
ព្រះអម្ចាស់មិនសព្វព្រះហឫទ័យនឹងគំនិតអាក្រក់ទេ,
តែព្រះអង្គគាប់ព្រះហឫទ័យនឹងពាក្យដែលហូរចេញពីចិត្តបរិសុទ្ធ។
មនុស្សលោភលន់ តែងតែនាំអោយមានវិបត្តិនៅក្នុងខ្លួន,
រីឯអ្នកដែលមិនព្រមទទួលសំណូក រមែងមានអាយុយឺនយូរ។
មនុស្សសុចរិត តែងតែគិតពិចារណា មុននឹងឆ្លើយ,
រីឯមនុស្សអាក្រក់ រមែងនិយាយមួលបង្កាច់ភ្លាមៗ។
ព្រះអម្ចាស់មិនអើពើនឹងមនុស្សអាក្រក់ទេ,
តែព្រះអង្គ ស្ដាប់ពាក្យទូលអង្វររបស់មនុស្សសុចរិត។
ទឹកមុខដែលសំដែងសេចក្ដីមេត្តា រមែងនាំអោយមានអំណរ,
ហើយដំណឹងល្អ រមែងលើកទឹកចិត្តអោយមានកម្លាំង។
អ្នកណាយកចិត្តទុកដាក់ស្ដាប់តាមពាក្យស្ដីប្រដៅ ដែលនាំអោយមានជីវិត,
អ្នកនោះ អាចរស់នៅក្នុងចំណោមមនុស្សមានប្រាជ្ញា។
អ្នកណាបដិសេធការប្រៀនប្រដៅ, អ្នកនោះបានប្រមាថជីវិតខ្លួនឯង,
រីឯអ្នកដែលស្ដាប់តាមពាក្យស្ដីប្រដៅ តែងតែទទួលសុភនិច្ឆ័យ។
ការគោរពកោតខ្លាចព្រះអម្ចាស់ តែងតែអប់រំខ្លួនអោយមានប្រាជ្ញា,
មុននឹងទទួលសិរីរុងរឿង តោងដាក់ខ្លួនជាមុនសិន។
No comments:
Post a Comment