ក្រុមប្រឹក្សាស្រុក និងខេត្ត មកពីគណបក្ស សម រង្ស៊ី ខេត្តក្រចេះ ធ្វើពហិការមិនចូលរួមក្នុងពិធីប្រកាសសុពលភាពអភិបាលខេត្ត

ដោយ . ឆាំ ឆានី ១៧ ឧសភា ២០២ http://www.kmn-radio.com/

លោក ឡុង រី អ្នកតំណាងរាស្រ្តកូតាគណបក្ស សម រង្ស៊ី មណ្ឌលក្រចេះ មានប្រសាសន៍ថា នៅថ្ងៃទី១៧ ខែឧសភា ឆ្នាំ២០១២ នេះ ក្រសួងមហាផ្ទៃបានកោះហៅសមាជិកក្រុមប្រឹក្សាស្រុក និងខេត្ត ក្រចេះ ឲ្យមកចូលរួមក្នុងពីធីប្រកាសសុពលភាពលោក សរ ចំរ៉ុង ជាអភិបាលខេត្តក្រចេះ ជំនួសលោក ខាំ ភឿន ដែលស្លាប់ទៅកាលពីពេលថ្មីៗនេះ ។

ប៉ុន្តែ សំរាប់សមាជិកក្រុមប្រឹក្សាស្រុក និងខេត្ត កូតាគណបក្ស សម រង្ស៊ី ចំនួន២៣រូប និងធ្វើ​ពហិការ​មិនទៅចូលរួមក្នុងពិធីនេះទេ ។ ដោយហេតុថា ការប្រកាសសុពលភាពនេះ មិនមានប្រយោជន៍​ដល់​ប្រជាពលរដ្ឋម្ចាស់ឆ្នោតឡើយ ហើយលោកនិងសមាជិកក្រុមប្រឹក្សាស្រុក និងខេត្ត កូតាគណបក្ស សម រង្ស៊ី ទាំងអស់ យកពេលវេលានេះទៅជួយប្រជាពលរដ្ឋ ដែលកំពុងរងនូវអំពើអយុត្តិធម៍​ក្នុងការបង្រ្កាប​ដោយហឹង្សាពីសំណាក់រដ្ឋាបាលវិញ ។

គួរំលឹកថា កាលពីថ្ងៃម្សឹលម៉ិញ ១៦ ឧសភា ឆ្នាំ២០១២ ក្រោម​បញ្ជា​របស់​លោក ស ខេង និង​លោក នេត សាវឿន កងកម្លាំងប្រដាប់អាវុធបានធ្វើដំណើរតាម​ឧទ្ធម្ភាគចក្រ ទៅបង្រ្កាបការតវ៉ារបស់​ប្រជា​ពល​រដ្ឋ​​ជាង១០០០គ្រួសាររស់នៅ​ក្នុង​ឃុំ​កំពង់​ដំរី ស្រុក​ឆ្លូង ខេត្ត​ក្រចេះ ដើម្បីយកដីដែល​ប្រជាពល​រដ្ឋរស់នៅជាច្រើនឆ្នាំឲ្យទៅក្រុមហ៊ុនចម្ការ​កៅស៊ូ កាសូទីម​ ។ ក្នុងការបង្រ្កាប​នោះកម្លាំងប្រដាប់អាវុធ​បានបាញ់​ក្មេងស្រីម្នាក់ឈ្មោះ ហេង ចន្ថា អាយុ ១៤ ឆ្នាំ ស្លាប់ ​ពីរ​នាក់​រង​របួស ៥​នាក់​ត្រូវ​បាន​ចាប់​ខ្លួន ​និងរាប់ពាន់នាក់ទៀតកំពុងបង្ខំចិត្តចាកចេញពីលំនៅឋានទៅរស់ក្នុងព្រៃ ក្រោមដំណត់ទឹកភ្លៀង​ យ៉ាងវេទនាបំផុត​ ។

ការចោទប្រកាន់របស់រដ្ឋាភិបាល មកលើប្រជាពលរដ្ឋថា បានបង្កើតតំបន់អប​គម ដែលមានឈ្មោះ ប៊ុន រដ្ឋា ជាមេខ្លោង នេះ ត្រូវបានមន្រ្តីសិទ្ឋិមនុស្ស និងគណបក្ស សម រង្ស៊ី ធ្វើការថ្កោលទោស និងទាមទារ​ឲ្យចាប់ខ្លួនជនដៃដល់មកផ្តន្ទាទោស ។

ប្រភពពីមន្រ្តីក្នុងទីស្តីការគណ:រដ្ឋមន្រ្តី ដែលសុំមិនឲ្យបញេ្ចញឈ្មោះបានបង្ហើប​ប្រាប់ថា យុទ្ឋសាស្រ្ត​ថ្មីរបស់រដ្ឋាភិបាលក្នុងការបង្រ្កាបប្រជាពលរដ្ឋដែលហ៊ានចេញមុខតវ៉ាគឺ ការបង្រ្កាបដោយហឹង្សា និងប្តូរបទចោទប្រកាន់ពីកម្រិតស្រាល ទៅជាបទឧក្រិដ្ឋ ។ ព្រោះថា បើគ្រាន់តែប្រឌិត​នូវ​បទ​ចោទ​ប្រកាន់ស្រាល់ៗ និងទប់ស្កាត់ការតវ៉ាដោយអហឹង្សា មិនបាញ់សម្លាប់ដូចពេលនេះទេ គឺប្រជាពលរដ្ឋលោកមិនខ្លាច ហើយរដ្ឋាភិបាលមិនអាចប្លន់ដីយកទៅឲ្យក្រុមហ៊ុនបានស្រួលៗ ដូច្នេះហើយបានជារដ្ឋាភិបាលបង្កើតយុទ្ឋសាស្ត្រន៍ថ្មីគឺប្រឌិតបទចោទប្រកាន់ថ្នាក់ឧក្រិដ្ឋ និងបង្រ្កាបដោយហឹង្សាបែបនេះ ។

សូមញ្ជាក់ថា ការធ្វើដំណើរចូលទៅក្នុងតំបន់ក្នុង​ឃុំ​កំពង់​ដំរី ស្រុក​ឆ្លូង ខេត្ត​ក្រចេះ ជាតំបន់ដែល​កើតហេតុ គឺយើងត្រូវធ្វើដំណើរដោយជិះក្បូននិងទាញខ្សែររ៉ត ឆ្លងព្រែកឆ្លូង ព្រែកតេ និងព្រែកឈ្លីក តែនៅពេលដែលក្រុមកម្លាំងប្រដាប់អាវុធចូលទៅបង្រ្កាបប្រជាពល​រដ្ឋស្លូតត្រង់ គឺក្រុម​កម្លាំងប្រដាប់​អាវុធ​ បានកាត់ខ្សែររ៉តចោល ធ្វើឲ្យអ្នកឃ្លាំមើលពីការរំលោភសិទ្ឋិមនុស្ស និងអ្នកពត៍មានមិនអាចចូល ទៅតំបន់នោះបាន ដែលជាហេតុធ្វើឲ្យក្រុមកម្លាំងប្រ​ដា​ប់​អាវុធមានភាពងាយស្រួល​ក្នុងការប្រើអំពើ​ហឹង្សា​ដល់ប្រជាពលរដ្ឋ ។