បក្ស​ប្រជាជន ហ៊ុន សែន ប្រែមកថាពូកែបោក

មន្ត្រី​បក្ស​ប្រជាជន​នៅ​ខេត្ត​រតនគិរី រង​ការ​ចោទ​ថា​ធ្វើ​នយោបាយ​បោក​ប្រាស់

ដោយ រដ្ឋា វីសាល

2012-12-19 RFA

កាល​ពី​ឆ្នាំ​២០០៨ មុន​ពេល​បោះ​ឆ្នោត​ជាតិ​អាណត្តិ​ទី២ សមាជិក​ជាន់​ខ្ពស់​គណបក្ស សម រង្ស៊ី នៅ​ខេត្ត​រតនគិរី ប្រមាណ ២០​នាក់​បាន​ផ្តាច់​ខ្លួន​ចូល​ជា​សមាជិក​គណបក្ស​ប្រជាជន ហើយ​ទទួល​បាន​តំណែង និង​រង្វាន់​ពី​ការ​ផ្តាច់​ខ្លួន​នេះ ប៉ុន្តែ​ក៏​មាន​អតីត​មន្ត្រី​គណបក្ស សម រង្ស៊ី អ្នក​ផ្តាច់​ខ្លួន​មួយ​ចំនួន​ទៀត​មិន​បាន​ទទួល​តួនាទី ឬ​មុខ​តំណែង​អ្វី​នៅ​ឡើយ។

ករណី​នេះ​ធ្វើ​ឲ្យ​មាន​ប្រតិកម្ម​ចោទ​ប្រកាន់​ថា មន្ត្រី​គណបក្ស​ប្រជាជន​ធ្វើ​នយោបាយ​បោក​ប្រាស់។

សមាជិក​គណបក្ស​ប្រជាជន មួយ​រូប​នៅ​ថ្ងៃ​ពុធ ទី១៩ ខែ​ធ្នូ ឆ្នាំ​២០១២ អំពាវនាវ​ឲ្យ​មន្ត្រី​ជាន់​ខ្ពស់​បក្ស​ប្រចាំ​ខេត្ត​រតនគិរី ពិនិត្យ​ឡើង​វិញ​ពី​ការ​សន្យា​របស់​ខ្លួន​ស្ដីពី​ការ​ផ្តល់​ប្រាក់​ឧបត្ថម្ភ និង​ផ្តល់​តួនាទី​ទៅ​ឲ្យ​អតីត​សមាជិក​គណបក្ស សម រង្ស៊ី ដែល​បាន​ផ្តាច់​ខ្លួន​ចូល​ជាមួយ​គណបក្ស​ប្រជាជន។

អតីត​ជំទប់​ទី២ ឃុំ​ញ៉ាង ស្រុក​អណ្ដូងមាស លោក ឯម សុវណ្ណ មាន​ប្រសាសន៍​បញ្ជាក់​ថា លោក​បាន​សម្រេច​ចូល​ជា​សមាជិក​គណបក្ស​ប្រជាជន​កម្ពុជា កាល​ពី​ឆ្នាំ​២០០៨ បន្ទាប់​ពី​មន្ត្រី​ជាន់​ខ្ពស់​បក្ស​ប្រជាជន​ខេត្ត​មួយ​ចំនួន​សន្យា​ថា​នឹង​ផ្តល់​ប្រាក់​ឧបត្ថម្ភ​តាម​កម្រិត​តួនាទី​លោក​ជា​អតីត​ជំទប់​ទី២ នៃ​គណបក្ស សម រង្ស៊ី និង​រៀបចំ​បញ្ជី​ឈ្មោះ​លោក​ជា​បេក្ខជន​ឈរ​ឈ្មោះ​បោះ​ឆ្នោត​ក្រុម​ប្រឹក្សា​ឃុំ​អាណត្តិ​ទី៣។

លោក​បន្ត​ថា ចាប់​ពី​ពេល​ផ្តាច់​ខ្លួន​នោះ​មក លោក​ទទួល​បាន​ប្រាក់​ពី​ប្រធាន​គណបក្ស​ប្រជាជន​ខេត្ត​ចំនួន ២​លាន​រៀល ហើយ​រហូត​ពេល​នេះ លោក​មិន​បាន​ទទួល​តំណែង ឬ​តួនាទី​អ្វី​ដូច​ការ​សន្យា​នោះ​ទេ៖ «ផ្តាច់​ខ្លួន​ចេញ​ពី​គណបក្ស សម រង្ស៊ី មក ខ្ញុំ​ចូល​មក​គណបក្ស​ប្រជាជន ដោយ​គណបក្ស​ប្រជាជន​ហ្នឹង​ធានា​ចិញ្ចឹម​ប្រាក់​ខែ​ខ្ញុំ​តាម​ប្រាក់​ខែ​ចាស់​ដដែល​ហ្នឹង​ណា! គាត់​ធានា​ថា​ឲ្យ​ខ្ញុំ​ឈរ​ជា​ក្រុម​ប្រឹក្សា​របស់​គណបក្ស​ប្រជាជន​ឃុំ​អាណត្តិ​ទី៣។ ដល់​ខ្ញុំ​ទៅ​ឆែក​មើល​ការ​ឈរ​ឈ្មោះ អត់​ឃើញ​មាន​ទទេ​សុទ្ធ»។

ឆ្លើយ​តប​ករណី​នេះ ប្រធាន​គណបក្ស​ប្រជាជន​កម្ពុជា ខេត្ត​រតនគិរី លោក ម៉ួង ប៉យ បដិសេធ​សេចក្តី​ចោទ​ប្រកាន់។ លោក​បញ្ជាក់​ថា លោក​មិន​បាន​សន្យា​ណា​មួយ​ទាក់​ទិន​អតីត​មន្ត្រី​គណបក្ស សម រង្ស៊ី ដែល​ចាក​ចេញ​ពី​បក្ស​នោះ​ទេ៖ «ចោទ​ថា​ខ្ញុំ​ទៅ​សន្យា​ម៉េច? បើ​ថា​និយាយ​ពី​ប្រជាពលរដ្ឋ អា​ហ្នឹង​មាន ខ្ញុំ​ទៅ​ដោះ​បញ្ហា​រឿង​ក្រុមហ៊ុន មាន​តើ អា​រឿង​សន្យា​រឿង​តួនាទី​អ្វី​ឲ្យ​ពួក​គាត់​ម៉េច​ត្រូវ»។

លេខា​គណៈកម្មការ​សង្កេតការណ៍​ដើម្បី​ការ​បោះ​ឆ្នោត​សេរី និង​យុត្តិធម៌​នៅ​កម្ពុជា ខុមហ្វ្រែល (COMFREL) ខេត្ត​រតនគិរី លោក ជួនភីន ដារ៉ា កត់​សម្គាល់​ថា ការ​សន្យា​ក្នុង​បញ្ហា​នយោបាយ គឺ​ជា​រឿង​ធម្មតា​នៅ​ក្នុង​សង្គម​កម្ពុជា នា​ពេល​បច្ចុប្បន្ន ដោយ​សារ​មន្ត្រី​គណបក្ស​នយោបាយ​មួយ​ចំនួន​តែង​ប្រើ​ពាក្យ​សន្យា​ដើម្បី​អូស​ទាញ​ប្រជាពលរដ្ឋ​ឲ្យ​គាំទ្រ​គណបក្ស​នយោបាយ។

លោក​បន្ត​ថា ខុមហ្វ្រែល បាន​រៀបចំ​វេទិកា​ស្ដីពី​សំឡេង​ម្ចាស់​ឆ្នោត​ជាច្រើន​នៅ​តាម​មូលដ្ឋាន ដើម្បី​ឲ្យ​ប្រជាពលរដ្ឋ​ជំរុញ​ឲ្យ​មន្ត្រី​គណបក្ស​នយោបាយ​គោរព​កិច្ច​សន្យា​មុន​ពេល​បោះ​ឆ្នោត ហេតុ​នេះ​ប្រជាពលរដ្ឋ គឺ​ជា​អ្នក​សម្រេច​ចិត្ត ប្រសិន​មន្ត្រី​គណបក្ស​នយោបាយ​ណា​មិន​គោរព​កិច្ច​សន្យា៖ «បើ​សិន​មាន​ករណី​បោកប្រាស់ គាត់​សម្រេច​ចិត្ត​ខ្លួន​ឯង​ទៅ គាត់​អាច​ត្រឡប់​ទៅ​ដើម ឬ​ត្រឡប់​ទៅ​កន្លែង​ដែល​គាត់​ចូល​វិញ គឺ​ជា​សិទ្ធិ​របស់​គាត់​ហើយ»។

កន្លង​ទៅ​នេះ គេ​សង្កេត​ឃើញ​មន្ត្រី​គណបក្ស សម រង្ស៊ី មួយ​ចំនួន​ដែល​ចុះ​ចូល​ជាមួយ​គណបក្ស​ប្រជាជន ខ្លះ​បាន​ទទួល​តំណែង​ជា​រដ្ឋមន្ត្រី រដ្ឋលេខាធិការ អនុរដ្ឋលេខាធិការ ទីប្រឹក្សា​រាជ​រដ្ឋាភិបាល និង​ខ្លះ​ទៀត​ជាប់​ឆ្នោត​ជា​មន្ត្រី​ក្រុម​ប្រឹក្សា​ខេត្ត ក្រុង ស្រុក និង​ឃុំ សង្កាត់ ជាដើម។

យ៉ាង​នេះ​ក្តី នៅ​ខេត្ត​រតនគិរី អតីត​មន្ត្រី​គណបក្ស សម រង្ស៊ី ឲ្យ​ដឹង​ថា អ្នក​ដែល​បាន​ចុះ​ចូល​ជាមួយ​គណបក្ស​ប្រជាជន​នៅ​ស្រុក​កូនមុំ ស្រុក​លំផាត់ ស្រុក​អណ្ដូងមាស ស្រុក​អូរយ៉ាដាវ មួយ​ចំនួន​ទៀត មិន​បាន​ទទួល​តំណែង​អ្វី​ដូច​ការ​សន្យា​នោះ​ដែរ៕