សុភាសិតផ្សេងៗ
នេះជាសុភាសិត របស់ព្រះបាទសាឡូម៉ូន,
ចងក្រងឡើង ដោយមន្ត្រី របស់ព្រះបាទហេសេគា,
ជាស្ដេចស្រុកយូដា។
សិរីរុងរឿងរបស់ព្រះជាម្ចាស់
ស្ថិតនៅលើ គំរោងការ ដ៏លាក់កំបាំង,
រីឯ សិរីរុងរឿងរបស់ស្ដេច
ស្ថិតនៅលើសុភនិច្ឆ័យ។
ផ្ទៃមេឃខ្ពស់យ៉ាងណា, ផែនដីជ្រៅយ៉ាងណា,
ព្រះហឫទ័យរបស់ស្ដេច ក៏ដូច្នោះដែរ,
គ្មាននរណាអាចយល់បានទេ។
បើជាងទង ចង់សិត ធ្វើវត្ថុសិល្បៈអ្វីមួយ,
តោងបន្សុទ្ធប្រាក់ ជាមុនសិន។
បើស្ដេចចង់ពង្រឹង រាជសម្បត្តិដោយយុត្តិធម៌,
តោងដកមនុស្សអាក្រក់ ចេញអោយឆ្ងាយ
ពីព្រះភក្ត្ររបស់ព្រះអង្គ ជាមុនសិន។
កុំធ្វើព្រហើន នៅចំពោះព្រះភក្ត្រស្ដេច,
ហើយ ក៏កុំចង់បានកន្លែង របស់អ្នកធំដែរ។
ប្រសិនបើគេប្រាប់អ្នកថា
«សូមអញ្ជើញមកអង្គុយនៅទីនេះ»
ប្រសើរជាង គេបំបាក់មុខអ្នក នៅចំពោះមុខអ្នកធំ។
កុំប្រញាប់យករឿងរ៉ាវអ្វី ដែលអ្នកបានឃើញ
ទៅប្ដឹងចៅក្រមឡើយ,
ដ្បិតប្រសិនបើ ចុងចោទ ទំលាក់កំហុសមកលើអ្នកវិញ,
តើអ្នកដោះសាខ្លួន ដូចម្ដេចបាន?
បើមានទំនាស់ ជាមួយអ្នកជិតខាង,
ចូរជជែកគ្នា រកខុសត្រូវទៅ,
តែ កុំបង្ហើបសេចក្ដី ដែលអ្នកក្រៅ បានខ្សឹបប្រាប់អ្នកឡើយ,
ក្រែងលោអ្នកនោះ ដឹងឮគេ ដៀលអ្នក,
ហើយអ្នក ត្រូវអាម៉ាស់ងើបមុខមិនរួច។
និយាយត្រូវតាមកាលៈទេសៈ
មានតម្លៃ ដូចបន្តោងពេជ្រ ព្យួរជាប់នឹងខ្សែកមាស ឬប្រាក់។
យកចិត្តទុកដាក់ ស្ដាប់ពាក្យស្ដីប្រដៅ របស់អ្នកប្រាជ្ញ
ប្រៀបដូចជាមានចិញ្ចៀនមាស ឬខ្សែកធ្វើពីមាសសុទ្ធ។
អ្នកនាំសារស្មោះត្រង់
រមែងធ្វើអោយម្ចាស់
របស់ខ្លួនសប្បាយចិត្ត
ដូចទឹកដ៏ត្រជាក់នៅរដូវប្រាំង។
អ្នកណាអួត ពីទាន ដែលខ្លួន មិនបានធ្វើ,
អ្នកនោះ ប្រៀបដូចជាពពក
និងខ្យល់
ដែលមិនបង្អុរទឹកភ្លៀង។
ការអត់ធ្មត់ រមែងបន្ទន់ចិត្តមេដឹកនាំ,
ហើយពាក្យសំដីទន់ភ្លន់ អាចឈ្នះចិត្តរឹងរូស។
បើអ្នករកបានទឹកឃ្មុំ កុំបរិភោគច្រើនហួស។
បើមិនដូច្នេះទេ អ្នកនឹងធុញ,
ហើយចង់ក្អួតមកវិញផង។
ចូរកុំទៅផ្ទះអ្នកជិតខាង ញឹកញាប់ពេក
ក្រែងគេធុញទ្រាន់ រហូតដល់ស្អប់អ្នក។
អ្នកណាចោទប្រកាន់អ្នកដទៃទាំងបំពាន,
អ្នកនោះ ប្រៀបដូចជាវាយគេនឹងព្រនង់,
កាប់គេ នឹងដាវ ឬបាញ់គេ នឹងព្រួញមុតស្រួច។
នៅពេលមានគ្រាអាសន្ន ទុកចិត្តលើមនុស្សក្បត់
ប្រៀបដូចជា បរិភោគអាហារ នៅពេលធ្មេញរង្គើ
ឬឈរលើជើងកំបាក់។
ច្រៀងអោយមនុស្សមានទុក្ខស្ដាប់
ប្រៀបដូចជាដោះអាវនៅពេលរងា
ឬដូចចាក់ទឹកខ្មេះលើមុខរបួស។
ប្រសិនបើខ្មាំងសត្រូវរបស់អ្នកឃ្លាន
ចូរយកអាហារទៅអោយគេបរិភោគ។
បើគេស្រេក ចូរយកទឹកអោយគេផឹកផង។
ធ្វើដូច្នេះ ប្រៀបដូចជា ប្រមូលរងើកភ្លើង
គរពីលើក្បាលរបស់គេ,
ហើយព្រះអម្ចាស់ នឹងប្រទានរង្វាន់ដល់អ្នក។
ខ្យល់បក់ពីទិសខាងត្បូង រមែងនាំទឹកភ្លៀងមកជាមួយផង,
រីឯការនិយាយដើមគេ រមែងនាំអោយគេខឹង។
ស៊ូរស់នៅតាមសំយាបផ្ទះ ជាជាងរស់នៅ
ក្នុងផ្ទះជាមួយស្ត្រីពូកែឈ្លោះ។
ដំណឹងល្អ មកពីស្រុកឆ្ងាយ
ប្រៀបបាន នឹងទឹកត្រជាក់ មកផ្សើមបំពង់កស្ងួត។
អណ្ដូងទឹកល្អក់ ឬប្រភពទឹកក្រខ្វក់
ប្រៀបដូច ជាមនុស្សសុចរិត
ដែលយកតំរាប់តាមមនុស្សទុច្ចរិត។
បរិភោគទឹកឃ្មុំច្រើនមិនល្អទេ
ហើយចង់បានកិត្តិយសខ្លាំងពេក ក៏មិនល្អដែរ។
មនុស្សមិនចេះទប់ចិត្តខ្លួនឯង
ប្រៀបដូចជា ទីក្រុងដែលគ្មានកំពែងការពារ។
No comments:
Post a Comment