KI Media: ប៉ូលិស រារាំងក្រុមប្រជាជនអាស៊ាន មិនឲ្យហែញត្តិ ដាក់នៅក្រសួងការបរទេស

អាជ្ញាធរប៉ូលិស រារាំងក្រុមសកម្មជនសិទ្ធិមនុស្ស និងប្រជាជន អាស៊ាន មិនឲ្យហែញតិ្ត ដាក់ទៅកាន់ក្រសួងការបរទេស នាព្រឹកថ្ងៃទី១៦វិច្ឆិកា ឆ្នាំ២០១២ ( រូបថត៖ ស៊ីវ ចាន់ណា )

ថ្ងៃទី 16 វិច្ឆិកា 2012 | ដោយ: រតនា
Cambodia Express News

ភ្នំពេញ: កម្លាំងប៉ូលិសចម្រុះរាប់សិបនាក់ បានដាក់បារ៉ាស់ រាំងផ្លូវនៅមុខរដ្ឋសភា ក្នុងរាជធានីភ្នំពេញ នៅព្រឹកថ្ងៃទី១៦ ខែវិច្ឆិកា ឆ្នាំ២០១២ មិនឲ្យក្រុមសកម្មជនសិទ្ធិមនុស្ស ក្នុងនាមប្រជាជនអាស៊ាន ដើរហែក្បួនយកញតិ្ត ទៅដាក់នៅក្រសួងការបរទេស ដែលស្ថិតនៅខាងក្រោយជាប់នឹងវិមានរដ្ឋសភា ក្នុងរាជធានីភ្នំពេញ។ ប៉ុន្តែព្រឹត្តិការណ៍នោះ មិនមានអំពើហិង្សាកើតឡើងទេ។
ក្រុមសកម្មជនសិទ្ធិមនុស្ស និងប្រជាជនរាប់រយនាក់ មកពីប្រទេសសមាជិកអាស៊ាន ទាំង ១០ ប្រទេស ដែលភាគច្រើនជាសកម្មជនសង្គមស៊ីវិល និងប្រជាជនកម្ពុជា បានដើរហែក្បួន ដោយកាន់ទង់ជាតិប្រទេសសមាជិកអាស៊ានទាំង ១០ ទង់អាស៊ាន និងលើកបដា ព្រមទាំងស្រែកមេក្រូផង នៅព្រឹកព្រលឹមថ្ងៃទី១៦វិច្ឆិកា ឆ្នាំ២០១២ ក្នុងបំណងយកញត្តិ ទៅដាក់នៅក្រសួងការបរទេស ដើម្បីជូនបន្តទៅកាន់មេដឹកនាំអាស៊ាន និងមេដឹកនាំកំពូលៗរបស់ប្រទេសមហាអំណាច ដែលនឹងជួបប្រជុំគ្នា ចាប់ពីថ្ងៃទី១៨ ដល់ថ្ងៃទី២០វិច្ឆិកា ឆ្នាំ២០១២ នៅវិមានសន្តិភាព ក្នុងរាជធានីភ្នំពេញ។

ក្នុងពេលអាជ្ញាធររារាំងនៅមុខរដ្ឋសភា ក្រុមសង្គមស៊ីវិលកម្ពុជា បានស្រែកមេក្រូ ដោយលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានអំពាវនាវទៅកាន់លោកប្រធានាធិបតីអាមេរិក អូបាម៉ា ត្រូវតែថ្លែងការណ៍ជាចំហ ដាក់ការគាបសង្កត់ទៅកាន់មេដឹកនាំអាស៊ាន ពិសេសមេដឹកនាំប្រទេសកម្ពុជា ក្នុងឋានៈជាប្រធានអាស៊ាន ឲ្យមានការគោរពសិទ្ធិមនុស្ស សេរីភាពបញ្ចេញមតិ កំពុងប្រើប្រាស់តុលាការជាឧបករណ៍នយោបាយ ជំរុញឲ្យកម្ពុជាធ្វើកំណែទម្រង់ការបោះឆ្នោត នៅខែកក្កដា ឆ្នាំ២០១៣ ឲ្យមានភាពសេរី និងយុត្តិធម៌ ព្រមទាំងមានការចូលរួមពេញលេញពីគណបក្សប្រឆាំង និងបញ្ឈប់ការរំលោភដីធ្លីរបស់ប្រជាពលរដ្ឋកម្ពុជា ជាដើម។
ក្នុងពេលអាជ្ញាធរសមត្ថកិច្ចរារាំងនោះ ក្រុមសកម្មជនប្រជាជនអាស៊ាន ក៏មានបំណង ដាក់ញត្តិនោះទៅកាន់រដ្ឋសភាផងដែរ។
ក្នុងរយៈពេលប៉ុន្មានថ្ងៃនេះ ខណៈដែលមន្ត្រីជាន់ខ្ពស់ និងមេដឹកនាំរដ្ឋាភិបាលបណ្តាប្រទេសអាស៊ាន និងប្រទេសមហាអំណាច រួមមានអាមេរិក និងចិន ជាដើម ដែលជាដៃគូរបស់អាស៊ាន ជួបប្រជុំគ្នាចាប់ពីថ្ងៃទី១៥ ដល់ថ្ងៃទី២០វិច្ឆិកា ឆ្នាំ២០១២ នៅរាជធានីភ្នំពេញ គឺក្រុមសកម្មជនសិទ្ធិមនុស្ស អង្គការសង្គមស៊ីវិល និងប្រជាជន មកពីបណ្តាប្រទេសសមាជិកអាស៊ាន ទាំង ១០ ប្រទេស ក៏បានជួបប្រជុំគ្នា ជាច្រើនក្រុម ដើម្បីលើកឡើងពីបញ្ហារំលោភសិទ្ធិមនុស្ស សេរីភាពបញ្ចេញមតិ បញ្ហាដីធ្លី បញ្ហាពលករចំណាកស្រុក និងបញ្ហាបោះឆ្នោត ជាដើម។
កង្វល់របស់សង្គមស៊ីវិលអាស៊ានទាំងនោះ ត្រូវបញ្ជូនទៅកាន់រដ្ឋាភិបាលអាស៊ាន ដើម្បីដោះស្រាយ ក្នុងកិច្ចប្រជុំកំពូលអាស៊ានផងដែរ៕