ចោរប្រកែកថាមិនបានលួចទេ

គ.ជ.ប ច្រានចោលការចោទប្រកាន់ ថាបំប៉ោង តួលេខអ្នកបោះឆ្នោត

ថ្ងៃទី 25 មករា 2013 | ដោយ: រតនា

Cambodia Express News

ភ្នំពេញ: អគ្គលេខាធិការ​គណៈកម្មាធិកា​រ​ជាតិ​រៀបចំ​ការបោះឆ្នោត (​គ​.​ជ​.​ប​) លោក ទេព នីថា បាន​ច្រានចោល​ចំពោះ​ការចោទប្រកាន់ របស់លោក សម រង្ស៊ី ប្រធាន​គណបក្ស​សង្គ្រោះ​ជាតិ ដែល​បាន​ចោទថា គ​.​ជ​.​ប បំប៉ោង​តួលេខ​អ្នកបោះឆ្នោត (​ចំនួន ៩​លាន ៦​សែន ៧​ម៉ឺន​នាក់​) ដើម្បី​ជួយ​បន្ថែម​សន្លឹកឆ្នោត​ដល់​គណបក្ស​កាន់អំណាច គឺជា​ការមិន​ត្រឹមត្រូវ​ទេ​។
​ការច្រានចោល​នេះ គឺ​បន្ទាប់ពី​លោក សម រង្ស៊ី បានលើកឡើង​កាលពីពេល​ថ្មីៗ​នេះ​ថា តាមរយៈ​ការស្រាវជ្រាវ​របស់លោក រកឃើញថា អ្នក​មានឈ្មោះ​បោះឆ្នោត​ជិត​មួយ​លាន​នាក់ ក្នុងចំណោម​តួលេខ​របស់ គ​.​ជ​.​ប ចំនួន ៩​លាន ៦​សែន ៧​ម៉ឺន​នាក់ ជា​តួលេខ​បំប៉ោង ហើយ​មាន​គោលបំណង​ជួយ​បន្ថែម​សន្លឹកឆ្នោត ឲ្យ​គណបក្ស​ប្រជាជន​កម្ពុជា ដែល​កំពុងតែ​កាន់អំណាច​នាពេល​បច្ចុប្បន្ននេះ​។​
​លោក ទេព នីថា បាន​បន្តថា នេះ​ជាការ​យល់ឃើញ​របស់លោក សម រង្ស៊ី ហើយ គ​.​ជ​.​ប មាន​មូលហេតុ​របស់ខ្លួន ហើយ​តួលេខ​អ្នកបោះឆ្នោត មិនមែនជា​លេខ គ​.​ជ​.​ប ជប់​ទេ គឺជា​លេខ​ដែល​អនុវត្ត​ជាក់ស្តែង ហើយ​ចេញ​លេខ​នោះមក​។ លោក​បាន​បញ្ជាក់ថា “​មិនមែន​យើង​ដេក​អង្គុយ​គិត អង្គុយ​គិត​នោះទេ គឺ​យើង​យក​ការងារ​ទៅ​អនុវត្ត​ជាក់ស្តែង ហើយ​វា​ចេញ​លេខ​នោះមក អ៊‌ីចឹង​ទេ នេះ​គឺជា​លេខ​ដែល​យើង​អនុវត្ត​ចេញមក មិនមែនជា​លេខ​ដែល​យើង​ស្រមៃ​ដាក់​នោះទេ​”​។​

​គួររម្លឹកថា ប្រធាន​គណបក្ស​សង្គ្រោះ​ជាតិ លោក សម រង្ស៊ី ដែល​កំពុងតែ​និរទេស​ខ្លួន​នៅក្រៅ​ប្រទេស កាលពី​ថ្ងៃទី​២២ ខែមករា ឆ្នាំ​២០១៣ បានធ្វើការ​ផ្សព្វផ្សាយ​តាម​សារ​អេ​ឡិច​ត្រូ​និ​ច​ថា តួលេខ​អ្នក​ដែលមាន​សិទ្ធិ​បោះឆ្នោត​ពិតប្រាកដ មាន​ជិត ៩ លាន​នាក់​នេះ បើ​រាប់​ត្រឹម​អាយុ ១៨ ឆ្នាំ​ឡើងទៅ ប៉ុន្តែ​បើតាម​តួលេខ​របស់ គ​.​ជ​.​ប ដែល​បានបង្ហាញ គឺមាន​រហូតដល់ ៩​លាន ៦​សែន ៧​ម៉ឺន​នាក់​។ ​ចំនួន​នេះ​ជា​តួលេខ​បំប៉ោង ដើម្បី​ជួយ​បន្ថែម​សន្លឹកឆ្នោត​ទៅ​ឲ្យ​គណបក្ស​ប្រជាជន​កម្ពុជា ហើយ​ក្នុងនោះ​មាន​ជនអន្តោប្រវេសន៍​បរទេស​រាប់ម៉ឺន​នាក់ ដែលមាន​គ្មាន​សិទ្ធិ​បោះឆ្នោត ក៏មាន​ឈ្មោះ​នៅក្នុង​បញ្ជី​ឈ្មោះ​បោះឆ្នោត​ផងដែរ​។​
​លោក សម រង្ស៊ី បាន​បញ្ជាក់ថា ការអះអាង​របស់លោក បានធ្វើ​ឡើង​ដោយ​ផ្អែក​ទៅតាម​ការស្រាវជ្រាវ​ប្រភព​ចំនួន​បី ក្នុងនោះ​មាន​ប្រភពពី​គេហទំព័រ CIA អាមេរិក គេហទំព័រ UNICES និង​ប្រភព​គេហទំព័រ​អាស៊ាន​។ បើតាមការផ្ទៀងផ្ទាត់​គេហទំព័រ​ទាំងបី​នេះ ចំនួន​ប្រជាជន​កម្ពុជា​សរុប​មាន ១៤​លាន ៩៥​ម៉ឺន​នាក់ នៅ​ឆ្នាំ​២០១២​។ ប្រជាជន​ក្រោម​អាយុ ១៨ ឆ្នាំ មាន​ចំនួន ៤០ ភាគរយ គឺ​ស្មើ ៥​លាន ៩​សែន ៨​ម៉ឺន​នាក់ ហើយ​ប្រជាជន​ដែលមាន​អាយុ ១៨ ឆ្នាំ​ឡើង មាន​ចំនួន ៦០ ភាគរយ ស្មើនឹង ៨​លាន ៩​សែន ៧​ម៉ឺន​នាក់​។ តាម​តួលេខ​នេះ មានន័យថា អ្នកបោះឆ្នោត​មានត្រឹមតែ​ជិត ឬ ៩ លាន​នាក់​ប៉ុណ្ណោះ​។​

​គណៈកម្មាធិការ​ជាតិ​រៀបចំ​ការបោះឆ្នោត កាលពី​ថ្ងៃទី​៣១ ខែធ្នូ ឆ្នាំ​២០១២ បានធ្វើការ​ប្រកាស​លទ្ធ​ផល នៃ​ការពិនិត្យ​បញ្ជី​ឈ្មោះ និង​ចុះឈ្មោះ​បោះឆ្នោត ឆ្នាំ​២០១៣ បាន​បង្ហាញថា ចំនួន​ឈ្មោះ​ក្នុង​បញ្ជី​បោះឆ្នោត​ឆ្នាំ​២០១២ ទាំង ២៤ រាជធានី​-​ខេត្ត មាន​ចំនួន​សរុប ៩.៦៧៥.៤៥៣ នាក់​។ ប្រជាពលរដ្ឋ​មាន​អាយុ ១៨ ឆ្នាំ​ឡើង មាន​ចំនួន ៩.៥០៩.៧៣២ នាក់​។ ចំណែក​ចំនួន​ឈ្មោះ​ក្នុង​បញ្ជី​ឆ្នាំ​២០១១ មាន​ចំនួន ៩.២០៣.៤៩៣ នាក់​៕