សកម្មជន​អាវ​លឿង​ថៃ​ម្នាក់​ត្រូវ​បាន​ដោះ​លែង​ថ្ងៃ​នេះ

​ទណ្ឌិត​ថៃ​ រ៉ាត់​ទ្រី ប៉ៃប៉ូ​តាណា​ប៉ៃពូន ដែល​ជា​សកម្មជន​អាវ​លឿង​ថៃ។​រូប​ថត​ហេង ជីវ័ន

Friday, 01 February 2013
លាង ផាន់ណារ៉ា
The Phnom Penh Post

ស្ត្រី​ទណ្ឌិត​ថៃ​ម្នាក់ ឈ្មោះ រ៉ាត់​ទ្រី ប៉ៃប៉ូ​តាណា​ប៉ៃពូន ដែល​ជា​សកម្មជន​អាវ​លឿង​ថៃ​ ត្រូវ​បាន​នាយក​ដ្ឋាន​ពន្ធនាគារ​ព្រៃស ដោះ​លែង​នៅ​ថ្ងៃ​សុក្រ​នេះ ដែល​ជា​ថ្ងៃ​ដង្ហែ​ព្រះ​បរមសព​ព្រះ​បរមរតន​កោដ្ឋ។

ការ​ដោះ​លែង​ស្រ្តី​ជន​ជាតិ​ថៃដែលជា​សកម្មជន​​អាវ​លឿងរូប​នោះ គឺ​ធ្វើ​ឡើង​បន្ទាប់​ពី មាន​កិច្ច​ព្រម​ព្រៀង​រវាង​លោក​នាយក​រដ្ឋមន្ត្រី ហ៊ុន សែន និង​លោក​ស្រី យ៉ីង​ឡាក់ នាយក​រដ្ឋ​មន្ត្រី​ថៃ(ជាក្រុមអាវក្រហម) ស្នើ​សុំ​ដោះ​លែង​ស្ត្រី​អ្នកទោស​ថៃ​ម្នាក់ ហើយ​បន្ធូរ​បន្ថយ​ទោស ៦ ខែ​ដល់​បុរស​អ្នកទោស​ថៃ​ម្នាក់​។ នេះ​បើ​យោង​តាម ក្រសួង​ការបរទេស​កម្ពុជា បាន​ឲ្យ​ដឹង​កាលពី​ថ្ងៃ​ទី​១០ ខែ​មករា ឆ្នាំ​២០១៣។

សូមបញ្ជាក់ថា សកម្មជន​​អាវ​លឿង​ថៃទាំង​ពីរ​នោះ​គឺ​អ្នកស្រី រ៉ា​ទ្រី ពី​ប៉ា​តា​ណា​ប៉ៃ​ប៊ូ​ន និងលោក វី​រ៉ា ស៊ុម​ក្វាម​ឃី​ដ ត្រូវបាន​តុលាការ​ក្រុង​ភ្នំពេញ កាត់​ទោស​ពីបទ​ឆ្លងដែន​ចូល​ទឹកដី​កម្ពុជា​ខុស​ច្បាប់ និង​ធ្វើ​ចារ​កម្ម កាលពី​ចុង​ខែ​ធ្នូ ឆ្នាំ​២០១០​ដោយ​ម្នាក់ ជាប់​ទោស ៦​ឆ្នាំ និង​ម្នាក់​ទៀត​ជាប់​ទោស ៨ឆ្នាំ។

យោងតាមព្រះរាជក្រឹត្យ ចេញផ្សាយ​កាលពី​សប្តាហ៍​មុន​ក៏​បាន​ឲ្យ​ដឹង​ថា អ្នក​ទោស​ចំនួន ៤៩៦នាក់ ក៏​នឹង​​ត្រូវ​បាន​​ដោះលែងនាល្ងាចនៅថ្ងៃទី៤ ខែ​កុម្ភៈ ឆ្នាំ​២០១៣ ដែល​ជា​ថ្ងៃ​ថ្វាយ​ព្រះ​ភ្លើង បូជា​ព្រះ​បរម​សព និង នៅ​ពេល​​ព្រះមហាក្សត្រ និង​សម្តេចម៉ែ ថ្វាយ​ព្រះ​ភ្លើង បូជា​ព្រះ​បរម​សព សម្តេច​ព្រះ​មហាវីរក្សត្រ នៅ​វាល​ព្រះ​មេរុ។ ​ក្នុងនោះ​អ្នកទោស ៤១២ នាក់ ត្រូវ​លើកលែង​ទោស ហើយ​ដោះលែង នៅ​ថ្ងៃ​ទី​៤​កុម្ភៈ និង​អ្នក​ទោស ៨៤ នាក់ ត្រូវ​បន្ធូរបន្ថយ​ទោស​។​