 |
| លោកសុរិយា ប្រាសាទ ស៊ូប៊ែឌី អ្នករាយការណ៍ពិសេសអង្គការសហប្រជាជាតិ ស្តីពីស្ថានភាពសិទ្ធិមនុស្សនៅកម្ពុជា |
ថ្ងៃទី 14 ធ្នូ 2012 | ដោយ: រតនា
Cambodia Express News
ភ្នំពេញ: លោក សុរិយា ប្រាសាទ ស៊ូប៊ែឌី អ្នករាយការណ៍ពិសេសអង្គការសហប្រជាជាតិ ស្តីពីស្ថានភាពសិទ្ធិមនុស្សនៅកម្ពុជា កាលពីរសៀលថ្ងៃទី១៤ ខែធ្នូ ឆ្នាំ២០១២ បានធ្វើសន្និសីទកាសែត នៅពេលបិទបញ្ចប់បេសកកម្មរយៈពេល ៨ ថ្ងៃ ចាប់ពីថ្ងៃទី៨ ខែធ្នូ ឆ្នាំ២០១២
ដោយលោកបានជំរុញឲ្យរដ្ឋាភិបាលធ្វើកំណែទម្រង់ប្រព័ន្ធយុត្តិធម៌ កំណែទម្រង់ប្រព័ន្ធបោះឆ្នោត និងផលប៉ះពាល់លើសិទ្ធិផ្តល់ដីសម្បទានសេដ្ឋកិច្ច ព្រមទាំងសម្បទានដទៃទៀត។
លោក ស៊ូប៊ែឌី បានលើកឡើងថា បណ្តុំអនុសាសន៍របស់លោក គឺដើម្បីជួយដល់រាជរដ្ឋាភិបាលកម្ពុជា និងដំណើរការលទ្ធិប្រជាធិបតេយ្យ នៅកម្ពុជា។
លោក ស៊ូប៊ែឌី បានបញ្ជាក់ថា នៅក្នុងដំណើទស្សនកិច្ចរបស់លោកម្តងៗ គឺលោកតែងជួបពិភាក្សាជាមួយដៃគូពាក់ព័ន្ធមន្ត្រីអង្គការសង្គមស៊ីវិល ដៃគូរអភិវឌ្ឍន៍ ដើម្បីផ្តល់នូវដំណោះស្រាយ ចំពោះបញ្ហាប្រឈមមួយចំនួន ខាងសិទ្ធិមនុស្សនៅកម្ពុជា។
លោក ស៊ូប៊ែឌី បានមានប្រសាសន៍បន្តថា កម្ពុជាបន្តអនុវត្តបានប្រសើរលើសូចនាករជាច្រើន ក្នុងវិស័យសេដ្ឋកិច្ច គាំទ្រស្ថិរភាពនយោបាយ។ ប្រទេសកម្ពុជា ទំនងជាកំពុងស្ថិតនៅលើផ្លូវមួយ ឈានទៅសម្រេចជោគជ័យ លើវិស័យមួយចំនួន នៃគោលដៅអភិវឌ្ឍន៍សហស្សវត្សរ៍។
ជាមួយគ្នានោះដែរ លោក ស៊ូប៊ែឌី បានធ្វើការអំពាវនាវឲ្យរាជរដ្ឋាភិបាលកម្ពុជាពន្លឿន ការអនុវត្តកម្មវិធីផ្តល់ប័ណ្ណកម្មសិទ្ធិដីធ្លី ប្រកបដោយភាពត្រឹមត្រូវ និងតម្លាភាព ជូនប្រជាពលរដ្ឋ។
លោកបន្តថា “វាជាការពិតណាស់កង្វល់មានច្រើន អំពីការអនុវត្តកម្មវិធីផ្តល់ប័ណ្ណកម្មសិទ្ធិដីធ្លីនេះ ដូចជា កង្វះតម្លាភាព ផលប៉ះពាល់ របស់កម្មវិធីនេះទៅលើជនជាតិដើមភាគតិច និងអំពីរបៀបជ្រើសរើសសហគមន៍ ដែលត្រូវផ្តល់ប័ណ្ណកម្មសិទ្ធិ ប៉ុន្តែទោះជាយ៉ាងណាក៏ដោយ ឲ្យតែកម្មវិធីនេះ អាចផ្តល់ឲ្យម្ចាស់ដីស្របច្បាប់ ទទួលបានកម្មសិទ្ធិដីធ្លី របស់ខ្លួនស្របច្បាប់នោះ វាគែជាវឌ្ឍនភាពមួយដែលត្រូវស្វាគមន៍ហើយ” ។
លោកបន្តទៀតថា លោកបានប្រាស្រ័យទាក់ទងជាមួយដៃគូរនានាៗអំពីសម្បទានដីសេដ្ឋកិច្ច និងដីសម្បទានដទៃទៀត ដែលជាប្រធានបទចុងក្រោយរបស់លោក។ លោកក៏បានជួបពិភាក្សាជាមួយអង្គការដៃគូរនានា ដើម្បីផ្តោតលើការស្វែងរកដំណោះស្រាយមួយមានតុល្យភាព ចំពោះបញ្ហាទាំងឡាយ ដែលទាក់ទងនឹងសម្បទានទាំងនោះ។
លោក ស៊ូប៊ែឌី បានមានប្រសាសន៍បន្តទៀតថា លោកកំពុងព្យាយាម ធ្វើការងាររបស់លោក ក្នុងនាមអង្គការសហប្រជាជាតិ គឺត្រូវផ្តល់យោបល់ទៅរាជរដ្ឋាភិបាលកម្ពុជា អំពីអ្វីដែលជាកាតព្វកិច្ចរបស់ខ្លួន ក្រោមច្បាប់អន្តរជាតិ និងផ្តល់ជាមតិយោបល់ អំពីមធ្យោបាយមួយ ដែលត្រូវអនុវត្តតទៅមុខទៀត ក្នុងនាមលោក ជាអ្នកជំនាញច្បាប់ឯករាជ្យ របស់អង្គការសហប្រជាជាតិ។
លោក ស៊ូប៊ែឌី បានមានប្រសាសន៍បន្តថា ចំណុចដែលលោកចង់បញ្ជាក់នោះ គឺថាប្រទេសកម្ពុជា មានគោលនយោបាយមួយ រួចទៅហើយ ក្នុងការបន្តដំណើរនៅលើផ្លូវមួយឆ្ពោះទៅកាន់លទ្ធិប្រជាធិបតេយ្យ នីតិរដ្ឋពិតប្រាកដ និងគោរពសិទ្ធិមនុស្សកាន់តែរឹងមាំ។ ដោយហេតុនេះ បញ្ហាសិទ្ធិមនុស្សទាំងឡាយ ដែលលោកបានលើកឡើង ក្នុងរបាយការណ៍នេះ មិនយូរមិនឆាប់ និងត្រូវដោះស្រាយ នៅពេលណាមួយជាមិនខាន តែទោះជាយ៉ាងណាលោកស៊ូប៊ែឌី នៅតែគោរពទាំងស្រុង ចំពោះអធិបតេយ្យភាព និងសមត្ថកិច្ចរបស់រាជរដ្ឋាភិបាល នៃប្រទេសកម្ពុជា ក្នុងការសម្រេចចិត្ត ដើម្បីផលប្រយោជន៍ជាតិ។
លោក ស៊ូប៊ែឌី បានបញ្ជាក់បន្តថា បេសកកម្មរបស់លោកនៅពេលនេះ បានផ្តោតសំខាន់លើបញ្ហាសិទ្ធិមនុស្ស បញ្ហាទាក់ទងនឹងការបោះឆ្នោត និងជាថ្មីម្តងទៀតនោះ លោកបានផ្តោតការយកចិត្តទុកដាក់ ចំពោះកំណែទម្រង់នៃការបោះឆ្នោត ដែលត្រូវដាក់ជូនក្រុមប្រឹក្សាសិទ្ធិមនុស្ស កាលពីខែកញ្ញា ឆ្នាំ២០១២ រួចម្តងហើយ។
លោក ស៊ូប៊ែឌី ក៏បានជំរុញឲ្យគ្រប់ភាគីទាំងអស់ និងគណៈកម្មាធិការជាតិរៀបចំការបោះឆ្នោត ដើម្បីធានាឲ្យមានការបោះឆ្នោតដោយសេរី យុត្តិធម៌ និងសន្តិវិធី ហើយលោកក៏ជំរុញឲ្យប្រជាពលរដ្ឋគ្រប់រូបអនុវត្តសិទ្ធិរបស់ខ្លួន ដោយការទទួលខុសត្រូវ និងគោរពសិទ្ធិរបស់អ្នកដទៃឲ្យបានត្រឹមត្រូវ នៅពេលអនុវត្តសិទ្ធិរបស់ខ្លួន។
លោក ស៊ូប៊ែឌី ក៏បានសម្តែងនូវការព្រួយបារម្ភជាខ្លាំងអំពីសេរីភាពក្នុងការបញ្ចេញមតិនៅក្នុងប្រទេសកម្ពុជា។ មានករណីមួយចំនួនទាក់ទងនឹងការគំរាមកំហែង ការធ្វើទុក្ខបុកម្នេញ ដល់អ្នកដែលបំពេញការងារ ក្នុងវិស័យព័ត៌មាន និងតស៊ូមតិផ្នែកសិទ្ធិមនុស្ស។ ការប្រើច្បាប់ស្តីពី “ការញុះញង់” ហួសហេតុ ហាក់បីដូចជា ធ្វើឲ្យប្រជាពលរដ្ឋ រើខ្លួនដោយខ្លួនឯង។
សូមបញ្ជាក់ថា នៅក្នុងដំណើរទស្សនកិច្ចរបស់លោក សុរិយា ប្រាសាទ ស៊ូប៊ែឌី នៅកម្ពុជានោះ លោកបានធ្វើដំណើរជួបប្រាស្រ័យ ជាមួយជាមួយក្រុមជនរងគ្រោះ ដោយអំពើរំលោភបំពានសិទ្ធិមនុស្ស ជួបដៃគូសន្ទានានា រួមមាន មន្ត្រីសង្គមស៊ីវិល និងសមាជិកសភា និងសហគមន៍អង្គទូតបរទេស នានា នៅកម្ពុជា និងបានជួបប្រាស្រ័យជាមួយលោក ម៉ម សូណង់ដូ ក្នុងពន្ធនាគារ ដោយគ្មានការរារាំងដំណើររបស់លោកឡើយ។
ក្នុងសន្និសីទកាសែត នៅរសៀលថ្ងៃសុក្រ ទី១៤ ខែធ្នូ ឆ្នាំ២០១២ នៅពេលបិទបញ្ចប់បេសកកម្ម រយៈពេលមួយសប្តាហ៍ ចាប់ពីថ្ងៃទី៨ធ្នូ លោក ស៊ូប៊ែឌី បានប្រកាសថា អាណត្តិការងារសំខាន់ ដែលក្រុមប្រឹក្សាសិទ្ធិមនុស្ស អង្គការសហប្រជាជាតិ ប្រគល់ឲ្យលោក គឺការឃ្លាំមើលស្ថានភាពសិទ្ធិមនុស្ស នៅក្នុងប្រទេសកម្ពុជា និងរាយការណ៍ជាសាធារណៈទៅក្រុមប្រឹក្សាសិទ្ធិមនុស្សអង្គការសហប្រជាជាតិ វិញ។
លោក ស៊ូប៊ែឌី ជឿជាក់ថា ការសន្ទនា គឺជាមធ្យោបាយមួយដ៏សំខាន់ដើម្បីភាព ចំរើនឆ្ពោះទៅមុខ ហើយលោកបានបញ្ជាក់ម្តងហើយម្តងទៀតអំពីសារៈសំខាន់ នៃការសន្ទនានេះ ជាមួយដៃគូពាក់ព័ន្ធទាំងអស់ ហើយជាពិសេសជាមួយរដ្ឋាភិបាល។
លោក ស៊ូប៊ែឌី អះអាងថា លោកបានប្រកាន់ភ្ជាប់នូវគោលការណ៍សន្ទនា ក្នុងន័យស្ថាបនា ក្នុងការបំពេញអាណត្តិការងាររបស់លោក ហើយនឹងបន្តធ្វើដូចនេះតទៅទៀត។ គោលដៅរបស់លោក គឺការផ្តល់ប្រឹក្សាយោបល់ សម្រាប់អនាគត នៃប្រទេសកម្ពុជា មានសុខសន្តិភាព ប្រជាធិបតេយ្យ ស្ថិរភាព និងនិរន្តរភាព ហើយអនុសាសន៍របស់លោក ធ្វើឡើង ដើម្បីផ្តល់ជូនជាដំណោះស្រាយ ចំពោះបញ្ហាប្រឈមមួយចំនួនខាងសិទ្ធិមនុស្ស ក្នុងប្រទេសនេះ។
លោក ស៊ូប៊ែឌី ក៏បានសម្តែងការសោកស្តាយជាខ្លាំង ដែលលោកមិនបានជួបប្រាស្រ័យទាក់ទងជាមួយដៃគូពិភាក្សា ក្នុងជួររដ្ឋាភិបាលនាពេលនេះ។ អ្នករាយការណ៍ពិសេស ក៏បានប្រកាសថា លោកមិនដឹងច្បាស់ទេថា ហេតុអ្វីបានជាស្ថានភាពទំនាក់ទំនងរវាងលោក និងរដ្ឋាភិបាល កើតឡើងយ៉ាងដូច្នេះ ហើយតើមកពីហេតុអ្វី?។
លោក ស៊ូប៊ែឌី ក៏បានបង្ហាញការភ្ញាក់ផ្អើល ដោយបានឮប្រតិកម្ម ចំពោះអនុសាសន៍មួយចំនួនរបស់លោក។ តែលោកអរគុណរដ្ឋាភិបាល ដែលបានអញ្ជើញរូបលោក មកប្រទេសកម្ពុជា និងមិនធ្វើឲ្យមានការរាំងស្ទះដំណើររបស់លោក ជួបនឹងជនរងគ្រោះ ដោយអំពើរំលោភបំពានសិទ្ធិមនុស្ស។
ក្នុងដំណើរការបេសកកម្មលើកនេះ លោក ស៊ូប៊ែឌី បានសំរេចចិត្ត ផ្តោតលើការឃ្លាំមើលស្ថានភាពសិទ្ធិមនុស្ស នៅកម្ពុជា និងតាមដានការអនុវត្តអនុសាសន៍ទាំងឡាយ ដែលមាននៅក្នុងរបាយការណ៍លើកមុនៗ របស់លោក។
ចាប់តាំងពីទទួលបានការតែងតាំងពីក្រុមប្រឹក្សាសិទ្ធិមនុស្សអង្គការសហប្រជាជាតិ ក្នុងខែមីនា ឆ្នាំ២០០៩ លោក ស៊ូរិយា ប្រាសាទ ស៊ូប៊ែឌី បានធ្វើរបាយការណ៍សំខាន់ធំៗចំនួនបួន ដោយបានធ្វើការវិភាគជាលំអិតអំពីស្ថានភាពសិទ្ធិមនុស្ស និងបញ្ហាប្រឈម ដែលប្រទេសកម្ពុជា ជួបប្រទះ ទាក់ទងនឹងការការពារ និងការលើកស្ទួយសិទ្ធិមនុស្ស។
របាយការណ៍ប្រចាំឆ្នាំរបស់លោក ស៊ូប៊ែឌី ដាក់ជូនក្រុមប្រឹក្សាសិទ្ធិមនុស្សអង្គការសហប្រជាជាតិ បានផ្តោតជាសំខាន់លើប្រព័ន្ធយុតិ្តធម៌ រដ្ឋសភា និងកំណែទម្រង់ប្រព័ន្ធបោះឆ្នោត និងផលប៉ះពាល់លើសិទ្ធិមនុស្ស ដោយសម្បទានគោលដៅសេដ្ឋកិច្ច និងសម្បទានដទៃផ្សេងទៀត៕
1 comment:
ប្រព័ន្ធបោះឆ្នោតនៅកម្ពុជា ពួកហ៊ុនសែនបានប្លន់យកតាំងពីឆ្នាំ១៩៩៧ម៉្លេះ។
ចូរអានកំណាព្យនេះ៖
ថ្ងៃ៥-៦កក្កដា១៩៩៧ (បទកាកគតិ)
ធ្វើរដ្ឋប្រហារ រៀបចំផែនការ កំចាត់ពួកស្តេច
កំចាយអ្នកខ្លាំង ទើបបានសំរេច រៀបចំឲ្យស្រេច
មុនពេលបោះឆ្នោត។
ដាក់សុទ្ធគ្នាអញ ធ្លាប់បានស៊ីឆ្ងាញ់ បំផ្លាញអ្នកឆោត
ឆ្នៃតាមតែចិត្ត មិនឲ្យរបូត អ្នកកាន់ចង្កូត
ស្រុកខ្មែរគឺអញ ។
ហ៊ុនសែនជាស៊ីម នៅតែញញឹម កៅអីលឿងខ្លាញ់
លក់តទៅទៀត ដីឈើត្រីអញ រួចឆ្នៃប្រវញ្ញ
រកក្បាលខ្លឹមៗ ។
ចាប់ពង្រាត់មនុស្ស ឆក់ប្លន់ស្រស់ៗ កុំអស់សង្ឃឹម
មានហុកឡងឌី រៀបចំតំរឹម ច្រឹបឲ្យស្មើត្រឹម
កុំឲ្យលូតបាន ។
ពួកក្រោមបង្គាប់ រកតាមលំដាប់ ដើរតាមលំអាន
ជិះជាន់អ្នកក្រ អារកអ្នកមាន ប្រមូលលុយឡាន
ជាស្ពានពួកយើង ។
បក្សប្រជាជន មុខក្រាស់លោភលន់តោងបុណ្យដូចឈ្លើង
ជញ្ជក់ឈាមរាស្ត្រ វិនាសចូលភ្លើង ប្រឹងច្បាមខ្លាំងឡើង
តំកើងសាច់ញាតិ ។
ពួកប្រជាជន ពូកែឆក់ប្លន់ លួចលក់ទ្រព្យជាតិ
តាំងពីកំពូល រហូតដល់បាត លាងគូដមិនស្អាត
ដើរប៉ាតគូដគេ ។
ថ្ងៃ ២៤ កញ្ញា ១៩៩៧
ស.យ.មករា
Post a Comment