នគរបាលយួននៅមូលដ្ឋាន រៀបចំគម្រោងការណ៍សម្ងាត់ ចាប់ព្រះតេជគុណ ថាច់ ធឿន ព្រះពហុស្សូត វត្តសិរីតាសេកផ្សឹក

(រូបភាព៖ ព្រះតេជគុណ ថាច់ ធឿន)

ដោយ៖ កញ្ញា យ៉ាញ់ រមនាថ៍ ប្រភព៖ UAKKBM Radio

០3- 03 – 2012

នគរបាលយួន នៅឃុំតាសេក ស្រុកជ្រោយញរ ខេត្ត ឃ្លាំង កម្ពុជាក្រោម កាលពីថ្ងៃទី១៦ ខែកុម្ភៈ ឆ្នាំ ២០១២ កន្លង​​ទៅនេះ បានកោះហៅ គណកម្មការអាចារ្យជើងវត្ត សិរីតាសេក មួយក្រុមទៅកាន់ស្នងការដ្ឋាននគរបាល​ឃុំ ដើម្បីរៀបចំផែនការសម្ងាត់មួយ ចាប់ព្រះតេជគុណថាច់ ធឿន ដែលជាព្រះពហុស្សូត វត្តសិរីតាសេកផ្សឹក គឺកុំអោយដឹងខ្លួនទាន់។ ខណៈដែលគណកម្មការចូលទៅដល់ស្នងការដ្ឋាននគរបាលឃុំភ្លាមនោះស្រាប់ តែនគរបាលកុម្មុយនិស្តយួន បានលើកបង្ហាញនូវវត្ថុតាងមួយចំនួនដែលជាទឡ្ហីករណ៍ ក្នុងការចោទប្រកាន់ ព្រះតេជគុណ ថាច់ ធឿន ក្នុងនោះរួមមាន៖

• ទី១ រូបថតចូលរួមធ្វើមហាបាតុកម្ម ជាមួយនិងសមណបាតុករសាលាបាលីជាន់ខ្ពស់ខេត្តឃ្លាំង កាល ពីថ្ងៃទី៨ ខែកុម្ភៈ ឆ្នាំ ២០០៧។
• ទី២ កិច្ចសំភាសន៍ ជាមួយសារព័ត៌មានក្រៅប្រទេស ដែលមានខ្លឹមសាររិះគន់ចំៗទៅលើការដឹកនាំ ផ្តាច់ការ របស់រដ្ឋាភិបាលបក្សកុម្មុយនិស្តយួន ថាបានបំបិទសិទ្ធិសេរីភាព គាប់សង្កត់ជំនឿសាសនា របស់ពលរដ្ឋខ្មែរកម្ពុជាក្រោម។
• និងទី៣ មានសកម្មភាពមួយចំនួនពាក់ព័ន្ធនិងអង្គការសមាគម ខ្មែរកម្ពុជាក្រោម នានានៅក្រៅ ប្រទេស ពិសេសសហព័ន្ធខ្មែរកម្ពុជាក្រោម ដែលជាស្ថាប័នឯករាជ្យមួយ កំពុងតែធ្វើនយោបាយលើ ផ្ទៃរាបជាតិ និងអន្តរជាតិ ស្របតាមធម្មនុញ្ញអង្គការសហប្រជាជាតិ ដើម្បីទាមទារសិទ្ធិសម្រេច វាសនាខ្លួនដោយខ្លួនឯងនៅលើមាតុភូមិរបស់ខ្លួន។

ស្ថិតក្នុងហេតុការណ៍ដ៏មហារន្ធត់នេះដែរ គណកម្មការ និងអាចារ្យជើងវត្តសិរីតាសេក ក្រៅពីនៅស្ងៀមទ្រឹង គឺពួកគាត់ហាក់គ្មានយោបល់អ្វីច្រើនដើម្បីឆ្លើយតបទៅនិងសំណួររបស់រដ្ឋអំណាចយួននោះទេ ដោយពួក គាត់បានឆ្លើយយ៉ាងខ្លីទៅកាន់នគរបាលឃុំវិញថា បើសិនអស់លោករកឃើញនូវកំហុសឆ្គងរបស់ព្រះតេជ គុណ ថាច់ ធឿន  ថាពិតជាបានប្រព្រឹត្តិកំហុសធំដុំដូចការចោទប្រកាន់មែន ហើយរហូតឈានដល់ការ ចាប់ផ្សឹកនោះពួកគាត់នឹងគាំទ្រ តែបើរកមិនឃើញនូវកំហុសវិញនោះ ពួកគាត់គឺមិនអនុញ្ញាត្តអោយនរណា ម្នាក់បន្សឹកលោកឡើយ។ ទោះជាណានេះក្តី នគរបាលយួន បានទទូចនិងបានគំរាមគណកម្មការវត្ត អោយ អនុវត្តតាមគោលនយោបាយរបស់គេជាកំហិត ម៉្យាងទៀតត្រូវតែលាក់រឿងនេះអោយជិត ហាមនិយាយរឿង នេះបែកធ្លាយទៅក្រៅ អោយមហាជនបានដឹង ឬប្រាប់រឿងនេះទៅសាមីខ្លួនអោយដឹងជាដាច់ខាតដរាប ណាមន្រ្តីសង្ឃមិនទាន់និមន្តចូលទៅដល់ទីនោះ។
ព្រះតេជគុណ ថាច់ ធឿន ដែលកំពុងស្ថិតនៅកន្លែងដ៏មហាគ្រោះថ្នាក់មួយ វិស័យដូចកូនកន្តុរ ដែលលង់ ទឹកភ្លៀង គ្មានទីពំនឹងនោះ បានថ្លែងទាំងស្រងូតស្រងាត់តាមរយៈខ្សែទូរស័ព្ទប្រាប់ភ្នាក់ងារ វិទ្យុសំឡេង សហគមន៍ព្រះសង្ឃខ្មែរកម្ពុជាក្រោមពិភពលោកថាៈ អាជ្ញាធរយួននៅមូលដ្ឋាន គេតែងចាំឃ្លាំមើលគ្រប់ សកម្មភាពរបស់អាត្មាទាំងអស់ដោយគេសង្ស័យថា អាត្មាភាពមានការទំនាក់ទំនងជាមួយ និងអង្គការ សមាគមខ្មែរកម្ពុជាក្រោមនៅក្រៅប្រទេស ដែលមានបំណងរើសបំរាស់ ពីនឹមត្រូតត្រារដ្ឋាភិបាលរបស់គេ ហើយកាលពីថ្ងៃទី១៦ ខែកុម្ភៈ នគរបាល ឃុំតាសេក គេបានអញ្ជើញពុទ្ធរិស័ទ ដែលជាគណកម្មការ ជើងវត្តអាត្មាទៅសាកសួរអំពីរឿងរ៉ាវរបស់អាត្មា ថែមទាំងបង្ខំអោយញោមអាចារ្យ គណកម្មការទាំងនោះ ធ្វើតាមបញ្ជារបស់គេ គឺគាំទ្រដល់សកម្មភាព របស់នគរបាលយួន ដើម្បីបន្សឹកអាត្មាយកទៅដាក់ពន្ធនាគារ អាត្មាពិតជាមានការបារម្ភយ៉ាងខ្លាំងអំពីសុវត្ថិភាពផ្ទាល់ខ្លួនរបស់អាត្មា។
ដើម្បីស្វែងរកការឆ្លើយបំភ្លឺជុំវិញបញ្ហាខាងលើនេះ ក្រុមបុគ្គលិកវិទ្យុយើង ព្យាយាមធ្វើការទាក់ទងទៅមន្រ្តី សង្ឃដែលពាក់ព័ន្ធនៅស្រុកជ្រោយញរ និងមន្រ្តីសង្ឃខេត្តឃាំ្លងដែរ តែគ្មានអ្នកទទួលទូរស័ព្ទ ចំណែក មជ្ឍដ្ឋានប្រជាពលរដ្ឋ ដែលជាអ្នករស់នៅទីនោះធ្លាប់បានកត់សម្គល់ឃើញថា មន្រ្តីសង្ឃខ្មែរនៅក្នុងខេត្ត នោះ គ្មានលទ្ធភាពជួយគាំពារ ដល់ព្រះសង្ឃរង្គ្រោះទេ បន្ថែមពីលើនេះបែរជាមន្រ្តីសង្ឃទាំងនោះមានការ ខ្លាចញញឹតរដ្ឋអំណាចយួនជាខ្លាំង ជាលើកច្រើនសាមកហើយ មន្រ្តីសង្ឃ និងវិន័យធរខ្មែរ ធ្វើតាមតែបង្គាប់ របស់អាជ្ញាធរយួនតែប៉ុណ្ណោះ គឺពូកែខាងចាប់ព្រះសង្ឃខ្មែរគ្នាឯងបន្សឹក ដោយគ្មានកាត់ទោសតាមសុភ វិនិច្ឆ័យអ្វីឡើយ។ បើយោងតាមច្បាប់ព្រះពុទ្ធសាសន៍ ដែលមានព្រះវិន័យជាធម្មនុញ្ញរបស់ព្រះសង្ឃ ភាសា អង់គ្លេសហៅថា Universal law នោះទាល់តែព្រះភិក្ខុសង្ឃរូបណា បួសក្នុងព្រះពុទ្ធសាសនា ហើយបាន ប្រព្រឹត្តិគន្លងនូវ បារាជិក ៤ ណាមួយទើបមានសិទ្ធិបន្សឹកលោកបាន ឯបរាជិកទាំង ៤ នោះរួមមាន៖

• ១ - មេថុនធម្ម ភិក្ខុសេពមេថុនធម្មត្រូវបារាជិក
• ២ - អនិន្នាទាន ភិក្ខុលួចទ្រព្យគេ ដោយយ៉ាងតិចបំផុតតាំងពីតំលៃ ៥មាសឡើងទៅត្រូវបារាជិក
• ៣ - មនុស្សវិគ្គហ ភិក្ខុក្លែងសំលាប់មនុស្ស ត្រូវបារាជិក
• ៤ - ឧត្ដរិមនុស្សធម្ម ភិក្ខុពោលអួត ឧត្ដរិមនុស្សធម្ម គឺធម៏របស់មនុស្សក្រៃលែងដែលមិនមានក្នុងខ្លួន ត្រូវបារាជិក។

ក្នុងចំណោមអាបត្តិទាំង ៤ ខាងលើគេមិនបានឃើញព្រះតេជគុណ ថាច់ ធឿន ប្រព្រឹត្តិខុសឆ្គងក្នុងប្រការ ណាមួយនោះទេ ផ្ទុយទៅវិញអ្វីដែលព្រះអង្គបានធ្វើនោះគឺជាទង្វើមនុស្សធម៌ ក្នុងនាមអ្នកទ្រទ្រង់ភេទ សមណៈ ហើយបានឃើញនូវអំពើអយុត្តិធម៌ ដែររដ្ឋាភិបាលយួនគេបានធ្វើទុក្ខទោស មានកាចាប់ចង បាញ់ បោះ និងសម្លុត បំផិតបំភ័យ ព្រះសង្ឃពលរដ្ឋខ្មែរកម្ពុជាក្រោម កុំអោយតវ៉ារឿងរ៉ាវផ្សេងៗ ។

ហើយក្នុងស្មារតីនេះ អ្នកសង្កេតការនៃសមគមខ្មែរកម្ពុជាក្រោម និងពុទ្ធបរិស័ទខ្មែរកម្ពុជាក្រោម មិនដឹងថា តើមិនមន្រ្តីសង្ឃ នៅស្រុកជ្រោយញរ អនុវត្តបែបណានោះទេ ព្រោះក្នុងនាមខ្លួនជាអាណាព្យាបាលសង្ឃ គួរណាស់តែ ធ្វើជាគំរូ និងផ្តល់ភាពកក់ក្តៅ ដល់ព្រះសង្ឃនិងពុទ្ធបរិស័ទនៅក្រោមឱវាទរបស់ខ្លួនទើបសម ជាម្លប់របស់ពុទ្ធបរិស័ទ គឺមិនមែនចេះតែធ្វើតាមបង្គាប់របស់រដ្ឋអំណាចយួននោះទេ។

ព្រះភិក្ខុ សៀង សុវណ្ណរា អនុប្រធាន សមាគមព្រះសង្ឃខ្មែរកម្ពុជាក្រោម និងជាគ្រូស្សូតស្តាំវត្តសាមគ្គីរង្សី បានមានសង្ឃដីការជុំវិញបញ្ហានេះថាៈ ទង្វើដែលអាជ្ញាធរយួនបានធ្វើហ្នឹង គឺជាអំពើខុសនិងច្បាប់ទាំង ស្រុង ព្រោះបានគាបទៅលើព្រះសង្ឃដែលមិនមានទោស តែបើសិនលោកបានប្រព្រឹត្តិខុសនិងវិន័យព្រះ ពុទ្ធសាសនា គួរណាស់តែជំនុំសង្ឃក្នុងវត្តប្រឹក្សាគ្នារកវិធីដោះសា្រយ តាមច្បាប់របស់សង្ឃ ការដែលចាប់ លោកផ្សឹក តើអាជ្ញាធរយួនគេមានសួរជំនុំសង្ឃហើយឬនៅ? ហើយការចាប់ផ្សឹកព្រះសង្ឃនោះសោត លុះ ណាតែព្រះសង្ឃអង្គហ្នឹងលោក បារាជិក ទើបអាចផ្សឹកលោកបាន។
កន្លងមកតាមការសង្កេតឃើញរបស់អង្គសិទ្ធិមនុស្សជាតិ និងអន្តរជាតិ គេតែងឱស្សាហ៍ឃើញអាជ្ញាធរ យួន ចាប់ព្រះសង្ឃខ្មែរកម្ពុជាក្រោមផ្សឹកជាញឹកញាប់ ដោយចោទពីបទនេះបទនោះ ហើយគ្មានមូលដ្ឋាន ច្បាស់លាស់ ដោយឡែកព្រះតេជគុណ ថាច់ ធឿន លោកគ្រាន់តែទទួលព័ត៌មានក្រៅស្រុកតាមធម្មតា ប៉ុណ្ណោះ តែបែរជាអាជ្ញាធរយួនដាក់ទោសព្រះអង្គរហូតដល់ចាប់ផ្សឹកដាក់គុក។

ព្រះតេជគុណសៀង សុវណ្ណរា បានមានសង្ឃដីការបន្តទៀតថាៈ ធម្មតាមនុស្ស មានសិទ្ធិគ្រប់គ្រាន់ក្នុងការ ទទួលបានព័ត៌មានដោយសេរីទូទាំងពិភពលោក គឺថាលោកចង់ស្តាប់នៅពេលណាក៏បានដែរ មិនមែន អស់លោក មកចាប់គេផ្សឹកបានស្រេចតែចិត្តនោះទេ នេះជាអំពើមិនត្រឹមត្រូវជាដាច់ខាត អាត្មាសុំបដិ សេធន ។
យោងតាមប្រភពព័ត៌មានពីប្រជាពលរដ្ឋ នៅទីនោះបានលួចបង្ហើប ប្រាប់ភ្នាក់ងារវិទ្យុសំឡេងសហគមន៍ ព្រះសង្ឃខ្មែរកម្ពុជាក្រោមពិភពលោក ក្នុងលាក់ខាន់សុំមិនបញ្ចេញឈ្មោះថាៈ  ក្រោយពីមានព្រឹត្តិការណ៍ មួយ កើតឡើងនៅខាងមុខស្នងការនគរបាលខេត្តឃ្លាំងនោះមក អាជ្ញាធរយួន បានតាមដាន យ៉ាងតឹងរឹងជា ទីបំផុត ដោយបានដាក់ភ្នាក់ងារសំងាត់គ្រប់វត្តអារាម និងគ្រប់ភូមិស្រុក ដែលមានប្រពលរដ្ឋខ្មែរក្រោម រស់ នៅដើម្បីស៊ើបយកការណ៍។ ហើយអ្វីដែលគួរអោយភ្ងាក់ផ្អើលនោះ ដូចជាករណីព្រះតេជគុណ ត្រា ឃីមគង់នៅវត្តផ្តៅពែន ស្រុកម៉ីសៀង ខេត្តឃ្លាំង កម្ពុជាក្រោមដែលជាអតីត សមណសិស្សសាលាបាលីជាន់ ខ្ពស់ខេត្តឃ្លាំង ធ្លាប់បានចូលរួមធ្វើមហាតុកម្មដែរនោះ សុគតយ៉ាងអាថ៍កំបាំង គឺគ្រាន់តែព្រះអង្គកើតរោគ ផ្តាស់សាយ ហៀរសំបោរ បន្តិចបន្តួច ក្រុមគ្រួសារបស់ព្រះអង្គយកចូលមន្ទីរពេទ្យ ក្រោយមកមិនបានប៉ុន្មាន ថ្ងៃផង ស្រាប់តែព្រះអង្គសុគតយ៉ាង ស្ងៀមស្ងាត់ជាទីបំផុត៕