តុលាខេត្តកណ្តាលកោះហៅអ្នកស្រី យ៉ាង សុភណ្ឌ័ ឲ្យចូលខ្លួនទៅបំភ្លឺនៅថ្ងៃទី០៥ ខែកក្កដា ២០១២

លោក រ៉ុង ឈុន និងអ្នកស្រី យ៉ាង សុភណ្ឌ័ ចុះជួបកម្មករធ្វើកូដកម្ម

ដោយ. ឆាំ ឆានី ០២ កក្កដា ឆ្នាំ២០១២
ភាគីរោងចក្រតៃយាន១ តៃយាន២ និង​ខេមវែល មិនទាន់មានដំណោះស្រាយ​ជូនកម្មករ​ចំនួន​៦០០០នាក់ ដែលធ្វើកូដកម្មចាប់តាំងពីថ្ងៃ២៥​ ខែមិថុនា រហូតដល់ថ្ងៃទី០២ ខែកក្កដា ឆ្នាំ២០១២នេះ ឡើយ ។
ភាគីកម្មករដែលបានធ្វើកូដកម្មដោយអហឹង្សា បានទាមទារនូវលក្ខន្ឋ័ការងារពីភាគីរោងចក្រចំនួន ០៥​ចំណុចគឺ ៖
១-​សុំឱ្យ​ក្រុមហ៊ុន​ធ្វើការ​ទូទាត់​នូវ​អត្ថប្រយោជន៍​ផ្សេងៗ តាមច្បាប់​ចំពោះ​ការប្ដូរឈ្មោះ​ក្រុមហ៊ុន​ ។
២-​សុំឱ្យ​ក្រុមហ៊ុន​ផ្ដល់​សោហ៊ុយ​ធ្វើដំណើរ និង​ថ្លៃ​ស្នាក់នៅ​ចំនួន​១៥​ដុល្លារ ក្នុង​មួយខែ​ ។
៣-​សុំឱ្យ​ក្រុមហ៊ុន​ដំឡើង​ប្រាក់រង្វាន់​ទៀងទាត់​ចំនួន ១៥​ដុល្លារ ក្នុង​មួយខែ​ ។
៤-​សុំឱ្យ​ក្រុមហ៊ុន​ដំឡើង​ប្រាក់​ថ្លៃ​ទឹកដោះគោ​ចំនួន​១៥​ដុល្លារ ក្នុង​មួយខែ​ ។
៥- ​សុំឱ្យ​ក្រុមហ៊ុន​កុំ​យកមុខ​តំណែង និង​បច្ចេកទេស​មក​ទូទាត់ នៅ​រាល់ពេល​កម្មករនិយោជិត និង​ថ្នាក់ដឹកនាំ​សុំច្បាប់ ចាប់ពី​៣​ថ្ងៃ​ឡើងទៅ​ ។
បើតាមប្រសាសន៍របស់លោក រ៉ុង ឈុន ប្រធានសហភាពសហជីពកម្ពុជា និងអ្នកស្រី យ៉ាង សុភណ្ឌ័ ប្រធានសម្ពន្ឋ័សហជីពកម្ពុជា ដែលបានដឹកនាំកូដកម្មនោះបានឲ្យដឹងនៅថ្ងៃនេះថា គាគីរោងចក្របាន​គេចវ៉េសពីការដោះស្រាយជូន​កម្មកតាមលក្ខន្ឋ័ការងារ បែរមកធ្វើការគំរាមកំហែង និងទិញទឹកចិត្ត​តំណាង​កម្មករ ដែលភាគីរោងចក្រផ្តល់ឲ្យតំណាងកម្មករក្នុងម្នាក់ៗចាប់ពី១៨០០ ដល់៧០០០ដុល្លារ បើតំ​ណាង​កម្មករយល់ព្រមឈប់ធ្វើកូដកម្ម ។ តែការព្យាយាមទិញទឹកចិត្តរបស់ភាគី​រោងចក្រមកលើតំណាង​កម្មករមិនបានសម្រេចឡើយ ។ ហើយអ្វី​ដែលគួរឲ្យកត់សម្គាល់នោះគឺ នៅថ្ងៃទី០២ ខែកក្កដា ឆ្នាំ២០១២ នេះ អាជ្ញាធរប៉ូសីលប្រមាណជាង៥០ នាក់ មកពីស្រុកអង្គស្នួល ខេត្តកណ្តាល បានមកបំបែក​ហ្វូង​បាតុករ បង្ករឲ្យមានការប៉ះទង្គិចគ្នា បណ្តាលកម្មករម្នាក់រងរបួលស្រាល និងយកកាម៉េរ៉ាថតរូបចំនួន០១ របស់កម្មករ តែបានប្រគល់ឲ្យវិញនៅពេល​បន្ទាប់ពីប៉ះទង្គិច ។ ចំណែកតុលាការខេត្តកណ្តាលវិញ ក៏​បាន​ចេញដីការកោះហៅ អ្នកស្រី យ៉ាង សុភណ្ឌ័ ឲ្យទៅបំភ្លឺនៅថ្ងៃ ទី០៥ ខែកក្កដា ឆ្នាំ២០១២ ខាង​មុខ​នេះ ដោយចោទប្រកាន់ពីបទញុះញង់ ជេរប្រមាទ​ជាសាធារណ និង ប្រព្រិត្តបទល្មើស​ដោយឲ្យ​កម្មករ​ធ្វើកូដកម្មខុសច្បាប់ ។ ឆ្លើយតបនិងការចោទប្រ​កាន់ខាងលើលោក រ៉ុង ឈុន និងអ្នកស្រី យ៉ាង សុភណ្ឌ័ បានចាត់ទុកថាជាការគំរាម និងរំលោភសិទ្ឋិសេរីភាពដល់កម្មករ ព្រោះថាកូដកម្មនេះលោក​បានសុំច្បាប់​ត្រឹមត្រូវ ហើយលោក និងអ្នកស្រី យ៉ាង សុភណ្ឌ័ និងចូលទៅបំភ្លឺតាមកាលកំណត់ ៕