គណបក្ស​ប្រឆាំង គ្រោង​​ធ្វើ​​បាតុ​កម្ម នៅ​ថ្ងៃ​ទី​​២៤​មេសា ជំរុញ​​ឲ្យ គ​.​ជ​.​ប ប្រកាន់​​ជំហរ​​ឯករាជ្យ​

 លោក សម រង្ស៊ី ប្រធានគណបក្ស សង្គ្រោះជាតិ

​

ដោយ ណាត សុភាព និង ស៊ុន ណារិន ថ្ងៃពុធ ទី10 មេសា ឆ្នាំ2013 ម៉ោង16:41VOD

គណបក្ស​សង្គ្រោះ​ជាតិ ដែល​កើតឡើង​ពី​គណបក្ស​​សម​រង្ស៊ី និង​​គណបក្ស​​សិទ្ធិ​មនុស្ស គ្រោង​​នឹង​​ធ្វើ​​បាតុកម្ម នៅ​​ថ្ងៃ​​ទី​​២៤​​ខែ​មេសា ខាង​មុខ ដើម្បី​ដាក់​សម្ពាធ​ឲ្យ​​គណៈ​កម្មាធិការ​​ជាតិ​​រៀបចំ​​ការ​បោះ​ឆ្នោត​(​គ​. ​ជ.​ប​) ប្រកាន់​ជំហរ​ឯករាជ្យ​។

​ការធ្វើ​បាតុកម្ម​នេះ ធ្វើឡើង​​បន្ទាប់​ពី​​គណបក្ស​ប្រឆាំង​​មួយ​​នេះ យល់​ឃើញថា គ.ជ.ប មិន​​ស្ថិត​នៅ​​ជំហរ​​ឯករាជ្យ និង​​មាន​​ទំនោរ​ទៅ​រក​​គណបក្សកាន់​អំណាច គឺ​គណបក្ស​ប្រជាជន​កម្ពុជា​។​

អ្នកនាំពាក្យ​គណបក្ស​សង្គ្រោះ​ជាតិ លោក យឹម សុវណ្ណ មាន​ប្រសាសន៍​ថា បាតុកម្ម​​​នេះ នឹង​មាន​ការចូលរួម​ពី​អ្នក​ស្រលាញ់​ប្រជា​ធិបតេយ្យ យ៉ាងតិច​៤​ពាន់​នាក់ ដែល​នឹង​ដើរ​ដង្ហែរ​ទាមទារ​ឲ្យ​ផ្លាស់ប្តូរ គ.ជ.ប ពី​​សួន​​ប្រជាធិប​តេយ្យ មកកាន់​ការិយាល័យ​កណ្តាល ​គ.ជ.ប នៅ​ក្រសួង​មហាផ្ទៃ​ ៖ "បើសិនជា គ ជ ប​ ហ្នឹង​មិន​ព្រ​ម​ធ្វើ​តាម​ អនុ​សាស​ន៍អង្គការ​ស​ហ​ប្រ​ជា​ជាតិ​ទេ ចំពោះការ​កែ​រ​ទំ​រង់​ គ ជ ប ពី​ព្រោះ​យើង​យល់​ថា​ការ​បោះ​ឆ្នោត​ឆ្នាំ​២០១៣នេះ គឺ​ជា​ការ​បោះឆ្នោត​អាយុ​ជីវិត​ជាតិ​ មិន​អាច​ធ្វើ​លេង​សើច​បាន​ទេ​" ។

 ​ឆ្លើយតប​នឹង​ការគ្រោង​​ធ្វើ​បាតុកម្ម​របស់​​គណបក្ស​​ប្រឆាំង អ្នកនាំពាក្យ​​សាលា​រាជធានី​​ភ្នំពេញ លោក ឡុង ឌី​ម៉ង់ មាន​ប្រសាសន៍​​ថា សាលា​​រាជ​ធានី រង់ចាំ​សេចក្តីជូនដំណឹង​ពី​គណបក្ស​សង្គ្រោះ​ជាតិ មុន​នឹង​អនុញ្ញាត​ឲ្យធ្វើ​បាតុកម្ម​។ លោក​បន្តថា នេះ​ជា​​សិទ្ធិ​សេរី​​ភាព​​​របស់​​គណ​បក្ស តែ​បាតុកម្ម​ត្រូវ​​កុំ​​ឲ្យ​​ប៉ះ​ពាល់​​ដល់​​សន្តិ​សុខ និង​សណ្តាប់ធ្នាប់​សាធារណៈ​ ​៖

កាលពី​ថ្ងៃ​អង្គារ​ម្សិលមិញ តំណាង​គណបក្ស​សង្គ្រោះ​​ជាតិ លោក គួ​យ ប៊ុន​រឿន បាន​ចូលរួម​សន្និសីទ​កាសែត ជាមួយ គ.ជ.ប ដោយ​​លោក​​លើក​ឡើង​​ថា សមាសភាព គ​.​ជ​.​ប តាំងពី​ថ្នាក់​ជាតិ​ដល់​មូលដ្ឋាន តាំង​អាណត្តិ​មុនៗ រហូត​បច្ចុប្បន្ននេះ ជា​មនុស្ស​ដដែល ភាគច្រើន​មក​ពី​គណបក្សកាន់អំណាច​។

តំណាង​គណបក្ស​កាន់អំណាច លោក អ៊ុក គឹម​សាន្ត បាន​ទទួលស្គាល់ថា គណបក្ស​ប្រជាជន​កម្ពុជា ពិតជា​មាន​គ្នា​ច្រើន​នៅក្នុង​ស្ថាប័ន​នេះ ប៉ុន្តែ​លោក​ថា គណបក្ស​មិន​បាន​លូកដៃ​ចូល​ក្នុង​កិច្ចការ​របស់ គ​.​ជ​.​ប ទេ ៖ "​កន្លងមក គឺ​ថា​គណបក្ស​ប្រជាជន មិន​ដែល​លូកដៃ​ទៅដល់ កកូរកកាយ​ផ្ទៃក្នុង​របស់  ប៉ិច ឫ​ស៊ិក​ទេ គ្រាន់​ថា​អ​ញ្ចេះ អាហ្នឹង​ខ្ញុំ​ទទួលស្គាល់​មែន ថា​គណបក្ស​ប្រជាជន មាន​ច្រើន​នៅ​មូលដ្ឋាន ក៏​មាន​ច្រើន អញ្ចឹង​ការជ្រើសរើស ប៉ិច ស៊ី​ក វា​អាច អាហ្នឹង​វាៗ​ទេ បើ​ថា​ឲ្យ​គណបក្ស​ប្រជាជន ទៅ​លូកដៃ​ថា បញ្ជា​ថា ត្រូវតែ​ដាក់​សមាជិក​គណបក្ស​ប្រជាជន​ចូល ក្នុង​ប៉ិច ក្នុងស៊ិក​ហ្នឹង អត់​មាន​ទេ​" ។​

ប្រធាន គ​.​ជ​.​ប លោក អ៊ឹម សួស្តី មានប្រសាសន៍ កាលពី​ថ្ងៃ​អង្គារ​ថា ការទាមទារ​ឲ្យ​រើរុះ​សមាសភាព គជប រឹតតែ​មិន​អាច​ទទួលយកបាន ៖ "​អំពី​មន្ដ្រី​រាជការ គ​.​ជ​.​ប នៅ​រក្សា​ដែល​ទេ ហើយ គ​.​ជ​.​ប មិន​មាន​សមត្ថកិច្ច ស្នើ​ទៅ​ក្រុមប្រឹក្សាធម្មនុញ្ញ​ដើម្បី​បកស្រាយ​ទេ ចង់​បកស្រាយ​ទាល់តែ​ប្រធានសភា ប្រធានព្រឹទ្ធសភា ឫ​ក៏​ខាង​សមាជិកសភា ទើប​អាច​ស្នើ​ទៅ​បាន ដូច្នេះ​សូម​ឲ្យ​អ្នកណា​គេ​មាន​សមត្ថកិច្ច គេ​ស្នើ​ទៅ​ក្រុមប្រឹក្សាធម្មនុញ្ញ​ទៅ ហើយ​យើងខ្ញុំ​ក៏​ចង់​ឲ្យ​ច្បាស់​ដែរ កន្លងមកនេះ យើង​ធ្វើ​តាំងពី​ឆ្នាំ​១៩៩៣​មក ឆ្នាំ​១៩៩៣​មក​ស្អីៗ​គឺ​ដដែលៗ​វា​មិន​អស់ " ។​

កាលពី​ខែ​មុន អង្គការ​ឃ្លាំមើល​ការបោះឆ្នោត បាន​បង្ហាញ​​របាយ​ការណ៍​​ស្រាវ​ជ្រាវ​ថា ពលរដ្ឋ​ដែល​បាន​ចុះឈ្មោះ​ក្នុង​បញ្ជី​បោះ​ឆ្នោត​​​ហើយ ចំនួន​១​លាន​២​សែន​៥​ម៉ឺនាក់​ ​អាច​បាត់បង់​សិទ្ធិ​បោះឆ្នោត​នៅ​ពេល​ខាងមុខ បើ គ​.​ជ​.​ប មិន​ពិនិត្យ​ករណី​នេះ​ឡើង​វិញ ។

គួរបញ្ជាក់​ថា សហគមន៍​អន្តរជាតិ អង្គ​ការ​​ជាតិ​​អន្តរ​ជាតិ និង​អ្នករាយការណ៍​​ពិសេស​​អង្គការសហប្រជាជាតិ ទទួលបន្ទុក​សិទ្ធិ​មនុស្ស​​នៅ​កម្ពុជា បាន​ជំរុញ​ឲ្យ​​កម្ពុជា កែទម្រង់​ គ.ជ.ប ដើម្បី​ឲ្យ​ការបោះ​ឆ្នោត​សេរី យុត្តិធម៌ និង​​គណបក្ស​​ចូលរួម​​ប្រកួត​ផ្សេងៗ អាច​​ទទួលយក​លទ្ធផល​បាន​៕