http://www.youtube.com/watch?v=EQCXr6Q_ihg&feature=youtu.be
ដោយ ម៉ម មុនីរតន៍ 2013-01-25 RFA
ស្របពេលដែលការទាមទារដំឡើងប្រាក់ខែគោលរបស់កម្មករសម្រាប់
ឆ្នាំ២០១៣ នេះ
កំពុងស្ថិតនៅក្នុងដំណាក់កាលនៃកិច្ចពិភាក្សានៅឡើយនោះ
ប្រធានសហភាពសហជីពកម្ពុជា ព្រមានថា
ការធ្វើកូដកម្មដ៏ធំមួយនឹងកើតឡើង
បើសិនជាភាគីរោងចក្រសម្រេចដំឡើងប្រាក់ឈ្នួលគោលសម្រាប់កម្មករ
ប្រមាណតែ ១០% បន្ថែមលើប្រាក់ខែគោលក្នុងពេលបច្ចុប្បន្នចំនួន
៦១ដុល្លារពិតមែននោះ។
៨-មេសា-២០១២៖ លោក រ៉ុង ឈុន
ប្រធានសហភាពសហជីពកម្ពុជា
និងជាប្រធានសមាគមគ្រូបង្រៀនកម្ពុជាឯករាជ្យ ផ្ដល់បទសម្ភាសន៍
នៅការិយាល័យរបស់លោក។
លោក រ៉ុង ឈុន ប្រធានសហភាពសហជីពកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ បញ្ជាក់នៅថ្ងៃទី២៤ មករា ថា កម្មកររោងចក្រនឹងមិនអាចទទួលយកបាននោះទេ ប្រសិនបើការដំឡើងប្រាក់ខែគោលសម្រាប់កម្មករបន្ថែមត្រឹម ១០% នោះ។ លោកគិតថា ផ្អែកតាមការសិក្សារបស់ក្រុមសេដ្ឋកិច្ចរកឃើញថា រោងចក្រគឺពិតជាមានលទ្ធភាពដំឡើងប្រាក់ខែគោលដល់កម្មករច្រើនជាង ១៥០ដុល្លារបាន។
លោក រ៉ុង ឈុន៖ «អ្វីដែលប្រធានសមាគមរោងចក្រកាត់ដេរបានលើកឡើង ថាពិចារណាថាដំឡើង ១០% នៃប្រាក់ខែគោលនោះ បើការលើកឡើងនេះវាពិតជាអនុវត្តបែបហ្នឹងមែន ពេលហ្នឹង កម្ពុជា នឹងមានផ្ទុះបញ្ហាកូដកម្មដ៏ធំមួយនៅតាមបណ្ដារោងចក្រ»។
ក៏ប៉ុន្តែ ប្រធានសមាគមរោងចក្រកាត់ដេរកម្ពុជា លោក វ៉ាន់ ស៊ូអៀង ចាត់ទុកថា ការថ្លែងរបស់លោក រ៉ុង ឈុន នេះ ទំនងខ្វះការយល់ដឹងផ្នែកទីផ្សារ។ ទោះជាយ៉ាងណា លោក វ៉ាន់ ស៊ូអៀង គិតថា ចរន្តសេដ្ឋកិច្ចនៅក្នុងពិភពលោក ការដំឡើងប្រាក់ឈ្នួលគោល គេពុំអាចធ្វើម្ដងដើម្បីឲ្យដល់ចំណុចគោលដៅបាននោះទេ ហើយការដំឡើងតាមការទាមទារនោះ ក៏ពុំអាចធ្វើទៅបានដែរ។
តែយ៉ាងណាក៏ដោយ លោកបញ្ជាក់ថា ការសម្រេចរបស់ក្រុមកម្មករនោះ គឺជាសិទ្ធិរបស់ពួកគេ៖ «ខ្ញុំ ឆ្លើយហើយថាឲ្យគេធ្វើអីធ្វើទៅ ហើយគាត់មើលនៅស្រុកណាមានឡើងប្រាក់ខែមួយឆ្នាំឡើង ១០០%។ អាហ្នឹងឆ្កួត អាហ្នឹងមិនធម្មតា អាហ្នឹងហៅឆ្កួត។ ខ្ញុំអត់ទាន់ឡើងប៉ុណ្ណា ប៉ុណ្ណឹងឡើយទេ យើងនៅតវ៉ាហ្នឹង ហើយកាលណាតវ៉ារកមួយរយពីររយភាគរយ ម៉េចមិនសុំមួយពាន់ភាគរយទៅ អាហ្នឹងថាអ្នកអត់ អត់ចេះ អ្នកអត់ចេះកុំធ្វើមេគេ»។
សេចក្ដីថ្លែងការណ៍របស់សហភាពសហជីពកម្ពុជា លោក រ៉ុង ឈុន ចុះកាលបរិច្ឆេទថ្ងៃទី២៤ មករា ឲ្យដឹងថា កម្ពុជា នឹងផ្ទុះបាតុកម្មក្នុងទ្រង់ទ្រាយធំមួយនៅតាមបណ្ដារោងចក្រកាត់ដេរ សម្លៀកបំពាក់ និងស្បែកជើង បើការដំឡើងប្រាក់ឈ្នួលគោលអប្បបរមាត្រឹម ១០% នៃប្រាក់ខែគោលសរុប ៦១ដុល្លារ ដូចការអះអាងរបស់ប្រធានសមាគមរោងចក្រកាត់ដេរនៅកម្ពុជា ពិតមែននោះ។
ទោះជាបែបណា លោក រ៉ុង ឈុន ពុំទាន់អាចបញ្ជាក់បាននៅឡើយទេ ពីវេលាពិតប្រាកដនៃការធ្វើបាតុកម្មនោះ ដោយត្រូវរង់ចាំលទ្ធផលនៃកិច្ចពិភាក្សារវាងតំណាងមេដឹកនាំសហជីព ជាមួយក្រុមការងារទំនាក់ទំនងវិជ្ជាជីវៈ និងតំណាងភាគីខាងរោងចក្រនៅក្រោយថ្ងៃទី២៦ មករា ខាងមុខនេះសិន។
វិទ្យុអាស៊ីសេរី ពុំអាចស្នើសុំការការអត្ថាធិប្បាយបានទេលើបញ្ហានេះពីលោក អ៊ិត សំហេង រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាសហប្រធានក្រុមការងារទំនាក់ទំនងវិជ្ជាជីវៈ ដែលកំពុងពិភាក្សាលើប្រាក់ខែគោលនេះ ដោយលោកទទួលទូរស័ព្ទ ហើយផ្ដាច់ទៅវិញ។
ក្រុមអ្នកធ្វើការពាក់ព័ន្ធនឹងវិស័យឧស្សាហកម្មរោងចក្រកាត់ដេរ នៅក្នុងប្រទេសកម្ពុជា រកឃើញថា គិតត្រឹមពាក់កណ្ដាលខែមករា ដើមឆ្នាំ២០១៣ នេះ ការផ្ទុះបាតុកម្មនៅតាមរោងចក្រដាច់ដោយឡែកពីគ្នា បានកើនឡើងជាង ១០ករណី។ តួលេខនេះបើប្រៀបធៀបនឹងឆ្នាំ២០១២ គឺជាចំនួនមួយកំពុងប្រឈមយ៉ាងខ្ពស់ក្នុងប្រទេសកំពុងអភិវឌ្ឍមួយ នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
2 comments:
លោក រ៉ុង ឈុន បានគំរាមបែបនេះជាច្រើនលើក
មកហើយ តែអនុវត្តិបានតិចតួចណាស់។ បើតែ
យ៉ាងនេះប្រយ័ត្នសាប ថ្ងៃក្រោយនិយាយគេលែង ស្តាប់។ អ្នកដឹកនាំ កាលបើបានសន្និយ៉ាហើយចាំ
បាច់ត្រូវតែគោរពសំដីរបស់ខ្លួន កុំឲ្យ « កោកៗ
សឹកតែមាត់ត្រដោក ឆ្អែតឯពោះក្របី » សូវឲ្យ
« មឹះៗកេះឆ្នាំងបាយធ្លុះ »វិញប្រសើជាង។
ស៊ី អេងគ្រុយ
លោក រ៉ុង ឈុន នឹងក្លាយទៅជា
ង្វៀងរ៉ុង ឈុន យ៉ាងរលូន.....
បើតែ«កោកៗ»...អត់បានការយ៉ាងនេះ!
Post a Comment