 |
| កត្តាហិរញ្ញវត្ថុជំរុញឲ្យសមាជិកគ្រួសារមានឯករាជ្យពីមេគ្រួសារ ក្នុងការជ្រើសរើសគណបក្សនយោបាយ (RFI/Siv Channa) |
ថ្ងៃ អាទិត្យ 06 ឧសភា 2012
ដោយ គី សុខលីម
Radio France Internationale
អង្គការសង្កេតការណ៍បោះឆ្នោត Comfrel បានសង្កេតឃើញថា មេគ្រួសារលែងមានឥទ្ធិពលលើសំឡេងឆ្នោតទៀតហើយសម្រាប់ការបោះឆ្នោតនាពេលខាងមុខនេះ។ កាលពីអាណត្តិមុនៗ សមាជិកក្នុងគ្រួសារនីមួយៗតែងតែបោះឆ្នោតជ្រើសរើសគណបក្សនយោបាយតាមមេគ្រួសារដែលមានឥទ្ធិពលហិរញ្ញវត្ថុ។
លោក គល់ បញ្ញា នាយកប្រតិបត្តិនៃអង្គការសង្កេតការណ៍បោះឆ្នោតនៅក្នុងប្រទេសកម្ពុជា Comfrel បានអះអាងនៅថ្ងៃអាទិត្យទី៦ខែឧសភានេះថា មេគ្រូសារដែលធ្លាប់តែមានឥទ្ធិពលលើការជ្រើសរើសគណបក្សនយោបាយនោះ ឥឡូវ មិនសូវមានឥទ្ធិពលដូចពីមុនទៀតឡើយ។
កាលពីអាណត្តិមុនៗ ជាពិសេស ចាប់តាំងពីអាណត្តិឆ្នាំ១៩៩៣ដល់អាណត្តិបោះឆ្នោតឃុំសង្កាត់ ឆ្នាំ២០០៧និងអាណត្តិបោះឆ្នោតជាតិឆ្នាំ២០០៨ កន្លងមក គ្រួសារខ្មែរមួយចំនួនធំបានសម្រេចចិត្តបោះឆ្នោតជ្រើសរើសគណបក្សនយោបាយតាមឪពុកដែលជាមេគ្រួសារ។ ប៉ុន្តែនិន្នាការនេះបានថយចុះពីអាណត្តិមួយទៅអាណត្តិមួយ។
លោក គល់ បញ្ញា ដែលជាអ្នកជំនាញសង្កេតការណ៍បោះឆ្នោតតាំងពីច្រើនអាណត្តិមកហើយនោះ បានពន្យល់ថា ការថយចុះនៃនិន្នាការនេះគឺបណ្តាលមកពីមូលហេតុចម្បងតែមួយគត់គឺកត្តាហិរញ្ញវត្ថុ។ អ្នកជំនាញរូបនេះបានពន្យល់លម្អិតថា៖ «កាលពីពេលមុន នៅក្នុងសង្គមខ្មែរ ឪពុកភាគច្រើនគឺជាអ្នករកលុយកាក់សម្រាប់ចិញ្ចឹមផ្គត់ផ្គង់គ្រួសារ។ ប៉ុន្តែស្ថានភាពសេដ្ឋកិច្ចនៅក្នុងប្រទេសកម្ពុជាមានការប្រែប្រួល មានន័យថា នាពេលបច្ចុប្បន្ននេះ សមាជិកក្នុងគ្រួសារសុទ្ធតែមានការងារធ្វើរៀងៗខ្លួន។ ដូច្នេះ ពួកគេសម្រេចចិត្តជ្រើសរើសគណបក្សនយោយបាយដោយខ្លួនឯង»។
លទ្ធផលជំរឿនសហគ្រាសចុងក្រោយបានបង្ហាញថា ប្រទេសកម្ពុជាមានចំនួនសហគ្រាសកន្លះលានដោយប្រើប្រាស់កម្លាំងពលកម្មចំនួន១លាន៧សែននាក់។ ក្នុងចំណោមចំនួននេះ ស្ត្រីមានចំនួនជាង១លាននាក់ ពោលគឺស្មើនឹង៦១%រីឯបុរសតំណាងអោយតែ៣៩%ប៉ុណ្ណោះ។ បើផ្អែកលើតួលេខនេះ គេអាចនិយាយបានថា ស្ត្រីលែងពឹងពាក់ទាំងស្រុងលើចំណូលរបស់ស្វាមីទៀតហើយ។
ជាការពិត និន្នាការបោះឆ្នោតតាមមេគ្រួសារបានថយចុះច្រើនមែននៅទីក្រុងភ្នំពេញប៉ុន្តែ នៅជនបទ ការបោះឆ្នោតតាមគ្នានៅតែមានច្រើនដែរ។
ក្រៅពីការបោះឆ្នោតតាមមេគ្រួសារ លោក គល់ បញ្ញា សង្កេតឃើញថា អំពើហិង្សាមុនពេលបោះឆ្នោតរវាងអ្នកគាំទ្របក្សមួយនិងបក្សមួយទៀតមានការថយចុះគួរអោយកត់សម្គាល់បើប្រៀបធៀបទៅនឹងអាណត្តិមុនៗ។ លោក បញ្ញា បានបន្តទៀតថា៖ «អំពើហិង្សាមានការថយចុះមែនប៉ុន្តែការរើសអើងជាពាក្យសម្តីរវាងសកម្មជនគណបក្សនយោបាយនៅតែមានដដែល។ អ្វីដែលជាការវិវឌ្ឍន៍ល្អគឺនៅត្រង់ថា កាលពេលពីមុន ពួកគេយកដំបងឬអាវុធគំរាមដាក់គ្នាប៉ុន្តែ ឥឡូវនេះ ពួកគេគ្រាន់តែបោះសម្តីដាក់គ្នាទៅវិញទៅមកប៉ុណ្ណោះ»។
សូមបញ្ជាក់ថា ប្រទេសកម្ពុជានឹងរៀបចំការបោះឆ្នោតបោះឆ្នោតឃុំសង្កាត់នៅថ្ងៃទី៣ខែមិថុនាខាងមុខនេះ និងការបោះឆ្នោតតំណាងរាស្រ្តនៅឆ្នាំ២០១៣។ ចាប់ពីពេលនេះតទៅ គេសង្កេតឃើញថា សកម្មជនគណបក្សនយោបាយគ្រប់គណបក្សទាំងអស់បាននាំគ្នាចុះមូលដ្ឋានលន់តួអង្វរសុំការគាំទ្រពីប្រជាពលរដ្ឋ៕
2 comments:
81% of 2000 people = 1620 persons agree to be interviewed, so the other 380 persons do not give the interview, they are scare for their life if they speak out against Hun Sen government, meaning they won't vote for Hun Sen they may be the people from opposition party.Thus,67% out of 1620 will vote for Hun Sen which is amount to 1085 persons only. Then 1085 is about 54% out of 2000 people. Now it's time for him not to bark, he should step down.
ការបោះឆ្នោតបច្ចុប្បន្នគឺជាអន្ទាក់របស់យួនដាក់អោយខ្មែរចូលទៅក្នុងធ្នាក់របស់ពួកវា, កាលណាយើងចូលទៅបោះឆ្នោតមានន័យថាយើងបានជួយអោយអា ហ៊ុន សែន ដែលជាកញ្ជៈយួនបន្តកាន់អំណាចស្របច្បាប់តទៅទៀតហើយទុកឧកាសអោយយួនចូលមលលេបយកទឹកដីខ្មែរ។
Post a Comment