 |
| (Photo: RFA/Tin Zakariya) |
ដោយ ជិន ជេដ្ឋា
2012-05-08
Radio Free Asia
តំណាងសកម្មជនការពារធនធានធម្មជាតិ និងក្រុមសិទ្ធិមនុស្ស ឱ្យដឹងនៅថ្ងៃទី ៨ ខែឧសភាថា ប្រជាសហគមន៍ព្រៃឡង់ និងសកម្មជនការពារព្រៃឈើប្រមាណ ៦០០ នាក់ មកពីខេត្តចំនួន ៨ នឹងធ្វើដំណើរទៅខេត្តកោះកុង កន្លែងដែលគេបាញ់សម្លាប់លោក ឈុត វុទ្ធី ផ្ទាល់។
ប្រជាសហគមន៍ការពារព្រៃឡង់ មកពីខែត្រចំនួន ៤ តវ៉ាទាមទារឲ្យរដ្ឋាភិបាលជួយដោះស្រាយបញ្ហាការកាប់បំផ្លាញព្រៃឡង់ នាសួនសេរីភាព ក្នុងរាជធានីភ្នំពេញ កាលពីថ្ងៃទី២៥ ខែឧសភា ឆ្នាំ២០១១។
ការនាំគ្នាទៅកាន់ទីនោះ គឺដើម្បីអុជធូបគោរពវិញ្ញាណក្ខន្ធរបស់លោក ឈុត វុទ្ធី។ ក្រុមសកម្មជនព្រៃឈើអះអាងថា នៅពេលនោះពួកគេនឹងចំណាយពេលជាច្រើនថ្ងៃក្នុងការចុះល្បាត ការកាប់ឈើខុសច្បាប់នៅតំបន់ភ្នំក្រវ៉ាញភាគកណ្ដាល ក្នុងគោលបំណងប្រមូលយកភស្តុតាងបទល្មើសព្រៃឈើក្នុងតំបន់នោះ។
សេចក្ដីប្រកាសព័ត៌មានចេញដោយមជ្ឈមណ្ឌលសិទ្ធិមនុស្សកម្ពុជា នៅព្រឹកថ្ងៃទី៨ ខែឧសភា ឲ្យដឹងថា នៅថ្ងៃទី ១០ ឧសភា ខាងមុខនេះ សកម្មជនការពារធនធានធម្មជាតិ ព្រមទាំងមន្ត្រីសិទ្ធិមនុស្សជាច្រើននាក់ នឹងទៅជួបអ្នកឃុំជីខលើ ហើយបន្តស្នាក់នៅពេញមួយយប់ក្នុងស្រុកថ្មបាំង ខេត្តកោះកុង។
នៅថ្ងៃទី ១១ ឧសភា សកម្មជនទាំងនោះនឹងធ្វើដំណើរទៅកន្លែងដែលគេបាញ់សម្លាប់លោក ឈុត វុទ្ធី ដើម្បីអុជធូប និងគោរពវិញ្ញាណក្ខន្ធរបស់លោក។
បន្ទាប់ពីនោះ ពួកគេនឹងធ្វើដំណើរចូលព្រៃ ក្នុងគោលបំណងរុករកភស្តុតាងបទល្មើសព្រៃឈើ មានដូចជារណា ត្រង់តឺន័រ គំនរឈើ និងភស្តុតាងផ្សេងៗ ទៀត ដែលទាក់ទងទៅនឹងការកាប់ឈើខុសច្បាប់។ ការប្រមូលភស្តុតាងនេះ ត្រូវចំណាយពេលមួយ ឬពីរថ្ងៃ ព្រោះពួកគាត់យល់ថា មានក្រុមហ៊ុនកាប់ឈើខុសច្បាប់នៅក្នុងព្រៃច្រើន។
នៅថ្ងៃទី ១៣ ខែឧសភា ពួកគេនឹងធ្វើដំណើរត្រឡប់មកផ្ទះវិញ។ ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា លោកនឹងចូលរួម និងដឹកនាំសកម្មជនការពារព្រៃឈើទាំងនោះផ្ទាល់ ដោយពុំមានការភ័យខ្លាចឡើយ។
លោក អ៊ូ វីរៈ៖ «គាត់នឹងចូល ហើយគាត់នឹងមើល ព្រោះអីអាហ្នឹងជាសិទ្ធិរបស់ប្រជាពលរដ្ឋក្នុងការការពារព្រៃឈើរបស់ជាតិ ហើយយើងយល់ថា អាជ្ញាធរថ្នាក់ខេត្តកោះកុងហ្នឹង គឺពិបាកទុកចិត្តដែរ និងការស៊ើបអង្កេត ដែលអត់ត្រឹមត្រូវមួយ។ យើងពិបាកនឹងទុកចិត្តអាជ្ញាធរខេត្តណាស់ ចំពោះអ្នកដែលប្រព្រឹត្តនូវបទល្មើសព្រៃឈើទាំងឡាយ។ អាជ្ញាធរពុករលួយយកលុយអ្នកបំផ្លាញ គឺជាសារមួយ ការកាប់សម្លាប់លោក ឈុត វុទ្ធី មួយមិនមែនជាការអាចបិទមាត់ពួកយើងបានទាំងអស់គ្នាទេ»។
លោក ដួង ឌឺម ជាតំណាងសកម្មជនការពារធនធានធម្មជាតិ នៅពីខេត្តសៀមរាប។ លោកមានប្រសាសន៍ថា លោកមានសមាជិកចូលរួមចំនួន ៥០ នាក់នឹងជិះឡានឈ្នួលមកឃុំប៉ាក់ខ្លង ស្រុកមណ្ឌលសីមា ខេត្តកោះកុង ដើម្បីតាមដានបទល្មើសព្រៃឈើនៅទីនោះ។
លោក ដួង ឌឺម៖ «ទៅនេះយើងប្រឈមនឹងបញ្ហាដែរ។ ប៉ុន្តែ ខ្ញុំមានភាពតស៊ូ។ បញ្ហារឿងដីធ្លី យើងមានការប្រឈម ការទប់ស្កាត់ពីអាជ្ញាធររហូតដល់គេតាមចាប់ដាក់គុក ដាក់ច្រវាក់ ខ្ញុំអត់ខ្លាចផងហ្នឹង។ សមត្ថកិច្ចដែលលោករារាំងយ៉ាងម៉េចត្រូវតែមានការតស៊ូ បើលោករារាំងបានន័យថា លោកមិនជួយចូលរួមការពារព្រៃឈើទេ មានតែចូលរួមការបំផ្លាញព្រៃឈើណាបង»។
អភិបាលខេត្តកោះកុង លោក ប៊ុន លើត មិនអាចធ្វើអត្ថាធិប្បាយបានទេ ជុំវិញការជួបជុំគ្នារបស់សកម្មជនការពារព្រៃឈើនៅពេលនេះ។ ប៉ុន្តែ អភិបាលស្រុកមណ្ឌលសីមា លោក ស៊ុន គឿន មានប្រសាសន៍ថា លោកនឹងស្វាគមន៍ និងជួយសម្រួលដល់ការជួបជុំគ្នានេះ ប្រសិនបើមាន។
លោក ស៊ុន គឿន៖ «បើគេមកជួបជុំគ្នាខ្ញុំសម្រួលឲ្យគេនិយាយគ្នា ខ្ញុំអត់និយាយច្រើនទេ ឲ្យតែគេមក ហើយយើងមកជួបជុំគ្នា សម្រួលគ្នាទៅ កន្លែងគេប្រជុំគ្នានៅកន្លែងណាពិភាក្សាគ្នាទៅ»។
តំណាងសកម្មជនការពារធនធានធម្មជាតិ ដែលមកពីខេត្តចំនួន ៨ គឺសៀមរាប ក្រចេះ ស្ទឹងត្រែង កំពង់ធំ ព្រះវិហារ ពោធិ៍សាត់ កំពង់ស្ពឺ និងខេត្តកោះកុង នឹងដឹកនាំសមាជិករបស់ខ្លួនទៅកាន់ទីតាំង ដែលលោក ឈុត វុទ្ធី ត្រូវបានគេបាញ់សម្លាប់ ដើម្បីអុជធូបគោរពវិញ្ញាណក្ខន្ធរបស់លោក។
លោក ឈុត វុទ្ធី ត្រូវបានគេបាញ់សម្លាប់ នៅថ្ងៃទី ២៦ មេសា ឆ្នាំ ២០១២ ដោយសារលោកប្រឹងប្រែងការពារព្រៃឈើពីសំណាក់ក្រុមហ៊ុនកាប់បំផ្លាញព្រៃឈើ៕
No comments:
Post a Comment