ខៀវ កាញារីទ្ធ រអើលគូទ ម្តងទៀតហើយ៖ ក្រុមយុវជន បក្សប្រឆាំង ធ្វើបាតុកម្ម ផ្លាស់ប្តូរ សមាសភាព គ.ជ.ប. ជាការកេងចំណេញ នយោបាយ

ខៀវ កាញារីទ្ធ

លោក ខៀវ កាញារីទ្ធ៖ ក្រុមយុវជន បក្សប្រឆាំង ធ្វើបាតុកម្ម ផ្លាស់ប្តូរ សមាសភាព គ.ជ.ប. ជាការកេងចំណេញ នយោបាយ (sic!)

Monday, 29 October 2012
ដោយៈ ដើមអម្ពិល (DAP)

ភ្នំពេញ ៖ អ្នកនាំពាក្យរាជរដ្ឋាភិបាលកម្ពុជា បានថ្លែងអះអាងនៅថ្ងៃទី២៩ ខែតុលា ឆ្នាំ២០១២នេះថា ក្រុមយុវជនគណបក្សប្រឆាំង សម រង្ស៊ី និងគណបក្សសិទ្ធិមនុស្ស ធ្វើកូដកម្មដើម្បីទាមទារ ឲ្យមានការផ្លាស់ប្តូរមេដឹកនាំ គ.ជ.ប.នោះ គ្រាន់តែជាការកេងចំណេញ ផ្នែកនយោបាយតែប៉ុណ្ណោះ។

អ្នកនាំពាក្យរាជរដ្ឋាភិបាល និងជារដ្ឋមន្រ្តីក្រសួងព័ត៌មាន មានប្រសាសន៍ ប្រាប់ក្រុមអ្នកសារព័ត៌មាន បន្ទាប់ពីបញ្ចប់កិច្ចប្រជុំមួយ នៅក្រសួងព័ត៌មាន នាព្រឹកថ្ងៃទី២៩ ខែតុលាថា បើក្រុមយុវជន របស់គណបក្សប្រឆាំងទាំងពីរ ធ្វើកូដកម្មនោះ ជាសិទ្ធិរបស់ពួកគេទេ ពុំមានអ្នកហាមឃាត់បានឡើយ ប៉ុន្តែពួកគេត្រូវធ្វើអ្វីមួយត្រូវ ទៅ តាមច្បាប់កំណត់។

លោកបញ្ជាក់ថា «គេមានសិទ្ធិធ្វើ ប៉ុន្តែយើងអាចមើលឃើញហើយថា ក្រុមទាំងនោះធ្វើអ្វីមួយហើយ តែឆ្លៀតឱកាសដូចត្រីងៀតឆ្លៀតពង ពួកគេធ្វើអ្វីមួយដើម្បីផល ប្រយោជន៍ទាំងអស់»។


នៅថ្ងៃទី៨ ខែវិច្ឆិកា ខាងមុខនេះ ចលនាយុវជនគណបក្សសម រង្ស៊ី និងសិទ្ធិមនុស្សនឹងរួមគ្នាធ្វើបាតុកម្មដោយមានគម្រោងជួបជុំប្រមូលផ្តុំគ្នា នៅទីលានប្រជាធិបតេយ្យ ដើម្បីធ្វើដំណើរឆ្ពោះទៅមន្ទីររដ្ឋសភា ព្រមទាំងបន្តដំណើរទៅក្រសួងមហាផ្ទៃទៀតដើម្បីផ្លាស់ប្តូរកំណែទម្រង់ សមាសភាពគណៈកម្មាធិការជាតិរៀបចំការបោះឆ្នោត និង មានបញ្ហា មួយចំនួនទៀតដូចជាទាមទារឲ្យមានការកែទម្រង់ប្រពន្ធ័យុត្តិធម៌ទាមទារឲ្យមានការដោះលែង សកម្មជនការពារសិទ្ធិមនុស្ស ចេញពីពន្ធ នា គារ ដោះលែងអ្នកទោសនយោបាយ ទាមទារឲ្យគោរពសិទ្ធិមនុស្ស លទ្ធិប្រជាធិបតេយ្យ បញ្ឈប់ការបណ្តេញពលរដ្ឋចេញពីដីធ្លី និងលំនៅដ្ឋាន។

អគ្គលេខាធិការ គណៈកម្មាធិការជាតិ រៀបចំការបោះឆ្នោត (គ.ជ.ប.) លោក ទេព នីថា ធ្លាប់បានឲ្យដឹងថា ពួកគេធ្វើអ្វី ធ្វើទៅ ជាសិទ្ធិរបស់ពួកគេទេ ប៉ុន្តែ គ.ជ.ប. អនុវត្តការងារទៅតាមច្បាប់យ៉ាងត្រឹមត្រូវ។

សូមបញ្ជាក់ថា កាលពីពេលកន្លងមក គណបក្សសម រង្ស៊ី និងគណបក្សសិទ្ធិមនុស្ស បានដាក់លិខិតទៅក្រសួងមហាផ្ទៃ ដើម្បីស្នើឲ្យមានការផ្លាស់ប្តូរសមាសភាព គ.ជ.ប. ផងដែរ ប៉ុន្តែត្រូវបានបរាជ័យទៅវិញ។ ចំណែករដ្ឋសភា ក៏បានអនុម័តសមាសភាព គ.ជ.ប.នេះរួចទៅហើយដែរ ដោយពុំមានសមាជិករដ្ឋសភាគណបក្ស សម រង្ស៊ី និងគណបក្សសិទ្ធិមនុស្ស ចូល រួមឡើយ៕