KI Media: មន្ត្រីថាកម្ពុជារីកចម្រើនក្នុងការគោរពសិទ្ធិមនុស្សតែអង្គការសិទ្ធិមនុស្សជាតិ និងអន្តរជាតិវាយតម្លៃផ្សេង

សមមិត្ត អុង យ៉ិនទៀង

Friday, 07 December 2012
វង្ស សុខេង
The Phnom Penh Post

ភ្នំពេញៈ គណៈកម្មាធិការសិទ្ធិមនុស្សរបស់រាជរដ្ឋាភិបាលបានលើកឡើងថា កម្ពុជាបាននិងកំពុងមានការរីកចម្រើនគួរឲ្យកត់សម្គាល់ ក្នុងការលើកស្ទួយសិទ្ធិមនុស្ស ជាពិសេសសិទ្ធិនយោបាយ សេដ្ឋកិច្ច អន្តោប្រវេសន៍ដើម្បីការងារ សេរីភាពសារព័ត៌មាន និងការអប់រំ។

លោក ឱម យ៉ិនទៀង ប្រធានគណៈកម្មាធិការសិទ្ធិមនុស្សរបស់រដ្ឋាភិបាល បានមានប្រសាសន៍ នៅក្នុងពិធីរំឭកខួបលើកទី ៦៤ នៃទិវាសិទ្ធិមនុស្សអន្តរជាតិ ដែលមានសមាជិកសភា ព្រឹទ្ធសភា និងបុគ្គលិកអង្គការសង្គមស៊ីវិលរាប់រយនាក់ ចូលរួម កាលពីថ្ងៃពុធ នៅព្រឹទ្ធសភាថា គណបក្សនយោបាយទាំងអស់ នៅកម្ពុជា បានអនុវត្តយ៉ាងពេញលេញនូវសិទ្ធិសេរីភាពក្នុងការបញ្ចេញមតិ បន្ទាប់ពីប្រទេសកម្ពុជា ទទួលបានស្ថិរភាពនយោបាយ ក្នុងឆ្នាំ១៩៩៨។ លោកបានថ្លែងក្នុងសុន្ទរកថា បើកកម្មវិធីទិវាសិទ្ធិមនុស្សនេះថា៖«នៅពេលកម្ពុជាមានសន្តិភាព និងស្ថិរភាពនយោបាយពេញលេញ មានគណបក្សនយោបាយជាច្រើន ត្រូវបានបង្កើតឡើង និងធ្វើសកម្មភាពនយោបាយដោយសេរី។ គណបក្សនយោបាយ អង្គការក្រៅរដ្ឋាភិបាលជាតិនិងអន្តរជាតិបានប្រើប្រាស់សិទ្ធិ និងសេរីភាពបញ្ចេញមតិរបស់ពួកគេដោយសេរីស្របតាមច្បាប់ (sic!)»។

ទោះបីយ៉ាងណា អនុរដ្ឋលេខាធិការ ក្រសួងកិច្ចការនារី លោកស្រី ហោ ម៉ាលីន បានមានប្រសាសន៍ក្នុងសុន្ទរកថាបើកទិវានេះដែរថា សិទ្ធិនយោបាយ នៅតែមានគម្លាតធំ រវាងស្ត្រីនិងបុរស ដែលកំពុងមានអាសនៈនៅក្នុងព្រឹទ្ធសភា រដ្ឋសភា និងតួនាទីក្នុងជួររដ្ឋាភិបាលខ្លះទៀត មានចាប់ពីថ្នាក់ឧបនាយករដ្ឋមន្ត្រី រហូតដល់ក្រុមប្រឹក្សាឃុំសង្កាត់។

លោក យឹម សុវណ្ណ អ្នកនាំពាក្យគណបក្សសមរង្ស៊ី បានមានប្រសាសន៍ថា គណបក្សប្រជាជនកម្ពុជា ដែលកំពុងកាន់អំណាចនៅតែបន្តដាក់សម្ពាធទៅលើមេដឹកនាំគណបក្ស ប្រឆាំង ដោយរារាំងលោក សម រង្ស៊ី មិនឲ្យត្រឡប់ចូលមកកម្ពុជាវិញ ដើម្បីអនុវត្តសិទ្ធិនយោបាយរបស់គាត់ឡើយ។ លោក យឹម សុវណ្ណ បានថ្លែងថា៖«ប្រសិនបើគ្មានដំណោះស្រាយនយោបាយ អនុញ្ញាតឲ្យមេដឹកនាំគណបក្សប្រឆាំងដ៏សំខាន់លោក សម រង្ស៊ី វិលមកកម្ពុជាវិញ ដើម្បីអនុវត្តសិទ្ធិនយោបាយរបស់គាត់ទេ ខ្ញុំគិតថា ការគោរពសិទ្ធិមនុស្ស កាន់តែអាក្រក់ទៅនៅកម្ពុជា នេះគឺយើងគ្រាន់តែមើលតែមួយចំណុចប៉ុណ្ណោះ»។

យ៉ាង ណាក្តី ដោយសំដៅទៅលើការបណ្តេញប្រជាជនចេញពីដីធ្លី ដែលករណីខ្លះ រហូតមានការបាញ់សម្លាប់ ឬបាញ់ឲ្យរងរបួស ដូចជាករណីបាញ់សម្លាប់ក្មេងស្រី ម្នាក់ នៅឃុំកំពង់ដំរី ស្រុកឆ្លូងខេត្តក្រចេះ ការបាញ់សម្លាប់ អ្នកការពារធនធានធម្មជាតិដ៏ល្បីល្បាញ គឺលោក ឈុត វុទ្ធី ការកាត់ទោសដ៏ចម្រូងចម្រាស ទៅលើលោក ម៉ម សូណង់ដូ នាយកវិទ្យុសំបុកឃ្មុំ ដែលជាវិទ្យុឯករាជ្យ និងការទប់ស្កាត់ ការដើរហែក្បួនតវ៉ាមួយចំនួន ពីសំណាក់អាជ្ញាធរជាដើម។ល។ គឺជាទឡ្ហីករណ៍ដែលអង្គការសិទ្ធិមនុស្សជាតិ និងអន្តរជាតិជាច្រើនបានធ្វើការវាយតម្លៃ និងរិះគន់ជាបន្តបន្ទាប់មកថា ស្ថានភាពសិទ្ធិមនុស្សនៅប្រទេសកម្ពុជាកំពុងមានស្ថានភាពអាក្រក់ ឡើង៕