ហេង រស្មី
VOA Khmer
ភ្នំពេញ៖ គណបក្សប្រឆាំងក្នុងប្រទេសកម្ពុជាបានទទូចឱ្យរដ្ឋាភិបាលចាត់វិធានការជាក់លាក់លើក្រុមហ៊ុនឯកជនដែលជ្រើសរើសពលករខ្មែរទៅធ្វើការនៅក្រៅប្រទេស។
លោកស្រីមូរ សុខហួរអ្នកតំណាងរាស្ត្រគណបក្សប្រឆាំងនៅថ្ងៃសុក្រនេះបានទាមទារសារជាថ្មីម្តងទៀតឱ្យលោកនាយករដ្ឋមន្ត្រីហ៊ុន សែនដាក់វិធានការទប់ស្កាត់ការនាំពលករខ្មែរទៅបម្រើការងារនៅក្រៅប្រទេសដែលរួមមានប្រទេសថៃ ប្រទេសម៉ាឡេស៊ីនិងប្រទេសកូរ៉េខាងត្បូង។
ការលើកឡើងសារជាថ្មីរបស់លោកស្រីមូរ សុខហួរបានកើតមានឡើងក្រោយពីលិខិតរបស់អ្នកតំណាងរាស្ត្រគណបក្សប្រឆាំងកាលពីខែតុលាឆ្នាំ២០១១ទៅលោកនាយករដ្ឋមន្ត្រីហ៊ុន សែនដើម្បីឱ្យពិនិត្យនិងចាត់វិធានការតាមផ្លូវច្បាប់ដើម្បីធានាសុវត្ថិភាពជូនពលករខ្មែរនៅក្រៅប្រទេសមិនមានប្រសិទ្ធភាព។
លោកស្រីមូរ សុខហួរបានថ្លែងប្រាប់ក្នុងអង្គសន្និសីទកាសែតនៅឯរដ្ឋសភាថារយៈពេលជាងពីរឆ្នាំកន្លងមកនេះរដ្ឋាភិបាលកម្ពុជាមិនបានចាត់វិធានការដើម្បីទប់ស្កាត់ការនាំពលករចាកចេញទៅក្រៅប្រទេសទេ។អ្នកស្រីបាននិយាយថាស្ថានភាពពលករខ្មែរទៅក្រៅប្រទេសបច្ចុប្បន្ននេះកំពុងស្ថិតនៅក្នុងចំណុចប្រកាសអាសន្នបើពុំបានទប់ស្តាត់ឱ្យបានល្អប្រសើរនោះទេ។
«ខ្ញុំបារម្ភណាស់ពីព្រោះករណីម៉ាឡេហ្នឹងគេបិទចោលតែម្តង អត់មានវិធានការអត់មានអ្នកណាទទួលខុសត្រូវនឹងរឿងម៉ាឡេសោះមានតែអង្គការ។តើតួនាទីរបស់រដ្ឋាភិបាលការទទួលខុសត្រូវរបស់រដ្ឋាភិបាលនៅឯណា? ខ្ញុំឃើញថាវាអត់»។
នៅក្នុងលិខិតរបស់អ្នកតំណាងរាស្ត្រគណបក្សសម រង្ស៊ីដែលបានដាក់ជូនលោកហេង សំរិនប្រធានរដ្ឋសភាដើម្បីស្នើសុំលោកនាយករដ្ឋមន្ត្រីហ៊ុន សែនពិនិត្យនិងចាត់វិធានការតាមផ្លូវច្បាប់ដើម្បីធានាសុវត្ថិភាពដល់ពលករ ពលការិនីខ្មែរនៅក្រៅប្រទេសកាលពីឆ្នាំ២០១១បានឱ្យដឹងថាយន្តការជ្រើសរើសនិងបញ្ជូនពលករទេសន្តរប្រវេសន៍ទៅកាន់ប្រទេសម៉ាឡេស៊ី ប្រទេសថៃបានកើនឡើងយ៉ាងច្រើនក្នុងរយៈពេលប៉ុន្មានឆ្នាំថ្មីៗនេះ។ ក៏ប៉ុន្តែយន្តការគ្រប់គ្រងលើការបញ្ជូនពលករខ្មែរនៅបរទេសនៅមានភាពធូររលុងនៅឡើយដែលទីភ្នាក់ងារឯកជនជ្រើសរើសពលករទាំងនោះមិនគោរពទៅតាមលក្ខខណ្ឌនៃកិច្ចសន្យាការងារ។
អ្នកតំណាងរាស្ត្រគណបក្សប្រឆាំងបានស្នើសុំឱ្យរដ្ឋាភិបាលចាត់វិធានការផ្លូវច្បាប់ឱ្យបានតឹងរឹងបំផុតចំពោះក្រុមហ៊ុននិងមន្ត្រីមានសមត្ថកិច្ចដែលឃុបឃិតដោយគ្មានការលើកលែង។
លុបបំបាត់បំណុលទាសភាពនិងការជ្រើសរើសដោយបង្ខំដោយគ្មានការធានាការគោរពនិងការប្រតិបត្តិចំពោះអនុសញ្ញាអង្គការពលកម្មអន្តរជាតិស្តីពីការការពារនិងសុវត្ថិភាពរបស់ពលករ។
លោកស្រីមូរ សុខហួរបានលើកយកករណីជនរងគ្រោះ ហេង ហាក់ដែលបានសម្រេចចិត្តលោតពីលើបន្ទប់បង្ខាំងជាន់ទីបីរបស់អគារក្រុមហ៊ុនជ្រើសរើសពលករT&Pហើយបានក្លាយជាជនពិការនិងបន្តការព្យាបាលជាប្រចាំ។មកដល់ពេលនេះក្រុមហ៊ុននេះមិនទាន់នាំខ្លួនមកផ្តន្ទាទោសចំពោះមុខច្បាប់នៅឡើយ។
ករណីមួយទៀតដែលលេចធ្លោគឺពលការិនីម៉ៅ ឡាត់ធីអាយុ២៨ឆ្នាំមកពីស្រុកបវិល ខេត្តបាត់ដំបងបានធ្លាក់ខ្លួនមានវិប្បត្តិផ្លូវចិត្តបណ្តាលមកពីការធ្វើបាបនិងរំលោភសិទ្ធិយ៉ាងធ្ងន់ធ្ងរពីសំណាក់ថៅកែនៅក្នុងប្រទេសម៉ាឡេស៊ី។
ជនរងគ្រោះម៉ៅ ទ្បាត់ធីបានមកដល់ព្រលានយន្តហោះភ្នំពេញអន្តរជាតិកាលពីថ្ងៃទី២៦ខែមករាកន្លងទៅនេះក្នុងអាការៈភ័យខ្លាចយ៉ាងខ្លាំង។
លោកស្រីមូរ សុខហួរបាននិយាយថាក្នុងរយៈពេលមួយខែលោកស្រីបានទទួលពាក្យបណ្តឹងតាមទូរស័ព្ទចំនួន១០ករណីពីពលករខ្មែរដែលបានទៅបម្រើការងារនៅក្រៅប្រទេសដើម្បីសុំជួយសង្គ្រោះ។
របាយការណ៍របស់អង្គការឃ្លាំមើលសិទ្ធិមនុស្ស (Human Rights Watch) ដែលត្រូវបានចេញផ្សាយកាលពីខែវិច្ឆិកាឆ្នាំមុននេះ បានរកឃើញថាមុនពេលរដ្ឋាភិបាលសម្រេចផ្អាកបញ្ជូនពលករទៅម៉ាឡេស៊ី មានកុមារតូចៗអាយុត្រឹម១៣ឆ្នាំត្រូវបានជ្រើសរើសដោយទីភ្នាក់ងារ ជ្រើសរើសពលករនិងមេខ្យល់ដើម្បីបញ្ជូនទៅប្រទេសម៉ាឡេស៊ី។ អង្គការនេះបានកត់ត្រាឃើញមានពលករអាយុក្រោម១៨ឆ្នាំចំនួនប្រាំបី ករណី។
លោកបណ្ឌិត អន ប៊ុនហាក់ ប្រធានសមាគមទីភ្នាក់ងារជ្រើសរើសពលករកម្ពុជាដែលមាន២៥ក្រុមហ៊ុនជាសមាជិកធ្លាប់បានទទួលស្គាល់ថាមានពលករខ្មែរទាំងស្របច្បាប់ និងខុស ច្បាប់ប្រហែល៥ម៉ឺននាក់កំពុងបម្រើ ការងារតាមផ្ទះ តាមភោជនីយដ្ឋាន និងរោងចក្រនៅប្រទេសម៉ាឡេស៊ី។ ជាមធ្យមពួកគេទទួលបានប្រាក់ខែពី១៣៣ដុល្លារទៅ២០០ដុល្លារសហរដ្ឋអាមេរិក៕
No comments:
Post a Comment