+02.jpg) |
| កម្លាំងសមត្ថកិច្ចទប់ស្កាត់អ្នកភូមិមិនឲ្យធ្វើដំណើរទៅតវ៉ា នៅមុខភូមិគ្រឹះលោកនាយករដ្ឋមន្ត្រី ហ៊ុន សែន នៅក្បែរវិមានឯករាជ្យ។ រូបថត ហេង ជីវ័ន |
Tuesday, 19 February 2013
គឹម យុទ្ធណា
The Phnom Penh Post
នៅមុនពេលរំសាយវិលទៅផ្ទះរៀងៗខ្លួនវិញ ក្រុមអ្នកតវ៉ាបានស្រែកចំអកដល់កម្លាំងសមត្ថកិច្ចថា«តើចេះខ្មាសគេឬអត់...ស្លៀកពាក់ឯកសណ្ឋានជាប៉ូលិស ប៉េអឹម ទាហាន តែបែរជានាំគ្នាទៅឈរចាំសុំលុយអាំងប៉ាវពីឈ្មួញមានលុយ ពីអ្នកមានអំណាច...ការពារអ្នកមានលុយ រួចមកធ្វើបាបប្រជាពលរដ្ឋស្លូតត្រង់...តើវាសមដែរអត់?»។
ភ្នំពេញៈ តំណាងប្រជាពលរដ្ឋមកពីសហគមន៍បឹងកក់ អតីតអ្នកភូមិបុរីកីឡា និងថ្មគោល ប្រមាណ ៥០ នាក់ បាននាំគ្នាធ្វើការតវ៉ាជាថ្មីទៀត នៅមុខក្រសួងយុត្តិធម៌ក្បែរព្រះបរមរាជវាំង កាលពីព្រឹកម្សិលមិញដើម្បីជំរុញឲ្យក្រសួងមួយនេះជួយអន្តរាគមន៍ដោះលែងសកម្មជនដីធ្លីអ្នកស្រី យ៉ោម បុប្ផា ដែលកំពុងត្រូវបានឃុំខ្លួន នៅពន្ធនាគារព្រៃស។
នេះជាការកក្រើកឡើងវិញនៃការតវ៉ារបស់អ្នកភូមិដែលមានជម្លោះដីធ្លី ដ៏រ៉ាំរ៉ៃ ក្រោយពីបញ្ចប់ព្រះរាជពិធីបុណ្យព្រះបរមសព ព្រះមហាវីរក្សត្រ នរោត្តម សីហនុ កាលពីដើមខែនេះ ដែលនៅក្នុងព្រះរាជពិធីថ្វាយព្រះភ្លើងព្រះបរមរតនកោដ្ឋ ក៏មានការដោះលែងនិងបន្ធូរបន្ថយទោសទណ្ឌិតជាង៤០០ នាក់ ផងដែរនោះ។
ក្រុមអ្នកតវ៉ា ដែលនៅលើក្បាលពួកគេមានពាក់រូបថត សកម្មជនដីធ្លីនៅតំបន់បឹងកក់ អ្នកស្រី យ៉ោម បុប្ផា និងខ្លះទៀត មានកាន់ព្រះពុទ្ធរូប និងផ្កាឈូកនៅក្នុងដៃគ្រប់ៗគ្នា បានប្រមូលផ្តុំគ្នា អង្គុយស្រែក តាមឧបករណ៍បំពងសំឡេងនៅខាងមុខក្រសួងយុត្តិធម៌ដោយជំរុញឲ្យក្រសួងនេះ ជួយអន្តរាគមន៍ ដោះលែងតំណាងពួកគេចេញពីពន្ធនាគារ។
ក្រុមអ្នកតវ៉ាអះអាងថា អ្នកស្រី យ៉ោម បុប្ផាគឺជាសកម្មជនដីធ្លីដែលតស៊ូមតិដោយសន្តិវិធី ប្រឆាំងនឹងការបណ្តេញចេញដោយបំពានតែប៉ុណ្ណោះ មិនគួរណាដាក់ទោសគាត់ដោយចាប់ឃុំនោះទេ «សូមក្រសួងយុត្តិធម៌ ដោះលែងអ្នកស្រីយ៉ោម បុប្ផា ជាបន្ទាន់ គាត់គ្មានកំហុសទេ បើមិនដូច្នោះទេក្រសួងនេះ គួរតែដូរឈ្មោះដាក់ថា ក្រសួងអយុត្តិធម៌វិញទៅល្អជាង!»។
តំណាងអ្នកតវ៉ា អ្នកស្រី ទេព វន្នី បានថ្លែងប្រាប់អ្នកកាសែតថា ការគ្មានឈ្មោះសកម្មជនដីធ្លី ក្នុងចំណោមអ្នកទោសជាង៤០០ នាក់ ដែលត្រូវដោះលែង និងបន្ធូរបន្ថយទោសនៅក្នុងព្រះរាជពិធីបុណ្យព្រះបរមសពសម្តេចឪ គឺជាភ័ស្តុតាងមួយទៀត បង្ហាញថា ប្រព័ន្ធយុត្តិធម៌នៅកម្ពុជា មិនឯករាជ្យ ហើយមិនគោរពសិទ្ធិមនុស្ស និងសិទ្ធិរស់នៅរបស់ប្រជាពលរដ្ឋទេ។ អ្នកស្រីបានបញ្ជាក់ថា៖«អ្នកទោសដែលប្លន់ អ្នកទោសដែលសម្លាប់មនុស្ស អ្នកទោសដែលជួញដូរគ្រឿងញៀន បែរជាមានឱកាស ត្រូវក្រសួងយុត្តិធម៌ ស្រង់ឈ្មោះ លើកលែងទោសនៅពេលបុណ្យព្រះបរមសពសម្តេចឪទៅវិញ តែចំពោះអ្នកស្រី យ៉ោម បុប្ផា គឺអត់មាន គឺវាអយុត្តិធម៌បំផុត សម្រាប់ពួកខ្ញុំទាំងអស់គ្នា ដែលជាប្រជាពលរដ្ឋរងគ្រោះជាពិសេសអយុត្តិធម៌បំផុត សម្រាប់អ្នកស្រី យ៉ោម បុប្ផា»។
អ្នកស្រី យ៉ោម បុប្ផា ត្រូវតុលាការកាត់ឲ្យជាប់ពន្ធនាគារ៣ឆ្នាំ ពីបទប្រើហិង្សាដោយចេតនាពាក់ព័ន្ធទៅនឹងការវាយដំអ្នករត់ម៉ូតូឌុបពីរនាក់ ដែលក្រុមអ្នកភូមិ និងអង្គការសង្គមស៊ីវិលជាច្រើនយល់ថា ជាបទចោទប្រកាន់ ដែលគេប្រឌិតឡើង ដើម្បីបំបាក់ស្មារតីទៅលើសកម្មជនដីធ្លីរូបនេះ និងសកម្មជនផ្សេងទៀត ដែលតែងតែចេញមុខតវ៉ា ការពារផ្ទះសម្បែងរបស់ខ្លួនប្រឆាំងទៅនឹងការរំលោភបំពាន។ មកដល់ពេលនេះ អ្នកស្រី យ៉ោម បុប្ជា បានជាប់ពន្ធនាគារជាង៥ខែហើយ។
ទោះយ៉ាងណា ការអង្គុយស្រែកតវ៉ារបស់សកម្មជនដីធ្លីរយៈពេលមួយព្រឹកពេញ មិនត្រូវបានមន្ត្រីក្រសួងយុត្តិធម៌ណាម្នាក់ ចេញមុខមកជួបចរចាជាមួយពួកគេទេ។ នៅពេលក្រោយមកក្រុមអ្នកតវ៉ា បានបន្តដំណើរសំដៅទៅភូមិគ្រឹះរបស់លោកនាយរដ្ឋមន្ត្រី ហ៊ុន សែន នៅក្បែរវិមានឯករាជ្យ ដែលមានចម្ងាយប្រមាណជាង ១ គីឡូម៉ែត្រ ពីក្រសួងយុត្តិធម៌ ដើម្បីសុំកិច្ចអន្តរាគមន៍ ពីលោកនាយករដ្ឋមន្ត្រី។
លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ មិនអាចទាក់ទងបានទេ ខណៈលោក សំ ប្រជាមានិត អ្នកនាំពាក្យក្រសួងនេះបានថ្លែងថា លោកជាប់រវល់ប្រជុំ មិនអាចផ្តល់ការពន្យល់បានឡើយ។
ក្បួនដង្ហែរបស់អ្នកតវ៉ា នៅវេលាម៉ោងប្រហែលជា១ រសៀល ត្រូវបានរារាំងដោយកងកម្លាំងសមត្ថកិច្ចចម្រុះ របស់សាលារាជធានី និងក្រសួងមហាផ្ទៃនៅម្តុំនាគបាញ់ទឹក សួនច្បារវិមានឯករាជ្យ ចម្ងាយប្រមាណ ៣០០ម៉ែត្រពីភូមិគ្រឹះរបស់លោកនាយករដ្ឋមន្ត្រី។ ក្រុមសមត្ថកិច្ចប្រមាណ២០០ នាក់ ដែលបានត្រៀមរួចជាស្រេច ប្រដាប់ដោយខែល ដំបងឆក់ អាវុធវែងខ្លី ឡានសម្រាប់ត្រៀមដឹកអ្នកតវ៉ា និងរបាំងរាំងផ្លូវ បានព្យាយាមហាមឃាត់ដំណើររបស់ក្រុមអ្នកតវ៉ាមិនឲ្យបន្តដំណើរទៅមុខទៀតបានឡើយ ក្រោមហេតុផលថា រំខានដល់សណ្ដាប់ធ្នាប់សាធារណៈ។ ទោះយ៉ាងណាក្រុមសមត្ថកិច្ច និងអ្នកភូមិមិនមានការប៉ះទង្គិចគ្នានោះទេក្រោយពីកម្លាំងសមត្ថកិច្ច បានបើកឡានកៀងគំរាមចាប់ខ្លួនក្រុមអ្នកតវ៉ាដាក់ក្នុងឡាន។ ប៉ុន្តែពួកគេបានស្រែកដោយបានស្តីបន្ទោសដល់កងកម្លាំងប្រដាប់អាវុធទាំងអស់នោះថា ស្លៀកពាក់ឯកសណ្ឋានជាកងកម្លាំងប្រដាប់អាវុធរបស់ជាតិ តែមិនបានការពារ និងបម្រើដល់ប្រជាពលរដ្ឋ បែរជាមកបម្រើតែអ្នកមានអំណាចនិងអ្នកមានលុយទៅវិញ។
នៅមុនពេលរំសាយវិលទៅផ្ទះរៀងៗខ្លួនវិញ ក្រុមអ្នកតវ៉ាបានស្រែកចំអកដល់កម្លាំងសមត្ថកិច្ចថា«តើចេះខ្មាសគេឬអត់...ស្លៀកពាក់ឯកសណ្ឋានជាប៉ូលិស ប៉េអឹម ទាហាន តែបែរជានាំគ្នាទៅឈរចាំសុំលុយអាំងប៉ាវពីឈ្មួញមានលុយ ពីអ្នកមានអំណាច...ការពារអ្នកមានលុយ រួចមកធ្វើបាបប្រជាពលរដ្ឋស្លូតត្រង់...តើវាសមដែរអត់?»។ ការនិយាយបែបចំអករបស់អ្នកភូមិនេះ គឺសំដៅទៅដល់កងកម្លាំងប៉ូលិស ប៉េអឹម និងទាហានរាប់រយនាក់ ដែលបានទៅឈរប្រជ្រៀតគ្នាចាំសុំលុយពីមេឈ្មួញល្បីឈ្មោះម្នាក់នៅក្នុងឱកាសនៃថ្ងៃបុណ្យចូលឆ្នាំចិនកាលពីថ្ងៃអាទិត្យ៕
+02.jpg)
No comments:
Post a Comment