អ៊ូ វីរៈ ៖ សម្តេចតេជោ គួរបោយដៃហៅ លោក សម រង្ស៊ី ដើម្បីចរចាគ្នារក ដំណោះស្រាយ

(Photo: Reuters)

Thursday, 07 February 2013
 ដោយ ៖ ដើមអម្ពិល(DAP)

ភ្នំពេញ៖ ប្រធានមជ្ឈមណ្ឌល សិទ្ធិមនុស្សកម្ពុជា មានទស្សនៈថា សម្តេចតេជោ គួរតែបោយដៃហៅ លោក សម រង្ស៊ី ដើម្បីចរចាគ្នា រកដំណោះស្រាយ ហើយត្រូវចាំមើល ឥរិយាបថរបស់ លោក សម រង្ស៊ី ព្រោះមានតែ រដ្ឋាភិបាល ប៉ុណ្ណោះ ដែលអាចហុចដៃហៅ លោក សម រង្ស៊ី មកចរចាគ្នា ដើម្បីរកដំណោះ ស្រាយបាន ។

លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានថ្លែងប្រាប់ក្រុមអ្នកកាសែត នៅក្រោយកិច្ច ពិភាក្សាតុមូល ស្តីពី “តួនាទីស្រ្តីក្នុងការចូលរួម វិស័យនយោបាយ នៅថ្នាក់ជាតិ” នៅព្រឹកថ្ងៃទី៧ ខែកុម្ភៈ ឆ្នាំ២០១៣ នៅភោជនីដ្ឋាន ទន្លេបាសាក់ រាជធានីភ្នំពេញ ថាករណីលោក សម រង្ស៊ី មេដឹកនាំ គណបក្សសង្គ្រោះជាតិ គឺជារឿងនយោបាយ ហើយ រូបភាពក្នុងការបោះឆ្នោត ជ្រើសតាំងតំណាងរាស្រ្ត នៅឆ្នាំ២០១៣ ដោយមានការទទួលស្គាល់ ពីប្រជាពលរដ្ឋ ឬយ៉ាងណានោះ គឺជារឿងសំខាន់ បំផុតសម្រាប់ស្ថេរភាព នៅកម្ពុជា ។គណបក្សកាន់អំណាច ប្រសិនបើចង់ជាប់ ឆ្នោត ហើយដឹកនាំ ប្រទេសបាន នោះ ទាល់តែមានរូបភាពមួយ ទទួលយកបានពី មជ្ឈដ្ឋានប្រជាពលរដ្ឋ និង សង្គម ទាំងមូល ហើយសំខាន់កុំ គិតពីអន្តរជាតិ អ្វីដែលសំខាន់ គឺប្រជាពលរដ្ឋ ថាតើពួកគេអាច ទទួលយកបានឬ អត់?

លោកបន្ថែមថា «ខ្ញុំថារឿងចរចាជាមួយលោក សម រង្ស៊ី ដើម្បីមានការបោះឆ្នោត មួយទទួលយកបាន ដោយប្រជា ពលរដ្ឋ គឺជារឿងមួយចាំបាច់ ដើម្បីស្ថេរភាព ប្រទេសកម្ពុជា ហើយឥឡូវនេះគឺ មានតែរដ្ឋាភិបាល ឬអ្នកមានអំណាច នៅក្នុងប្រទេសកម្ពុជាទេ ដែលជាអ្នកហុចដៃ ទៅលោក សម រង្ស៊ី បានដើម្បីចរចាជជែកគ្នា ស្វែងរកដំណោះស្រាយ ព្រោះលោក សម រង្ស៊ី គ្មានអំណាចក្នុងការ ហុចដៃបានទេ ដូច្នោះមានតែសម្តេច ហ៊ុន សែន ប៉ុណ្ណោះដែលអាច ហុចដៃ ទៅមុនបាន ហើយចាំ មើលលោក សម រង្ស៊ី ឆ្លើយតបយ៉ាងម៉េច” ។

លោក អ៊ូ វីរៈ បញ្ជាក់ថា ក្នុងករណីនេះ បើសិនជាសម្តេចតេជោ ហុចដៃ ហើយលោក សម រង្ស៊ី បន្ទន់ឥរិយាបថ បន្តិច នោះ ការជជែកគ្នារកដំណោះស្រាយ ពិតជាមានលទ្ធផលល្អ ហើយរឿង រកដំណោះស្រាយ មិនមែនជាបញ្ហាសម្រាប់ ភាគីទាំងពីរនោះទេ សំខាន់គឺឆន្ទៈរៀងៗខ្លួន ។

លោកបញ្ជាក់ទៀតថា «ឥឡូវខ្ញុំចង់ឃើញសម្តេចតេជោ ជាអ្នកហុចដៃឲ្យលោក សម រង្ស៊ី សិន ហើយបើសិនជា សម្តេចតេជោ ហុចដៃហើយ លោក សម រង្ស៊ី នៅប្រកាន់ឥរិយាបថ បែបហ្នឹងទៀត ខ្ញុំថាប្រជាពលរដ្ឋខ្មែរ នឹងស្តី បន្ទោសទៅ លោក សម រង្ស៊ី វិញហើយបញ្ហាដែល មិនអាចសម្របសម្រួល គ្នាបាននោះ គេនិងទម្លាក់កំហុស ទៅ លោក សម រង្ស៊ី វិញ»។

លោក ខៀវ កាញារីទ្ធ អ្នកនាំពាក្យរាជរដ្ឋាភិបាលកម្ពុជា និងជារដ្ឋមន្រ្តីក្រសួងព័ត៌មាន បានមានប្រសាសន៍ កាលពី ថ្ងៃទី៦ ខែកុម្ភៈ ឆ្នាំ២០១៣ថា បញ្ហានេះ គឺមិនអាចធ្វើការ រួបរួមរវាងក្រុម គណបក្សកាន់អំណាច និងគណបក្ស ប្រឆាំង បានទេ ព្រោះនៅពេលមាន បញ្ហាអ្វីកើតឡើង តែងតែប្រើពាក្យ ក្បត់ជាតិ និងលក់ទឹកដី។

លោក ខៀវ កាញារីទ្ធ បានថ្លែងថា «បើយើងគោរពគ្នាទៅវិញទៅមក យើងអាចរាប់រកគ្នាបាន ហើយអាចនិយាយ ជា មួយគ្នាបាន ប៉ុន្តែហាមាត់សុទ្ធតែថា គេជាចោរ ជាអ្នកក្បត់ជាតិ វាពិតជា ពិបាកហើយ ព្រោះនៅក្នុងសង្គម ប្រជាធិប តេយ្យមួយ យើងត្រូវការយកសំឡេងឆ្នោត ហើយយកសំឡេងឆ្នោត នៅពេលណា គឺពេលទុកចិត្ត … បើយើង ចាប់ ផ្តើមឡើងសុទ្ធតែដៀលថា អាក្បត់ជាតិ អាខ្ញុំគេ អ្នកណាគេទទួលយកបាន!»។

លោកបន្ថែមថា ដូចសម្តេចនាយករដ្ឋមន្រ្តីលើកឡើងថា ប្រសិនបើអ្នកនយោបាយ មានសីលធម៌ ដូចទៅនឹងអ្នក ផ្សព្វផ្សាយពាណិជ្ជកម្មបាន ប្រហែលជាល្អ។

លោកថា «យើងនិយាយតែរបស់យើងទៅ កុំទៅបង្អាប់គេអី ប៉ុន្តែចាប់ផ្តើមឡើង ប្រមាថគេហើយ យើងទៅចាប់ដៃ គេម៉េចកើត»។

កន្លងមកបញ្ហាលោក សម រង្ស៊ី ដែលមិនអាចចូលស្រុកវិញបាន សម្តេច នាយករដ្ឋមន្រ្តី ហ៊ុន សែន បានប្រកាសថា កុំទៅពឹងបរទេស គ្មានប្រយោជន៍ទេ គួរតែមកនិយាយគ្នា ក្នុងនាមខ្មែរ ដូចគ្នា ទើបអាចរក ច្រកចេញបាន ៕