 |
| Cartoon by Sacrava (on the web at http://sacrava.blogspot.com) |
វង្ស សុខេង
The Phnom Penh Post
ភ្នំពេញៈសភាអឺរ៉ុប បានអនុម័តសេចក្តីសម្រេច ស្តីពីស្ថានការណ៍នៅកម្ពុជា ដោយអំពាវនាវឲ្យរដ្ឋាភិបាល អនុវត្តអនុសាសន៍របស់អង្គការសហប្រជាជាតិនាពេលថ្មីៗនេះ ស្តីពីកំណែទម្រង់ប្រព័ន្ធបោះឆ្នោត ដែលរងការរិះគន់ ដើម្បីធានាថា ប្រព័ន្ធនេះ អនុលោមតាមស្តង់ដារអន្តរជាតិ នៅមុន ក្នុងអំឡុងពេល និងក្រោយការបោះឆ្នោតជាតិ នៅខែកក្កដា ឆ្នាំក្រោយ។
លោក យឹម សុវណ្ណ អ្នកនាំពាក្យ គណបក្សសង្គ្រោះជាតិ ដែលកើតចេញពីការបង្រួបបង្រួមគ្នា រវាងគណបក្ស សម រង្ស៊ី និងគណបក្សសិទ្ធិមនុស្ស បានថ្លែងកាលពីថ្ងៃម្សិលមិញថា សភាសហគមន៍អឺរ៉ុប បានអនុម័តសេចក្តីសម្រេចរបស់ខ្លួន នៅថ្ងៃទី ២៤ ខែតុលា ស្តីពីស្ថានការណ៍របស់លោក សម រង្ស៊ី ដែលត្រូវបានកាត់ទោសពីបទចោទប្រកាន់ ដែលគេហៅថា ធ្វើឡើងដោយសារមូលហេតុនយោបាយ។
យោងតាមសេចក្តីសម្រេចដើម ដែលផ្ញើចេញពីគណបក្ស សម រង្ស៊ី នៅថ្ងៃទី ២៦ ខែតុលា បានឲ្យដឹងថា៖ «[រដ្ឋសភាអឺរ៉ុប] ជំរុញរដ្ឋាភិបាលកម្ពុជា និងគណបក្សប្រឆាំង ឲ្យធ្វើការឆ្ពោះទៅរកការផ្សះផ្សា ក្នុងគោលបំណង ផ្តល់លទ្ធភាពដល់ក្រុមប្រឆាំង ឲ្យដើរតួនាទីពេញលេញក្នុងនយោបាយកម្ពុជា និងក្នុងការបោះឆ្នោតនាពេលខាងមុខក្នុងគោលបំណងផ្តល់ការជឿជាក់លើដំណើរការបោះឆ្នោត»។
លោក សុវណ្ណ បានបន្ថែមថា៖ «សហគមន៍អន្តរជាតិនិងសភាអឺរ៉ុប បានសម្តែងកង្វល់អំពីការបោះឆ្នោតមិនយុតិ្តធម៌នៅកម្ពុជា ដូច្នេះ គណបក្សសង្គ្រោះជាតិកម្ពុជា នឹងបន្តខិតខំដើម្បីធានាឯករាជភាព នៃគណៈកម្មាធិការរៀបចំការបោះឆ្នោត»។
កាលពីថ្ងៃទី ១១ ខែតុលា លោក អ៊ឹម សួស្តី ប្រធានគ.ជ.ប និងលោកស្រី ស៊ីន ជុំបូរអនុប្រធាន ត្រូវបានរដ្ឋសភា បោះឆ្នោតឲ្យបន្តដឹកនាំ គ.ជ.ប ដែលទទួលរងការរិះគន់ជាច្រើនអាណត្តិមកហើយនេះទៀត។ សមាជិកសភាគណបក្សប្រឆាំង បានធ្វើពហិការ ការប្រជុំបោះឆ្នោតនេះ។
លោក យឹម សុវណ្ណ បានលើកឡើងថា៖ «ខ្ញុំគិតថា គណបក្សប្រជាជនកម្ពុជា នៅតែគ្រប់គ្រង គ.ជ.ប ដូច្នេះ គណៈកម្មាធិការនេះខ្វះឯករាជភាព»។
លោក គល់ បញ្ញា នាយកប្រតិបតិ្តអង្គការ ឃ្លាំមើលការបោះឆ្នោត ហៅកាត់ ខុម ហ្វ្រែល បានថ្លែងថា កម្ពុជា នឹងបាត់បង់នូវភាពស្របច្បាប់របស់ខ្លួន នៅក្នុងសហគមន៍អន្តរជាតិ ប្រសិនបើការបោះឆ្នោតឆ្នាំក្រោយ មិនសេរី និងយុតិ្តធម៌ទេនោះ។ លោក គល់ បញ្ញាបានបន្តថា៖ «ខ្ញុំគិតថា គណបក្សកាន់អំណាច និងគណបក្សប្រឆាំង គួរប្រជុំពិភាក្សាគ្នា ដើម្បីធានាតម្លាភាពរបស់គ.ជ.ប ដែលការធ្វើដូច្នេះ អ្នកចាញ់នឹងមិនតវ៉ា ប្រឆាំងលទ្ធផលនៃការបោះឆ្នោតឡើយ»។
លោក ទេព នីថា អគ្គលេខាធិការ គ.ជ.ប បានថ្លែងថា លោកគ្មានប្រតិកម្ម ចំពោះអ្នករិះគន់គ.ជ.ប ឡើយ។ លោកបានគូសបញ្ជាក់ថា៖ «ខ្ញុំគិតថា វាជាសិទិ្ធរបស់សភាអឺរ៉ុប ក្នុងការអនុម័តសេចក្តីសម្រេច ស្តីពីកម្ពុជា ប៉ុន្តែអ្នកទាំងនោះ គួរយល់ដឹង ពីស្ថានការណ៍ពិតនៅកម្ពុជា»។
លោកបានថ្លែងថា អ្នកបោះឆ្នោតប្រហែល ៩៦០០០០០ នាក់ នឹងចូលរួមក្នុងការបោះឆ្នោតនៅឆ្នាំក្រោយ៕
1 comment:
អ្វីទៅដែលហៅថា ៖ គ ច ប ?
គ=គណកម្មាធិការ
ច=ចោរ
ប=ប្លន់សន្លឹកឆ្នោត
ដូច្នេះពាក្យដែលហៅថាៈ គ ច ប = គណកម្មាធិការចោរប្លន់សន្លឹកឆ្នោត ។
Post a Comment