ពលរដ្ឋខណ្ឌឫស្សីកែវបារម្ភពីការបាត់បង់ដីនិងលំនៅឋានដោយការធ្វើទីក្រុងរណប
ដោយ វិជ័យ អានន្ទ 2012-09-28 www.rfa.org
អ្នកភូមិដើមគ សង្កាត់ព្រែកតាសេក ខណ្ឌឫស្សីកែវ
ប្រតិកម្មតបនឹងការសម្រេចការកំណត់តម្លៃដីរបស់ពួកគាត់
ដែលធ្វើឡើងដោយសាលារាជធានីភ្នំពេញ។
ការប្រតិកម្មរបស់អ្នកភូមិ
កើតឡើងបន្ទាប់ពីសាលារាជធានីភ្នំពេញបានហៅប្រជាពលរដ្ឋឲ្យចូលរួម
ប្រជុំនៅសាលារាជធានី កាលពីថ្ងៃទី២១ ខែកញ្ញា ឆ្នាំ២០១២
និងសុំឲ្យពលរដ្ឋដែលស្ថិតនៅតំបន់អភិវឌ្ឍនៃសង្កាត់ទាំងបី
គឺសង្កាត់ព្រែកតាសេក សង្កាត់ព្រែកលៀប និងសង្កាត់ជ្រោយចង្វា
ទទួលយកដំណោះស្រាយរបស់រដ្ឋាភិបាល ដែលបានកំណត់មកនេះ។
អ្នកភូមិដើមគ ឲ្យដឹងនៅថ្ងៃទី២៧ កញ្ញា ថា
ការអភិវឌ្ឍដែលធ្វើឲ្យពលរដ្ឋទឹកភ្នែក
ជិតឈានដល់តំបន់របស់ពួកគាត់រស់នៅជាច្រើនតំណមនុស្សមកនោះហើយ។
អ្នកស្រី ជា គង់ មានប្រសាសន៍ថា ពីមុនអ្នកស្រីធ្លាប់តែឮគេថា
អ្នកភូមិបឹងកក់ និងភូមិបុរីកីឡា
រងទុក្ខលំបាកពីការអភិវឌ្ឍរបស់រដ្ឋាភិបាល ប៉ុន្តែស្រាប់តែពេលនេះ
រឿងរ៉ាវនោះហាក់ខិតកាន់តែកៀកមកភូមិរបស់ពួកគាត់។
អ្នកស្រីអះអាងបន្តថា អ្នកស្រីជាម្ចាស់ដី
តែអ្នកស្រីហាក់គ្មានសិទ្ធិបន្តិចបន្តួចឡើយក្នុងការកំណត់តម្លៃលើ
ដីរបស់ខ្លួន
តែបែរជារដ្ឋាភិបាលជាអ្នកកំណត់តម្លៃជំនួសឲ្យពលរដ្ឋទៅវិញ។
អ្នកស្រីបញ្ជាក់ថា
អ្នកស្រីមិនជំទាស់នឹងការអភិវឌ្ឍរបស់រដ្ឋាភិបាលនោះទេ
ប៉ុន្តែអ្នកស្រីចង់ឲ្យរដ្ឋាភិបាលធ្វើយ៉ាងណាដាក់តម្លៃឲ្យបាន
សមរម្យជាងនេះ
កុំឲ្យខុសតម្លៃទីផ្សារនាពេលបច្ចុប្បន្នឆ្ងាយខ្លាំងពេក៖ «ក្មួយ
គិតមើល កាលជំនាន់អាពត ខ្លាចជីវិតស្លាប់មួយហើយ
មកឲ្យស្លាប់ដោយសារការរំដោះ ថាសុខសាន្ត ថាឯករាជ្យ
មិនឲ្យខ្លាចម៉េច តែឥឡូវហ្នឹង បើឲ្យជីវិតខ្ញុំស្លាប់ម្ដងទៀត
និងសូវអត់បាយ តើឲ្យពួកខ្ញុំទៅនៅឯណា។ ក្មួយឯងមើល
សុទ្ធតែដីគេទាំងអស់ ឲ្យខ្ញុំទៅនៅឯណា
បើដីខ្ញុំរដ្ឋត្រូវការអ៊ីចឹង ៤រៀល លោកដាក់តម្លៃ
ផ្ទះថ្មលក់តម្លៃ៦០.០០០»។
តាមការអះអាងរបស់អ្នកភូមិ ឲ្យដឹងថា
តម្លៃដីនៅតំបន់ដែលពួកគាត់កំពុងរស់នៅនេះ មានតម្លៃមិនតិចជាង
៣០០ដុល្លារក្នុងមួយម៉ែត្រក្រឡានោះទេ
តែមន្ត្រីសាលារាជធានីភ្នំពេញ កំណត់តម្លៃដីនៅតំបន់នោះត្រឹមតែ
៣ដុល្លារទៅ ៥ដុល្លារ ក្នុង១ម៉ែត្រក្រឡា។
ទាក់ទងនឹងបញ្ហានេះ តំណាងអ្នកភូមិដើមគ ឈ្មោះ ថុល ស៊ីថេត
ដែលបានចូលរួមប្រជុំនៅសាលារាជធានីភ្នំពេញ កាលពីថ្ងៃទី២១ កញ្ញា
ឲ្យដឹងថា
បើទោះបីអ្នកភូមិបានលើកឡើងសុំឲ្យមន្ត្រីសាលារាជធានីកំណត់តម្លៃ
ឲ្យបានសមរម្យយ៉ាងណាក៏ដោយ
ក៏មន្ត្រីទាំងនោះនៅតែប្រកាន់ជំហរតាមលិខិតសម្រេចរបស់ទីស្ដីការ
គណៈរដ្ឋមន្ត្រី ដែលគេហៅថា ស.ជ.ណ ដដែល។ លោកថ្លែងបន្តថា
ពលរដ្ឋអបអរជាអនេក នៅពេលពួកគេឮថាប្រទេសជាតិមានការរីកចម្រើន
និងឈានដល់ការដាក់ចេញគោលនយោបាយអភិវឌ្ឍជាបន្តបន្ទាប់
ប៉ុន្តែមុននឹងសម្រេចចិត្តអភិវឌ្ឍកន្លែងណាមួយនោះ
រដ្ឋាភិបាលគួរគិតដល់ជីវភាពរស់នៅ និងផលប៉ះពាល់ដល់ពលរដ្ឋផង។
លោកបញ្ជាក់បន្ថែមថា តម្លៃដីដែលមន្ត្រីសាលារាជធានីភ្នំពេញបានលើកឡើងនោះ អ្នកភូមិមិនអាចទទួលយកបាននោះទេ៖ «ហើយ
សុំឲ្យសាលាក្រុងម្ដងទៀតពិចារណា
និងសម្ដេចនាយកពិចារណាទៅលើការដាក់តម្លៃជូនប្រជាពលរដ្ឋទាំងអស់
ផង។ ថ្វីត្បិតតែពួកខ្ញុំរស់នៅជាអ្នកស្រែមែន
ប៉ុន្តែក៏ចង់ឲ្យរស់សមរម្យដែរ មិនចង់រស់ទីនេះ
សុំឲ្យមានសំណងសមរម្យរស់នៅឆ្ងាយក៏បានដែរ ឲ្យតែវាសប្បាយជាងនេះ
កុំឲ្យគាត់ហ្នឹងកំណត់ខ្លួនឯងត្រឹមតែ ៤ដុល្លារ
ដូចមិនដែលបានស្គាល់លុយអ៊ីចឹង»។
វិទ្យុអាស៊ីសេរី មិនអាចសុំការបំភ្លឺពីអភិបាលរងរាជធានីភ្នំពេញ
លោក ឃួង ស្រេង បានទេ នៅថ្ងៃទី២៧ កញ្ញា
ដោយលោកសុំឲ្យវិទ្យុអាស៊ីសេរី
ទាក់ទងទៅអ្នកនាំពាក្យសាលាក្រុងវិញ។
កាលពីថ្ងៃទី២១ កញ្ញា ឆ្នាំ២០១២ សាលារាជធានីភ្នំពេញ
បានហៅពលរដ្ឋដែលមានក្បាលដីស្ថិតនៅតំបន់អភិវឌ្ឍទីក្រុងរណបមកពី
បីសង្កាត់ គឺសង្កាត់ព្រែកតាសេក សង្កាត់ព្រែកលៀប និងសង្កាត់ជ្រោយចង្វា
ឲ្យចូលរួមប្រជុំនិយាយពីដំណោះស្រាយទាក់ទងនឹងតំបន់ដី
ដែលទទួលរងផលប៉ះពាល់ពីគម្រោងនៃការអភិវឌ្ឍទីក្រុងរណប។
ក្នុងកិច្ចប្រជុំនោះ មន្ត្រីសាលារាជធានីភ្នំពេញ
បានលើកឡើងពីដំណោះស្រាយថា ក្រុមហ៊ុនបម្រុងទិញដីទំហំ ១២ហិកតារ
ដើម្បីធ្វើផ្ទះល្វែង និងផ្សារទុកឲ្យពលរដ្ឋ
ដែលរងផលប៉ះពាល់ពីគម្រោងអភិវឌ្ឍនោះ។
ទី១ ពលរដ្ឋមានលំនៅឋាន និងដីទំហំតិចជាង ៥០០ម៉ែត្រក្រឡា ទទួលបានផ្ទះ១ល្វែង និងស្តង់លក់ដូរក្នុងផ្សារមួយកន្លែង។
ទី២ ពលរដ្ឋមានទំហំដីលើសពី ៥០០ម៉ែត្រក្រឡា ទទួលបានផ្ទះ១ល្វែង
បូកនឹងថវិកាបន្ថែមចំនួន ៥ដុល្លារក្នុង១ម៉ែត្រក្រឡា
និងស្តង់លក់ដូរក្នុងផ្សារមួយកន្លែងទៀត។
ចំណែកពលរដ្ឋជាកសិករ មានដីស្រែស្ថិតនៅតំបន់នៃគម្រោងអភិវឌ្ឍ
ប៉ុន្តែផ្ទះរបស់ពួកគាត់មិនស្ថិតនៅតំបន់នៃគម្រោងអភិវឌ្ឍនោះ
ពួកគាត់ទទួលបាន ៤ដុល្លារក្នុង១ម៉ែត្រក្រឡាលើទំហំដី
បូករួមនឹងជម្រើសចំនួនពីរ គឺទី១
ពួកគាត់អាចទទួលយកប្រាក់ឧបត្ថម្ភចំនួន ៥សែនរៀលក្នុងមួយគ្រួសារ
សម្រាប់រយៈពេល ២ឆ្នាំ ដើម្បីប្រកបមុខរបរផ្សេង
ជំនួសការធ្វើស្រែចម្ការ និងទី២
ពួកគាត់អាចទទួលយកស្តង់លក់ដូរមួយកន្លែង
ដែលអាចប្រែខ្លួនពីកសិករមកជាអាជីវករលក់ដូរវិញ។
រដ្ឋាភិបាលបានសម្រេចផ្ដល់ដីទំហំជាង ៣០០ហិកតារ
ឲ្យក្រុមហ៊ុនអូ.ស៊ី.អាយ.ស៊ី (OCIC)
ដើម្បីធ្វើការអភិវឌ្ឍតំបន់នេះទៅជាទីក្រុងរណប។
ពលរដ្ឋដែលទទួលរងផលប៉ះពាល់ពីគម្រោងអភិវឌ្ឍនេះ មានបីសង្កាត់
គឺសង្កាត់ព្រែកតាសេក សង្កាត់ព្រែកលៀប និងសង្កាត់ជ្រោយចង្វា៕
1 comment:
Please save Cambodian culture in America by open website below, Create new account, login, Give-a-click, and vote Angkor Dance Troupe needs all your supports now end Sept. 30, 2012.
http://www.weshareacommonthread.org/Give-a-Click
Post a Comment