ឃាត់ខ្លួនជនសង្ស័យបាញ់ប្រហារមន្ត្រីប៉េអឹម និងប្រធានអង្គការការពារបរិស្ថាននៅខេត្តកោះកុង
02 May 2012
Koh Santepheap
ខេត្តកោះកុង ៖ ជនសង្ស័យម្នាក់ដែលគេអះអាងថា បាញ់សម្លាប់មន្ត្រីប៉េអឹម និងប្រធានអង្គការការពារបរិស្ថានក្នុងបុព្វហេតុរារាំងដំណើរអ្នកកាសែតបរទេស២នាក់ (នារីខ្មែរម្នាក់ និងនារីអ៊ុយក្រែនម្នាក់) មិនឱ្យចូលទៅក្នុងជំរំស្តុកឈើប្រណីតនោះត្រូវបានកម្លាំងប៉េអឹមស្វែងរកឃាត់ខ្លួនបានហើយ កាលពីវេលាម៉ោងជាង៣រសៀលថ្ងៃទី១ ឧសភា ២០១២ នៅជិតក្រុមហ៊ុនកាប់ឈើតែម្តង គឺដេប៉ូទី១ ហៅវាល៣ ។
ខ្មាន់កាំភ្លើងដែលសង្ស័យថា សម្លាប់មន្ត្រីប៉េអឹម និងប្រធានអង្គការការពារបរិស្ថានដែលឃាត់ខ្លួននេះឈ្មោះរ៉ាន់ បូរ័ត្ន អាយុ៣១ឆ្នាំ ជាបុគ្គលិកក្រុមហ៊ុនកាប់ឈើខាងលើ ទទួលបន្ទុកការងារសន្តិសុខ ។ ខ្មាន់កាំភ្លើងឈ្មោះរ៉ាន់ បូរ័ត្ន បាននិយាយថា ក្នុងហេតុការណ៍បាញ់ប្រហារនាំឱ្យស្លាប់២នាក់នោះ គឺមានសាក្សីដែលបានឃើញព្រឹត្តិការណ៍នេះចំនួន៤នាក់ទៀតជាអ្នកធ្វើការក្នុងក្រុមហ៊ុនកាប់ឈើដែរ... រ៉ាន់ បូរ័ត្ន មិនទាន់និយាយអ្វីទូលំទូលាយនៅឡើយទេក្នុងរឿងនេះ ។
គួររំលឹកថា មន្ត្រីប៉េអឹមការពារជំរំស្តុកឈើម្នាក់ ត្រូវបានគេបាញ់ស្លាប់ដេកដួលនៅនឹងកន្លែង និងប្រធានអង្គការការពារបរិស្ថានម្នាក់ទៀត ក៏ត្រូវគេបាញ់ស្លាប់នៅក្នុងរថយន្តផងដែរ បង្កឱ្យមានការភ្ញាក់ផ្អើល និងរន្ធត់យ៉ាងខ្លាំង គឺមន្ត្រីប៉េអឹមដេកស្លាប់ក្បែររថយន្តឡង់គ្រីស្ស័រ ស៊េរីចាស់ ពណ៌ក្រហម រីឯប្រធានអង្គការការពារបរិស្ថាន ដែលជាអ្នកបើកបរស្លាប់ក្នុងរថយន្តនេះតែម្តង ខណៈដឹកអ្នកកាសែតបរទេសម្នាក់អ្នកកាសែតកម្ពុជាម្នាក់ទៅថតយករូបភាពនៅជំរំស្តុកឈើប្រណីត ក្នុងព្រៃសោង ខេត្តកោះកុង ។
ការដោះស្រាយបញ្ហាដោយប្រើប្រាស់គ្រាប់កាំភ្លើងរៀងៗខ្លួន ហើយពិឃាតជីវិតមនុស្សនេះ បានកើតឡើងកាលពីវេលាម៉ោង១២ និង៣០នាទីរសៀលថ្ងៃទី២៦ មេសា ២០១២ នៅកណ្តាលទ្រូងព្រៃ ស្ថិតក្នុងភូមិកោះប៉ោ ឃុំប៉ាក់ខ្លង ស្រុកមណ្ឌលសីម៉ា ។ មន្ត្រីប៉េអឹមដែលស្លាប់ឈ្មោះអុិន រតនា អាយុ៣១ឆ្នាំ ជាអ្នកយាមកាមនៅជំរំស្តុកឈើប្រណីត ដេកស្លាប់ក្បែររថយន្តឡង់គ្រីស្ស័រ ស៊េរីចាស់ ពណ៌ក្រហម ពាក់ស្លាកលេខ NGO101,2-100 ដោយមានកាំភ្លើងអាកានៅក្នុងដៃផង ហើយនៅដើមទ្រូងមានត្រូវគ្រាប់២គ្រាប់ ។
ចំណែកអ្នកស្លាប់នៅក្នុងរថយន្តឡង់គ្រីស្ស័រ ឈ្មោះឈុត វុទ្ធី អាយុប្រមាណ៤០ឆ្នាំ ដេកស្លាប់ក្នុងរថយន្ត ដោយគ្រាប់កាំភ្លើងទម្លុះជញ្ជាំងត្រូវ១គ្រាប់ ហើយអង្គុយក្នុងរថយន្តក្បែរនោះ គឺនារីអ្នកកាសែតជនជាតិខ្មែរបម្រើការឱ្យកាសែតឌឹ ឃេមបូឌា ដេលី ឈ្មោះផន បុប្ផា អាយុ២៧ឆ្នាំ មិនមានរងរបួសអ្វីទេ និងអ្នកកាសែតស្រីបរទេសម្នាក់ទៀត ជនជាតិអ៊ុយក្រែនឈ្មោះអូឡេស៊ីយ៉ា ឡូភី អាយុ២៧ឆ្នាំ ក៏មិនមានរងរបួសអ្វីដែរ ពេលកើតហេតុបាញ់ប្រហារនារីទាំង២នាក់ បានរត់ទៅសំងំពួនក្នុងព្រៃទាំងរាងកាយញ័រចំប្រប់ ។ ពួកគេទាំង៣នាក់ បានចូលទៅក្នុងទ្រូងព្រៃ ដើម្បីប្រមាញ់ យករូបភាពជំរំស្តុកឈើប្រណីត (កន្លែងកើតហេតុ) ដែលស្ថិតនៅចម្ងាយប្រមាណ៤០គីឡូម៉ែត្រពីក្រុងខេមរភូមិន្ទ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
--------
ប្រតិបត្តិការ ចុះស៊ើបអង្កេត ករណីស្លាប់លោក ឈុត វុទ្ធី និងលោក អ៊ិន រតនា ចាប់ផ្តើមនៅ ព្រឹកថ្ងៃនេះហើយ
Wednesday, 02 May 2012
ដោយ៖ អេង គឹមជាង
DAP-news
ភ្នំពេញ៖ សេចក្តីសម្រេច បង្កើតគណៈកម្មការ ចម្រុះមួយដែលមាន សមាសភាពចំនួន៥រូប ដើម្បីស៊ើបអង្កេតករណីបាញ់សម្លាប់ ប្រធានអង្គការការពារធនធានធម្មជាតិ លោក ឈុត វុទ្ធី និងមន្រ្តីអាវុធហត្ថឈ្មោះ អ៊ិន រតនា រួចមកនោះ គណៈកម្មការនេះបានចាប់ផ្តើមប្រតិបត្តិការ របស់ខ្លួនហើយ។
អនុប្រធានអង្គភាពព័ត៌មាន និងប្រតិកម្មរហ័ស នៃទីស្ដីការគណៈរដ្ឋមន្ត្រី និងជាសមាជិក គណៈកម្មការចម្រុះស៊ើបអង្កេត លោក ទិត សុធា បានប្រាប់មជ្ឈមណ្ឌលព័ត៌មានដើមអម្ពិលនៅថ្ងៃទី២ ខែឧសភា ឆ្នាំ២០១២ថា ក្រុមការងាររបស់គណៈកម្មការចម្រុះ បានចាប់ផ្តើមធ្វើការស៊ើបអង្កេតទៅដល់កន្លែងកើតហេតុហើយ បន្ទាប់ពីមានករណីបាញ់សម្លាប់ លោក ឈុត វុទ្ធី និងលោក អ៊ិន រតនា កាលពីថ្ងៃទី២៦ ខែមេសា ដើម្បីធ្វើការស្រាវជ្រាវលើករណីនេះឲ្យច្បាស់លាស់ថា មានមូលហេតុអ្វីបានជាមានការបាញ់សម្លាប់កើតមានឡើង។
លោកថា ការស៊ើបអង្កេតនេះផងដែរ ក៏មានការជួបពិភាក្សាជាមួយមន្រ្តីជំនាញប្រចាំខេត្តជាច្រើនរូបទៀត« នៅព្រឹកថ្ងៃទី២ ខែឧសភានេះ គណៈកម្មការ បានចាប់ផ្តើមហើយដើម្បីរកភស្តុតាងបញ្ជាក់បន្ថែមទៀតអំពីការបាញ់សម្លាប់នេះ »។
គណៈកម្មការចម្រុះស៊ើបអង្កេត ករណីស្លាប់លោក ឈុត វុទ្ធី និងលោក អ៊ិន រតនា មានសមាសភាពដូចជា
ទី៖១ លោកឧត្តមសេនីយ៍ឯក ម៉ក់ ជីតូ ប្រធាននាយកដ្ឋានកណ្ដាលយុត្តិធម៌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ (ប្រធាន)
២៖លោកឧត្តមសេនីយ៍ទោ ស៊ិន សូផាន្នី មេបញ្ជាការរង និងជាស្នងការ នៃស្នងការដ្ឋានស្រាវជ្រាវ និងយុត្តិធម៌ បញ្ជាការដ្ឋានកងរាជអាវុធហត្ថលើផ្ទៃប្រទេស (អនុប្រធាន)
៣៖លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័ស នៃទីស្ដីការគណៈរដ្ឋមន្ត្រី (សមាជិក)
៤៖លោក គឹម សន្ដិភាព អគ្គនាយករង នៃអគ្គនាយកដ្ឋានបច្ចេកទេស ក្រសួងយុត្តិធម៌ (សមាជិក)
៥៖លោក សោម សាបាន អនុប្រធាននាយកដ្ឋាន ទទួលពាក្យបណ្ដឹង និងអង្កេត ស្រាវជ្រាវ នៃក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច (សមាជិក)។
សូមបញ្ជាក់ថា ជនសង្ស័យម្នាក់ដែលគេអះអាងថា បាញ់សម្លាប់មន្ត្រីប៉េអឹម និងប្រធានអង្គការការពារបរិស្ថានក្នុងបុព្វហេតុរារាំងដំណើរ អ្នកកាសែតបរទេស២នាក់ ត្រូវបានកម្លាំង ប៉េអឹមស្វែងរកឃាត់ខ្លួនបានហើយ កាលពីវេលាម៉ោងជាង៣រសៀលថ្ងៃទី១ ឧសភា ២០១២ ។
ខ្មាន់កាំភ្លើងដែលសង្ស័យថា សម្លាប់មន្ត្រីប៉េអឹម និងប្រធានអង្គការការពារបរិស្ថាន ដែលឃាត់ខ្លួននេះឈ្មោះ រ៉ាន់ បូរ័ត្ន អាយុ៣១ឆ្នាំ ជាបុគ្គលិកក្រុមហ៊ុនកាប់ឈើខាងលើ ទទួលបន្ទុកការងារសន្តិសុខ ។ ខ្មាន់កាំភ្លើងឈ្មោះរ៉ាន់ បូរ័ត្ន បាននិយាយថា ក្នុងហេតុការណ៍បាញ់ប្រហារនាំឱ្យស្លាប់២នាក់នោះ គឺមានសាក្សីដែលបានឃើញព្រឹត្តិការណ៍នេះចំនួន៤នាក់ទៀតជាអ្នក ធ្វើការក្នុងក្រុមហ៊ុនកាប់ឈើដែរ... រ៉ាន់ បូរ័ត្ន មិនទាន់និយាយអ្វីទូលំទូលាយ នៅឡើយទេក្នុងរឿងនេះ ៕
Subscribe to:
Post Comments (Atom)
No comments:
Post a Comment