Friday, 18 May 2012 12:02
គឹម យុទ្ធណា និង Shane Worrell
The Phnom Penh Post
ភ្នំពេញៈ គណបក្សប្រជាជនកម្ពុជា ត្រូវបានគេចោទថា បានកាត់ប្រាក់ខែ របស់នគរបាលជាតិ យកទៅបម្រើដល់ការបោះឆ្នោត ឃុំ សង្កាត់ នៅថ្ងៃទី ៣ ខែមិថុនា និងការបោះឆ្នោតជាតិ ក្នុងឆ្នាំ ២០១៣ ខាងមុខ។ នេះបើតាមការអះអាងរបស់ក្រុមមន្រ្តីនគរបាលនៅអគ្គស្នងការនគរបាលជាតិ។
មន្ត្រីនគរបាលជាតិម្នាក់ ដែលសុំលាក់អត្តសញ្ញាណ ដោយសារតែបារម្ភពីតួនាទីរបស់ខ្លួន បានអះអាងថា ប្រាក់ខែរបស់មន្ត្រីនគរបាល ចាប់ពីមន្ត្រីថ្នាក់អនុប្រធាននាយកដ្ឋានរហូតដល់ មន្ត្រីនគរបាលធម្មតាត្រូវបានកាត់តាមចំនួនតិច ឬច្រើន ទៅតាមតួនាទីរបស់នគរបាលទាំងនោះ។ លោកបាននិយាយកាលពីម្សិលមិញថា ការកាត់ប្រាក់ខែនេះត្រូវបានថ្នាក់ដឹកនាំប្រាប់ថា យកលុយចូលបក្សដើម្បីបម្រើការឃោសនាបោះឆ្នោត ឲ្យគណបក្សប្រជាជន។ ប្រភពដដែលបានបន្ថែមថា មន្ត្រីថ្នាក់អនុប្រធាននាយកដ្ឋាន ត្រូវបានកាត់ចំនួន ១០ម៉ឺនរៀល ថ្នាក់ប្រធានការិយាល័យ ៥ ម៉ឺនរៀល មន្ត្រីរងការិយាល័យ ៣ ម៉ឺនរៀល នាយផ្នែកការិយាល័យ ២ ម៉ឺនរៀល នាយរងផ្នែកការិយាល័យ១ម៉ឺនរៀល និងមន្ត្រីនគរបាលធម្មតាមួយម៉ឺនរៀល ដោយប្រាក់ខែទាំងនេះ ត្រូវកាត់ ជារៀងរាល់ខែ ចាប់ពីខែមេសាកន្លងមកនេះរហូតទៅដល់ការបោះឆ្នោតថ្នាក់ជាតិឆ្នាំ ២០១៣ ខាងមុខ។
មន្ត្រីនគរបាលរូបនេះ បញ្ជាក់ថា៖ «ខ្ញុំមិនពេញចិត្តចំពោះការកាត់នេះទេ ស្របពេលដែលប្រាក់ខែរបស់ខ្ញុំ ក៏ដូចជាមន្ត្រីរាជការ និងគ្រូបង្រៀនទទួលបានតិចស្រាប់ទៅហើយនោះ»។
មន្ត្រីនគរបាលម្នាក់ទៀតដែលសុំលាក់អត្តសញ្ញាណដែរនោះក៏អះអាង ថា មានការកាត់ប្រាក់ខែដូចគ្នានេះដែរ។ លោកបានប្រាប់ឲ្យដឹងថា៖ «អារឿងកាត់លុយនិងវាជារឿងមួយ ចំណែកឯការចំណាយលុយខ្លួនឯង ជារឿងមួយទៀត ពេលដែលខ្ញុំចុះទៅមូលដ្ឋានដើម្បីជួបនឹងសមាជិកបក្សប្រជាជន។ ដូច្នេះការចំណាយទៅវិញ វាគ្មានតម្លាភាពសោះ។ ខ្ញុំមិនដឹងថា ថា្នក់ដឹកនាំយកលុយទាំងអស់នោះទៅណាទេ?»។
លោកបានប្រាប់ឲ្យដឹងទៀតថា បច្ចុប្បន្ន មានមន្ត្រីនគរបាលប្រមាណ ៧០ ភាគរយ បានយកពេលវេលា និងម៉ោងធ្វើការរបស់រដ្ឋចុះទៅធ្វើការងារបម្រើឲ្យបក្សនៅតាមមូលដ្ឋាន និងបានប្រើប្រាស់ធនធានរបស់អង្គភាពថែមទៀតផង ខណៈដែលការបោះឆ្នោតក្រុមប្រឹក្សាឃុំ សង្កាត់ កាន់តែខិតជិតមកដល់។
មិនអាចសុំការពន្យល់ពីលោក នេត សាវឿន អគ្គស្នងការនគរបាលជាតិបានទេ កាលពីថ្ងៃម្សិលមិញ ខណៈដែលលោក គៀត ច័ន្ទថារិទ្ធ មន្ត្រីអ្នកនាំពាក្យអគ្គស្នងការនគរបាលជាតិមិនលើកទូរស័ព្ទ។
ទោះយ៉ាងណា លោក ខៀវ សុភ័គ មន្ត្រីនំាពាក្យក្រសួងមហាផ្ទៃ បានបដិសេធ ចំពោះការចោទប្រកាន់នេះ ដោយថ្លែងថា គណបក្សប្រជាជន គ្មានគោលការណ៍ណាមួយ កាត់ប្រាក់ខែមន្ត្រីរាជការនោះទេ។ ប៉ុន្តែយ៉ាងណាក៏ដោយ លោកបានគូសបញ្ជាក់ថា៖«វាពិតជាគ្មានគោលការណ៍កាត់លុយចូលបក្សបែបនោះទេ ប៉ុន្តែមានការស្ម័គ្រចិត្តដោយខ្លួនឯង ហើយពួកគាត់ មានសិទ្ធិក្នុងការធ្វើនយោបាយ ដែលមានចែងក្នុងរដ្ឋធម្មនុញ្ញ»។
លោក សុន ឆ័យ តំណាងរាស្រ្តគណបក្ស សម រង្ស៊ី បានថ្លែងថា មន្រ្តីរាជការស៊ីវិល បានប្រឈមនឹងសម្ពាធជាច្រើន ឲ្យគាំទ្រគណបក្សប្រជាជនកម្ពុជា។ លោកថ្លែងថា៖ «នេះជាបញ្ហាធំ។ គណបក្សប្រជាជន កំពុងរុកកួនមន្រ្តីរាជការ ជាពិសេសនគរបាល និងគ្រូបង្រៀន ឲ្យចូលរួមគណបក្សរបស់ពួកគេ។ ប្រសិនបើគេមិនចូលរួម ពួកគេនឹងមិនត្រូវបានដំឡើងតំណែងឡើយ»។ លោកបន្ថែមថា ពួកគេនឹងត្រូវកត់សម្គាល់ ហើយនឹងត្រូវទទួលរងការប្រតិបត្តិអាក្រក់បំផុត។
លោកបន្ថែមថា៖«ពួកគេក៏ត្រូវបានបង្ខំឲ្យបង់ប្រាក់ដែរ។ ពួកគេគ្មានជម្រើសទេ។ សម្ពាធប្រភេទនេះបង្កឲ្យមានសម្ពាធជាច្រើនលើប្រព័ន្ធ។ រាល់មន្រ្តីរាជការទាំងអស់ត្រូវបានបង្ខំឲ្យរកមធ្យោបាយ ផ្សេងទៀត ដើម្បីរកប្រាក់ចូលបក្ស»។
លោក អ៊ូ វីរៈ ប្រធានមជ្ឈមណ្ឌលសិទិ្ធមនុស្សកម្ពុជា បានថ្លែងថា ការចោទប្រកាន់របស់នគរបាលមិនមែនជារឿងគួរឲ្យភ្ញាក់ផ្អើលទេ ចំពោះលោក។ លោកបានលើកឡើងថា៖ «វាមានជាទូទៅ។ ខ្ញុំដឹងពីរឿងទាំងនេះដែលកំពុងកើតឡើង»។
លោក គល់ បញ្ញា នាយកប្រតិបតិ្តនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ ខុម ហ្វ្រែល បានថ្លែងថា គណបក្សនយោបាយ មានសិទិ្ធប្រមូលប្រាក់ពីសមាជិក ប៉ុន្តែកង្វះនៃគោលការណ៍ផ្ទៃក្នុងដែលគូសបញ្ជាក់ពីរបៀបប្រមូល ប្រាក់ បាននាំឲ្យមានបញ្ហានេះ។ លោកបញ្ជាក់ថា៖ «អ្នកនយោបាយត្រូវបង់ប្រាក់ ដើម្បីធ្វើយុទ្ធនាការឃោសនា ប៉ុន្តែពួកគេត្រូវកំណត់ថា តើចំនួនប៉ុន្មានដែលពួកគេគួរបង់។តើ[សមាជិក]មានកាតព្វកិច្ចឬ អត់? ហើយកាតព្វកិច្ចអ្វី? វាមិនច្បាស់នោះទេ។ ពួកគេត្រូវបង្កើនតម្លាភាព»
Subscribe to:
Post Comments (Atom)
No comments:
Post a Comment