សម្ដេចក្រុមព្រះ​ នរោត្ដម រណឫទ្ធិ បដិសេធ អំពីតួនាទីប្រធាន កិត្ដិយស នៃគណបក្ស សង្គ្រោះជាតិ [- គោះទឹកបង្អើលត្រី?]

Photo by DAP-NEWS

Monday, 11 March 2013
សុភាព
ដោយ៖ ដើមអម្ពិល : (DAP)

ភ្នំពេញ ៖ សម្ដេចក្រុម ព្រះនរោត្ដមរណឫទ្ធិ ព្រះប្រធានឧត្ដម ប្រឹក្សាព្រះមហាក្សត្រ នៅថ្ងៃចន្ទ ទី១១ ខែមីនា ឆ្នាំ២០១៣ បាន ច្រានចោលភ្លាមៗ និងបដិសេធដាច់អហង្កា ចំពោះព័ត៌មានដែលបានផ្សាយថា ព្រះអង្គយាង ទៅគង់ជាព្រះប្រធាន កិត្ដិយសគណបក្សសង្គ្រោះជាតិ ដែលទើបបង្កើតឡើង នៃការរួមគ្នារវាងគណបក្សសម រង្ស៊ី និងគណបក្សសិទ្ធិមនុស្ស ។ ដំណាលគ្នានេះដែលលោកសម រង្ស៊ី មេដឹកនាំគណបក្សប្រឆាំងនេះ ក៏បានបដិសេធចំពោះព័ត៌មាននេះដែរ តាមរយៈការផ្សាយព័ត៌មានពេលព្រឹករបស់វិទ្យុអាស៊ីសេរី ។

លោកអានន្ទដាយ៉ាត លេខាផ្ទាល់សម្ដេចក្រុមព្រះនរោត្ដមរណឫទ្ធិបាន មានប្រសាសន៍ តាមទូរស័ព្ទប្រាប់ មជ្ឈមណ្ឌលព័ត៌មានដើមអម្ពិល នៅព្រឹកថ្ងៃចន្ទនេះ ដោយបានដកស្រង់បន្ទូលសម្ដេចក្រុមព្រះថា ព្រះអង្គមិន មានការជាប់ពាក់ព័ន្ធទៅនឹងតួនាទីប្រធានកិត្ដិយសរបស់គណបក្សសង្គ្រោះជាតិទេ ។ ខុទ្ទកាល័យ សម្ដេចក្រុមព្រះ និងចេញសេចក្ដីថ្លែងការបញ្ជាប់អំពីជំហរ សម្ដេចក្រុមព្រះមិន ធ្វើនយោបាយនាពេលបន្ដិចទៀតនេះ ។


ថ្មីៗនេះ សម្ដេច ក្រុមព្រះនរោត្ដមរណឫទ្ធិ បានមានបន្ទូលក្រើនរំលឹកដល់ព្រះរាជវង្សានុវង្សថា មិនគួរធ្វើ នយោបាយទេ ។ មិនតែប៉ុណ្ណោះសម្ដេចហ៊ុន សែន ក៏បានប្ដេជ្ញា ចំពោះព្រះភក្រ័ព្រះសព ព្រះបរមកោដ្ឋ សម្ដេចព្រះនរោត្ដមសីហនុ អតីតព្រះមហាក្សត្រកម្ពុជា ថា សម្ដេចសន្យាការពាររាជបល្លង្ក័ ។

ដើម្បី ឱ្យកាន់តែច្បាស់ថែមទៀត សម្ដេច ក្រុមព្រះនរោត្ដម រណឫទ្ធិ នៅម៉ោង៨និង៤០នាទីព្រឹកថ្ងៃចន្ទទី១១ ខែមីនានេះ បានទូរស័ព្ទដោយផ្ទាល់ មកកាន់លោក សយ សុភាព ដើម្បីបញ្ជាក់សាជាថ្មី អំពីព្រះទ័យរបស់ព្រះអង្គថា មិនចូលក្នុងឆាក នយោបាយវិញ ទេ ។

ព្រះអង្គបានមានបន្ទូលថា “ព្រះអង្គសូមស្បថមុខព្រះភក្ដ្រព្រះបរមកោដ្ឋសម្ដេចឪថា មិនចូលធ្វើនយោបាយទេ ហើយក៏មិនដែលជួប កុំថាឡើយមេដឹកនាំ សូម្បីតែកូនមន្ដ្រីបក្សប្រឆាំង ក៏មិនដែលផង ក្នុងការនិយាយអំពីរឿងធ្វើជាប្រធានកិត្ដិយសគណបក្សសង្គ្រោះជាតិស្អីគេនោះ“ ។

តាមរយៈការទូរស័ព្ទផ្ទាល់មកកាន់លោក សយ សុភាព សម្ដេចក្រុមព្រះនរោត្ដមរណឫទ្ធិ សូមបញ្ជាក់ ជូនសម្ដេចនាយករដ្ឋមន្ដ្រី ក៏ដូចប្រជារាស្ដ្រថា ព្រះអង្គមិនធ្វើនយោបាយទេ ។ ផ្ទុយទៅវិញ រាជវង្សានុវង្ស គួរនៅក្រៅឆាកនយោបាយ ព្រោះសម្ដេចនាយករដ្ឋមន្ដ្រី ហ៊ុន សែន លោកបានសន្យាថែរក្សាព្រះរាជបល្ល័ង្កមុខ ព្រះបរពសពព្រះមហាវីរក្សត្រ ៕