សេចក្ដីថ្លែងការណ៍ស្ដីពីការប្រឡងសញ្ញាបត្រមធ្យមសិក្សាទុតិយភូមិ

សេចក្ដីថ្លែងការណ៍

ស្ដីពី

ការប្រឡងសញ្ញាបត្រមធ្យមសិក្សាទុតិយភូមិ

នៅថ្ងៃទី០៦ ខែសីហា ឆ្នាំ២០១២ គឺជាថ្ងៃចាប់ផ្ដើមនៃ ការប្រឡងសញ្ញាបត្រមធ្យម សិក្សាទុតិយភូមិ ដែលមានរយៈពេលបីថ្ងៃ។ មុនថ្ងៃប្រឡងឈានចូលមកដល់ សមាគមគ្រូ បង្រៀនកម្ពុជាឯករាជ្យ មានការកង្វល់ អំពីការកើតមានភាពមិនប្រក្រតី​ បក្ខពួក និង អំពើ ពុករលួយ ក្នុងដំណើរ​ការប្រឡងនេះ។

ចំពោះការប្រព្រឹត្តទៅនៃការរៀបចំ ក្នុងការបែងចែកប្រធានមណ្ឌល គណៈកម្មការ ត្រួតពិនិត្យ​តាមអាគារ គណៈកម្មការអនុរក្ស និងដំណើរការប្រឡងតាមមណ្ឌលនីមួយៗ រួមទាំងការគ្រប់គ្រង​វិញ្ញាសារឆ្នាំកន្លងមក កើតមានភាពមិនប្រក្រតី និងអំពើពុករលួយក្នុង ដំណើរការប្រឡង តាមមណ្ឌល​ប្រឡងនីមួយៗ ហើយការគ្រប់គ្រងវិញ្ញាសារវិញក៏​មិនបាន​ល្អ​នាំឱ្យបែកធ្លាយ។ ក្នុងពេលថ្មីៗនេះ កាលពីថ្ងៃទី១៦ ខែកក្កដា ឆ្នាំ២០១២ អំពីការ​ប្រឡង​សញ្ញាបត្រមធ្យមសិក្សាបឋមភូមិ មិនមានការ​ផ្លាស់ប្ដូរទេ ការផ្ដល់លុយឱ្យ​មេប្រយោគ​ជា​ថ្នូរ​នៃការបើកចំលងចំលើយ និងអំពើពុករលួយនៅ​តែកើតមានដដែល។

ក្រសួងអប់រំ យុវជន និងកីឡា ត្រូវមានវិធានការច្បាស់លាស់ចំពោះមន្ត្រីដែល បានប្រព្រឹត្ត​បំពានលើសេចក្ដីណែនាំរបស់ក្រសួង ត្រូវដាក់វិន័យ និងផ្ដន្ទាទោសតាមច្បាប់ ដើម្បីឱ្យការប្រឡង​ប្រព្រឹត្តទៅប្រកបដោយលក្ខណៈត្រឹមត្រូវ យុត្តិធម៌ អាចជឿទុកចិត្តបាន ធានាបានគុណភាព និងប្រសិទ្ធភាពអប់រំខ្ពស់។

រាជធានីភ្នំពេញ ថ្ងៃទី៣០ ខែកក្កដា ឆ្នាំ២០១២

ប្រធាន

រ៉ុង ឈុន